اشعار ترکی آذری و فارسی

اشعار ترکی آذری و فارسی

مئی ساتانلار کوچه‌سی- تورکی و فارسیجا شعرلر
اشعار ترکی آذری و فارسی

اشعار ترکی آذری و فارسی

مئی ساتانلار کوچه‌سی- تورکی و فارسیجا شعرلر

زولفی پریشان

منی محروم ائدن روخساریدن زولفی پریشان‌دیر،

بو دریایی لطافت موجی عنبر ایچره پینهان‌دیر

اگر خورشیدی تابان‌یله سنسیز هم‌شراب اولسام،

لبی لعلی مئی آلودی گؤزومده قانلو پئیکان‌دیر

دد و دامی موسخّر ائیله یوبدور جذبه‌ی عشقین،

دوگون مجنونی شیدا باشینا چتری سلیمان‌دیر

منی مکری رقیب آواره قیلدی یار کوییندن،

چیخاران آدمی فردوس‌یدن تزویری شیطان‌دیر

قاچان عاشیقلرین فیکرینه دوشدو اول عقیقی لب

کی، اونون بیر قارا گؤزلولرینده‌ن آبی حیوان‌دیر

مسلمانام، دئییر مستین، ایچیر عاشیقلرین قانین،

منم کافیر، اگر اول دوشمنی ایمان مسلمان‌دیر

محبّت اهلی هنگی جام و نشاطی درد دن دؤنمز،

نئچون چکسون خومار اول کیم همیشه ایچدیگی قان‌دیر

منی خاکی نه تنها اولموشام مجنون کیمی رسوا،

کی، اول درد دن فلک سنگی ملامت ایچره پینهان‌دیر

فلک‌لر قان ایچر گؤردوکجه تجرید اهلینی، صائیب،

کی، یوقسیزلار حرامی‌لر گؤزینده تیغی عریان‌دیر

شاعر: صائب تبریزی

کفری ایمان ائیله‌مک اولماز

توتولموش کؤنلومو جام‌ایله شادان ائیله‌مک اولماز،

اَل‌ایلن پسته‌نین آغزینی خندان ائیله‌مک اولماز

نه سؤزدور بو کی، اولسون صاحب نظر زوهّاد،

قارا تورپاغی هرگز آبی حیوان ائیله‌مک اولماز

بولوت قیلان کیمی جؤولان اوراردا ایلدیریم تیغی،

کؤنول پرده‌لرینده عشقی پنهان ائیله‌مک اولماز

قیلیج گر ایچسه عالم قانینی سیراب‌لیق بیلمز

سنی عشّاق قتلین‌دن پشیمان ائیله‌مک اولماز

منیم گؤز یاشیمی چیخ گئل فلک‌لردن تماشا قیل،

حبابی قصرلر ایچینده طوفان ائیله‌مک اولماز

منی مجنونی عاقل ائیله‌مک ممکن دگیل ناصح،

سؤزایلن مشکی نابی قان کی، بیر قان ائیله‌مک اولماز،

خطا‌دان کئچدی جئیران قانینی مشک ائیله‌دی صائیب،

دئمه، عصیانی طاعت، کفری ایمان ائیله‌مک اولماز

شاعر: صائب تبریزی

باشیمدا‌دیر قاراسی هنوز

چیخاردی خط منم زولف مبتلاسی هنوز،

دوگون ساقالدی و باشیمدا‌دیر قاراسی هنوز

خطین غوباری قویاشی اگرچی یاشوردی،

گؤزومو خیره قیلور یوزیین صفاسی هنوز

بهار یئتدی ده قانلار کی، تؤکدی گؤزلردن،

خزان اولاندا نه‌لر ائیله‌سون جفاسی هنوز

سوواردی‌لار قیلینجیلا مگر گولوستانی،

کی، بیر بیرینه قووشماز گولون یاراسی هنوز

حیات سویونا بیر داغ قویدو رشکی لبین،

کی، کئچدی عؤمری ابد، توشمه‌دی قاراسی هنوز

محیطی عشق آرا من اول حبابی بی‌باکم،

کی، گئتدی باشیم و باشیمدا‌دیر هواسی هنوز

وصال امیدینه عؤمرون کئچیردی کویینده،

یئتیشمز ایشلرینه صائبین دواسی هنوز

شاعر: صائب تبریزی

نهان ایچر

عاشیق قانینی وسمه‌لی قانین نهان ایچر،

