www.eldarmaku.blogfa.com

 وبلاگ  ادبی شخصی

www.eldarmaku.blogfa.com

مهدی همت زاده(ائلدار)
www.eldarmaku.blogfa.com  وبلاگ  ادبی شخصی

مهدی همت زاده ( ائلدار ماکو)نون حقینده یازیلان مطلب

مهدی همت زاده(( ائلدار)) تخلصلی ماکو شاعیری 1345 جی گونش ایلینده ماکونون آواجیق ماحالیندان پیراحمد کندینده دونیایا گوز آچیب . 4 ایل ابتدایی تحصیلاتینی دوغوم یئرینده اوخویوب و سونرا بازرگانا کوچوب و اورتا تحصیلاتینی بازرگاندا و دبیرستانی ماکوده باشا چاتدیریب. تاکی 1368 جی ایلده فوق دیپلم مدرکیله که خویون تربیت معلیمینده آلمیشدی آموزش و پرورش ماکوده معللیم چیلیقله دوموخلانیر . 1373 جی ایلده لیسانس و 1394 چی ایلده فوق لیسانس مدرکی آلیر . شعر یازماغا اورتا تحصیلات چاغی ماراغ گوستریر تا کی 1368 جی ایلده ماکو شهرینده آچیلان شعر و ادب درنه گینه عضو اولور و بو درنه گین ایلک عضولریندن بیری ساییلیر . ائلدار 1391/8/9 دا مدیر و وموسس اولاراق درنه گی ثبت ائتدیرمگه نایل اولوب و ایندی ایسه نئجه ایل دیر کی شعر و ادب یلدا درنه گینده باشچیلیق ائدیر. ائلدار گئرچکدن ده بیر گوجلو شاعیردیر بو ادعانی، اثرلری اثباتا یئتیریر. و هر هانسی موضوع کی گوتورور مهارتله اونون عهده سیندن گلماقی باجاریر و اثرلرینده چوخلو شعر صنعتی دویولور . بو شاعیریرن شعرلرینده اولقدر اینجه لیکلرله اوخویانی باش باشا گلیر کی، اینانماق اولماییر بو حقیقتنده شعر صنعتینی تانیمیش بیر شاعیردیر .آمما اوزوندن سوز آچاندا سویله ییب کی من شعر صنعتینی قایدالارینی اوخومادان فقط ایلهام کیمی بو صنعتلر و اینجه لیکلر منیم قلمیمده گورسه نیبلر .



تاريخ : پنجم مهر ۱۴۰۱ | 2:32 | نویسنده : مهدی همت زاده(ائلدار) |

بیلگی لر - یادداشلار


موضوعات مرتبط: بیلگی لر - یادداشلار
برچسب‌ها: کتاب , آنا توپراغیم , ج 1

تاريخ : بیست و ششم تیر ۱۳۹۲ | 14:5 | نویسنده : مهدی همت زاده(ائلدار) |

گرک اولسون

گرک اولسون

عشق اهلی نین احوالی ، پریشان گرک اولسون
دیوانه لیگی ، دیل لره دستان گرک اولسون

چوخلاری بو مکتب ده ، الفباده ، قالیب لار
درس آلماقا ، بو عرصه ده ، ایمان گرک اولسون

عاشق اولانین ، الده کی سرمایه سی، جان دیر
جان نقدینه، البته کی ، جانان گرک اولسون

عشقین گوزو ،کور اولسا، گوزللیک ندی بیلمز
عاشق اولان، اول یوسف کنعان ، گرک اولسون

هر گل ده گوزللیک وار ،اگر یاخشی باخیلسا
گول مشتریسی ،بولبول نالان گرک اولسون

عشق اهلینی ، زنجیره چکیب باغلیان عنوان
اوز باغلادیقی ،عهدیله پیمان گرک اولسون

افسانه دئییب، گئچمه کناریندان عزیزیم
بو خلقته باعث ده، بو عنوان گرک اولسون

قربان دئدیگین ، کعبه ده ، بیر سیمگه دیر عشقه
معشوقه چاتان نقطه ده، قربان گرک اولسون