جؤوهرلی تیغ قین آرا پیوسته قان ایچر

ائتدوکجه قان کؤنوللری اول لعلی آتشین،

آبی حیات تک قارا زولفون روان ایچر

تا بیر پیاله وئردی، کباب ائتدی باغریمی،

هر کیم اونون الینده‌ن ایچر باده، قان ایچر

ایللر یاشار خیضر کیمی هر کیم کی، گئجلر،

گول اوزلو یاریلن مئیی چون ارغوان ایچر

آدم نه‌دیر کی، ایچمسون اول وئردیگین شراب،

وئرسن اگر، فرشته مئیی بی‌گمان ایچر

ساقی منیمله شیشه‌ی پیمانه نئیله‌سون،

دریانی بیر نفسده بو ریگی روان ایچر

تئزراق چکه‌ر ندامته بد مست‌یلیک یولو،

هر کیم کی، یاخشی ایچسه شرابی یامان ایچر

صائیب کی، من اونون سؤزونو یئره سالمادیم،

بیلمن نچون منیم قانیمی آسمان ایچر

شاعر: صائب تبریزی

مینا تک بیر اووج قان

گول کیمی هر کیم کی، گولزار ایچره نقد جانی وار،

سعی‌یله تؤکسون سنین یولونا تا ایمکانی وار

تا آیاغین تورپاغینا تؤکمه‌سین دوتماز قرار،

هر کیمین مجلیس‌ده مینا تک بیر اووج قانی وار

نه عجب عاشیق‌لری گر باشدان آچسون نازیله،

کاکیلی مشگین کیمی هر کیم کی، سرگردانی وار

ائیله ییبدور نقطه‌ی خالین منی پرکار سیز،

یوقسا دریا اوزره هر بیر قطره‌نین دورانی وار

گزدیررلر ال به ال داغین کؤنول‌لر پاره‌سی،

یئرده قالماز جام تک هر کیم کی، ایستی قانی وار

پوچدی هر سؤز کی، دئیرلر معرفت‌دن اهلی قال،

بحردن چیخماز صدف تا گؤوهری غلطانی وار

چوخ دگیل حئیرت یئری گر وارسا شیرین سؤزلری،

طوطی‌نی صائیب، نظرده گوزگی تک میدانی وار

شاعر: صائب تبریزی

گؤردی‌لر لعلی لبین

اولمادی خورشیدیدن داغلاردا رنگین قاشلار،

گؤردی‌لر لعلی لبین قان ترله‌دیلر داشلار

قیلدی پیدا حکمی تقویمی کهن گول دفتری،

آچدیلار تا چهره‌ی دیلداریمی نقّاشلار

قیلمادیلار سینه‌ی افکاریمی آماجگاه،

اکسیک ائتدیلر بیزیملن اول موقوّس قاشلار

عاشیقی صادق بیلیر سنگی ملامت قدرینی،

مخزنی سلطانا لاییقدیر بو یارار داشلار

گونو دوندن ائل دئدیم ترک ائتمه‌سون یولداشلیغی،

چون قارا اولدو گونوم، یاد اولدولار قارداشلار

یول اگر حقدیر، چکه‌ر یولسوزدان آخیر انتیقام،

ائله تاپشیر، چیخدیلار یولدان اگر یولداشلار

اولدو مغلوبی هوای نفسی ایستیلای عقل،

آلدیلار حاکیم الینده‌ن اختییار اوو باشلار

چون کؤنول بی‌نور اولوب مطلق عنان آلور هوس،

قاش قارالاندا چیقارلار یووادان خفّاشلار

مهریبان اولماز نسیمی صبحدم هرگیز سنه،

شمع تک تا تؤکمه‌سم صائیب، گؤزوندن یاشلار

شاعر: صائب تبریزی

زولفی پریشان

ائلدن چیخارام زولفی پریشانینی گؤرگج،

ایشدن گئدرم سروی خورامانینی گؤرگج

سوسوزلارا گر جان آخیدیر چشمه‌ئی حیوان،

من جان وئررم چشمه‌ئی حیوانینی گؤرگج

گر باغلاموسان ائل گؤزونو شرمی عذارین،

جاندان کسیلور خنجری مژگانینی گؤرگج

ریحان کی، نزاکت تؤکولوردی قلمین‌دن،

خط تیره چکر زولفی پریشانینی گؤرگج

بولبول کی، گولون لعلی‌لبیندن سؤز آلیردی،

دیلی دولاشیر غنچه‌ئی خندانینی گؤرگج

ریضوان کی، بهشت‌ین یئمیشی گؤزونه گلمز،

دیشلر اَلینی سیبی زنخدانینی گؤرگج

یئردن خطی ریحان ورقین پاک سیلیب‌دیر،

نقاشی گولوستان، خطی ریحانینی گؤرگج

گول رنگی آلور، صوبح، ایکی خالی ترین‌دن،

خورشیدی عذار، مؤحریقی اَفشانینی گؤرگج

مژگاینی آلیب قانلو یاشیندان رگی یاقوت،

صائیب لبی لعلی گؤهر اَفشانینی گؤرگج

شاعر: صائب تبریزی

مئی‌یه باتمیش دوداغین

مئی‌یه باتمیش دوداغین گور نه گئتیردی باشیما

هوشومو باشدان آلیب سونرا گوونمه هوشوما

ائله سنسیزله‌میشم نانه‌یه بنزر اوره‌یم

گل تَلَس، گل عزیزیم، بیر باشا گیر آغوشوما

اؤز الینله بو جواهیر ائوینی باغلامیسان

باری اینصاف ائله سن گل بو لبی خاموشوما

قارا زولفون یوخودا سؤیله‌ییر افسانه منه

او دؤنوب صوبحه جن هم صوحبتیمه سیر داشیما

منم اول قومری کی صائیب او یاشیل سرو آغاجی

یارپاغیندان عبا تیکمیش کی گلیر چوخ خوشوما

شاعر: صائب تبریزی

لاییق دئییلم

غم چکمه‌یه لاییق دئییلم، شاد ائله اون‌دا

ویرانه اگر ائتمه‌سن، آباد ائله اون‌دا

تاپشیرما منی خاطیراتا، ائیله‌مه میسکین،

یول گئتمه‌یه وار قوّتیم، آزاد ائله اون‌دا

بلکه چاتام او قافیلیه، اوردادی قلبیم،

هیمّت‌لی آغام، لاییقی ایمداد ائله اون‌دا

اولموش کیمیم، یوخدو بدن‌ده بئله قانیم،

دیوانه دئییب سن یئنه ایجاد ائله اون‌دا

دونیا ائشی‌دیر فریادینی صائیب‌ین، آنجاق،

سن‌ده ائشیدیب فریادیمی یاد ائله اون‌دا

شاعر: صائب تبریزی

توپراغا دوندوم

ازدیکجه فلک، توپراغا دؤندوم بو جاهان‌دا،

یوخ اوزگه دنیم من اویودم بیر داها اون‌دا

دیوار دیبینه چکسه‌ده یوخسوللوغوم آنجاق،

هوما قوشو دایه‌مدی منیم من دوغولان‌دا

غم داغی اینان، قامتیمی ایدی کمان‌تک،

آنجاق منی سیندیرمادی بیر لحظه بوران‌دا

دؤوران منه نه وئردی، نه گئیدیردی، سوروشما،

روزوم غضبیم، پالتاریم عیبیم‌دی جاهان‌دا

داغ صبریم‌ایله اویغودایام داغ اتیینده،

خنجرله آییرماق بیزی مومکونمو بیر آن‌دا!؟

اوز سوفره‌مه مئهمان اولورام بسدی منیم چون،

گؤز دیکمرم اوزگه علینه، قوپسا طوفان‌دا

کام آلماسادا هر ایکی دونیادا بو عاشق،

قلبی آچیلیر یاری گؤروب حئیران اولان‌دا

بیر دؤرّم، اوزوم، قیمتیمی وئرمه‌سه‌لرده،

آیدین‌دی منه، یوخدو خریدار بو مکان‌دا

من کی، فلکه مینّت‌ایله باشیمی اَیمم،

ازسین، نه اولار، ایسته‌مرم اوندان آمان‌دا

ظاهرده منم وارلی کی، باطین‌ده فقیرم،

غؤنچه کیمیم پالتارین آلتین‌دا قالان‌دا

الوان لیباسا یوخ هوسیم، کعبه تکین من،

بسدیر دَییشم پالتاریمی ایل قورتاران‌دا

سایه‌مده اگر شهرته چاتمیشسا بو خالقیم،

روزوم سوموک اولموشدو هوما تک بو مکان‌دا

صائیب، سنی کیم باغلادی بو مولکه کی قالدین؟

ایندی سنه زیندان‌دی بورا، قال، هله یان‌دا!