(ائلدار) ، وطنی سئچدی ، گوزللر آراسیندان
شوقیله بو سئوداده ، غزل خوان گرک اولسون

مهدی همت زاده( ائلدار ماکو )



تاريخ : بیست و یکم مهر ۱۴۰۱ | 0:53 | نویسنده : مهدی همت زاده(ائلدار) |

چیخاق گئدک

چیخاق گئدک

یاپیش الیمدن آی گوزل، بو شهردن چیخاق گئدک
دوشک یولا یاواش یاواش، دووارلاری ییخاق گئدک
نه سن دانیش، نه من دینیم، چیخاق بو توزلو شهردن
بو شهردن حلاللاشاق ، توتوب الین سیخاق گئدک
بو شهردن چیخاق گئدک

یاپیش الیمدن آی گوزل، یورولموشام بو شهردن
نه بیر قوهوم نه وار تانیش، نه قالدی بیر گلیب گئدن
هامی سویوق باخیر بیزه، اوزوم ده بیلمیرم ندن
بیزه سویوق باخانلارین، اوره کلرین یاخاق گئدک
بو شهردن چیخاق گئدک

بو شهرده محبتین ، بیر آز عیاری ، قالمادی
صداقت آختارانلارا، بیر اعتباری ، قالمادی
گووندیگیم بو داغلارین، باشیندا قاری قالمادی
او داغ سنین بو داغ منیم، سولار کیمی آخاق گئدک
بو شهردن چیخاق گئدک

سیاه تئلین آغارمامیش، بویانمامیش بیاض قارا
قالان بئش اون گون عشقینه ، دوراق گئدک اوزاق لارا
سنین درین باخیشلارین، کفایت ائیلر (ائلدارا )
گولن لره گولومسویک، باخانلارا باخاق گئدک
بو شهردن چیخاق گئدک

مهدی همت زاده ( ائلدار ماکو )



تاريخ : پانزدهم مهر ۱۴۰۱ | 12:20 | نویسنده : مهدی همت زاده(ائلدار) |

اسناد دوزگونون دنیادان کوچمه سی مناسبتینده بداهه شعر

دوزگونو الدن وئردیک

حاییف اولسون کی بو گون ، دوزگونو الدن وئردیک
دوز لوگو گورسه دن اول ، گوزگونو الدن وئردیک

بولود آردیندا قالان ، آی ، باشینا قاره سالیب
آغلاییر صبحه کیمین ، وای ، گونو الدن وئردیک

بو بیزیم خالقیمیزا ، داغدان آغیر ضایعه دی
نئجه کی شهریاری ، سورگونو الدن وئردیک

قویمادی چرخ بیزیم، گوز یاشیمیز بیر قورویا
سانکی بیر لیلی یه ، مین مجنونو الدن وئردیک

عومرونون بیر گونو، یوز گونله برابردی بیزه
بیز بو گون تکرار اولان، یوز گونو الدن وئردیک

ائلدارین یازدیقی سوز ، خالقینا باش ساغیلیقی دی
حاییف اولسون کی بوگون، دوزگونو الدن وئردیک

مهدی همت زاده (ائلدار ماکو ) ۳/۶/۱۴۰۱
**
دوزگون ، مرحوم دکتر حسین محمدزاده
صدیق
سورگون، مرحوم شاعر حبیب ساهر



تاريخ : پنجم مهر ۱۴۰۱ | 12:43 | نویسنده : مهدی همت زاده(ائلدار) |

انجمن شعر و ادب اسمعیل یلدا

ماکو شهرک ولیعصر -کتابخانه ولیعصر ماکو

مشخصات ثبتی شرکت

  • شناسه نوع ثبت موسسه
  • تاریخ ثبت2012-10-30
  • بازدیدها32
  • آدرسماکو شهرک ولیعصر -کتابخانه ولیعصر ماکو
  • کد پستی1111111111
  • اداره کلاداره کل ثبت اسناد و املاک استان آذربایجان غربی
  • وضعیت فعال