شاعر: صائب تبریزی

مجلسی گول‌لر

قوروبدو مجلسی گول‌لر یئنه گولوستان‌دا،

چیچک‌لی سوفره‌دی بو باغ‌داکی خیابان‌دا

او آغ لچک‌لرایله هر طرف گوله بورونوب،

ائله بیر آغ گئیینن لیلی‌دیر بو بوستان‌دا

گوموش تک آغ گؤرونور قاپ‌قارا او تورپاق‌دا،

شکوفه یارپاغی‌دیر دقّت ائتسن هر یان‌دا

اورک‌ده‌کی غباری آچماغا باغ عاجز ایدی،

بهار چیچک‌لر ایله وئردی قلبه درمان‌دا

گئجه‌نی صوبحه کیمی یاتمایان او مستلر تک،

اوفوقده گولدو سحر سانکی بیر بیاض دون‌دا

نئجه سؤز اهلینی من حئیران ائتمه‌ییم، صائیب،

الینده‌کی بو قلم بیتمز هر نیستان‌دا

شاعر: صائب تبریزی

حلقه اولدوق قاپیسیندا

حلقه اولدوق قاپیسیندا یئنه مئیخانه لرین

بو حالیله یئتیشک وصلینه پئیمانه لرین

بیزخراباتا اوشاق واختی گلیب دؤشمه میشیک

کرپیچ اولدوق دیواریندا بو قدیم خانه لرین

دیلیمین خنجری عاشیقلری دوغرار گؤندوز

گئجه شمعیم یاخاجاق آتشه پروانه لرین

مشورتله آچیلیر سیرّی اگر دونیامیزین

من دئییم سنده چئویر تسبحینین دانه لرین

ایستریک تئز قوتارا صوحبتینی ایندی قلم

واقیف اوللوق حالینا سونرادا دیوانه لرین

خوابی غفلت آلاجاق آلسا بیزی آغوشونا

بیرجه آندا دؤشریک قوینونا افسانه لرین

او گوزللر ائله هوپموشدو بیزیم جانیمیزا

صائیب اولدوق مایاسی بیزده بو بوتخانه لرین

صائب تبریزی

هرزه سؤز سؤیله‌ینه

او آجی سئوزلره صبرائیله یرک دؤزدوم من

چون کمال اهلی اولان ناکام اولور سئزدیم من

هرزه سؤز سؤیله ینه یاخشی جواب سوسماقدیر

سوساراق های قوپاران هرزه دیلی اؤزدوم من

کاما چاتماق دیله یرسن ائلی چاتدیر کامینا

بونو گؤردوم هارا گئتدیم هارانی گزدیم من

اودیله سن مومو بیر یئرده نئجه ساخلایاسان؟

آتشیمله پولادی موم کیمی بیل ازدیم من

اونودوبلار سنی صائیب یادا سالماز کیمسه

دردیمی لعلیله داغ سینه سینه یازدیم من

صائب تبریزی

حجاب جسم را از پیش جان بردار ای ساقی

حجاب جسم را از پیش جان بردار ای ساقی

مرا مگذار زیر این کهن دیوار ای ساقی

به یک رطل گران بردار بار هستی از دوشم

من افتاده را مگذار زیر بار ای ساقی

به راهی می‌رود هر تاری از زلف حواس من

مرا شیرازه کن از موج می زنهار ای ساقی

چرا از غیرت مذهب بود کم غیرت مشرب؟

مرا در حلقه ی اهل ریا مگذار ای ساقی

چراغ طور در فانوس مستوری نمی‌گنجد

برون آور مرا از پرده ی پندار ای ساقی

شراب آشتی‌انگیز مشرب را به دور آور

بده تسبیح را پیوند با زنار ای ساقی

ادیب شرع می‌خواهد به زورم توبه فرماید

به حال خود من شوریده را مگذار ای ساقی

ز انصاف و مروت نیست در عهد تو روشنگر

زند آیینه ی من غوطه در زنگار ای ساقی

به شکر این که داری شیشه‌ها پر باده ی وحدت

به حال خویش صائب را چنین مگذار ای ساقی

صائب تبریزی

می‌کند یادش دل بیتاب و از خود می‌رود

می‌کند یادش دل بیتاب و از خود می‌رود

می‌برد نام شراب ناب و از خود می‌رود

هر که چون شبنم درین گلزار چشمی باز کرد

می‌شود از آتش گل آب و از خود می‌رود

از محیط آفرینش هر که سر زد چون حباب

می‌زند یک دور چون گرداب و از خود می‌رود

پای در گل ماندگان را قوت رفتار نیست

یاد دریا می‌کند سیلاب و از خود می‌رود

زاهد خشک از هوای جلوه ی مستانه‌اش

می‌کشد خمیازه چون محراب و از خود می‌رود

وصل نتواند عنان رفتن دل را گرفت

موج می‌غلتد به روی آب و از خود می‌رود

نیست این پروانه را سامان شمع افروختن

می‌کند نظاره ی مهتاب و از خود می‌رود

دست و پایی می‌زند هر کس درین دریا چو موج

بر امید گوهر نایاب و از خود می‌رود

بی‌شرابی نیست صائب را حجاب از بیخودی

جای صهبا می‌کشد خوناب و از خود می‌رود

صائب تبریزی