اطلاعات تماس

  • شناسه ملی14002952648
  • گروه تولید و صنایع
  • استان2
  • شهر97


تاريخ : پنجم مهر ۱۴۰۱ | 11:59 | نویسنده : مهدی همت زاده(ائلدار) |

عناوین انجمن های شناسنامه دار استان آذربایجان غربی

#نام انجمناقدام کنندهاستانشهرستانتاریخ صدور شناسه
۴۳بوکانسلیمان ابراهیم‌زادەآذربایجان‌غربیبوکان۱۴۰۰/۰۲/۲۵
۴۲سه ر ده مصالح صالح‌زادهآذربایجان‌غربیسردشت۱۴۰۰/۰۲/۲۵
۴۱سرای ادب وفاییامیر عزیزانآذربایجان‌غربیمهاباد۱۳۹۹/۱۱/۱۲
۴۰چاردولیزاهده قلندر محمودجقآذربایجان‌غربیشاهین‌دژ۱۳۹۹/۱۱/۱۱
۳۹پرسیعقوب خضریآذربایجان‌غربیمهاباد۱۳۹۹/۱۱/۱۱
۳۸مکریان مهابادعلی عبدالیآذربایجان‌غربیمهاباد۱۳۹۹/۱۱/۱۱
۳۷دیالوگمریم پرویزنیاآذربایجان‌غربیمهاباد۱۳۹۹/۱۱/۱۱
۳۶کاژهغفور پیرزادهآذربایجان‌غربیمهاباد۱۳۹۸/۱۱/۲۶
۳۵شعروادب شاهین‌دژرسول پژوهیدهآذربایجان‌غربیشاهین‌دژ۱۳۹۸/۱۱/۰۷
۳۴الفشریف موسویآذربایجان‌غربیمیاندوآب۱۳۹۸/۱۱/۰۷
۳۳دیالوگ و اندیشهزهرا ستاوندآذربایجان‌غربیمهاباد۱۳۹۸/۱۱/۰۷
۳۲جلال آل احمدجواد خدادادیانآذربایجان‌غربیمیاندوآب۱۳۹۸/۱۰/۲۴
۳۱نسیمیصمصام محمدوشآذربایجان‌غربیمیاندوآب۱۳۹۸/۱۰/۱۷
۳۰حکیم خیامامیر امجدیآذربایجان‌غربیمیاندوآب۱۳۹۸/۱۰/۱۷
۲۹فریاد قلمکرمعلی مرادیآذربایجان‌غربیمیاندوآب۱۳۹۸/۱۰/۱۷
۲۸حکیم نظامیجمشید داس زرینآذربایجان‌غربیمیاندوآب۱۳۹۸/۱۰/۱۷
۲۷شهریار میاندوآبعوض احمدیآذربایجان‌غربیمیاندوآب۱۳۹۸/۱۰/۰۲
۲۶قانلی شفقصمد تقی‌زاده یالقوزآغاجیآذربایجان‌غربیسلماس۱۳۹۸/۰۹/۱۸
۲۵ثقلیناکبر بیضائیآذربایجان‌غربیارومیه۱۳۹۸/۰۹/۱۸
۲۴انجمن شعر و ادب یلدامهدی همت‌زاده (ائلدار ماکو)آذربایجان‌غربیماکو۱۳۹۸/۰۸/۲۲
۲۳سره از ناسرهمحسن کاويان‌پورآذربایجان‌غربیارومیه۱۳۹۸/۰۸/۲۲
۲۲یاشیل یارپاقعدالت حاجی‌زاده درزه کنانیآذربایجان‌غربیسلماس۱۳۹۸/۰۸/۱۱
۲۱شعر و داستان سیمرغ چالدرانکبری شریف‌زادگانآذربایجان‌غربیچالدران۱۳۹۸/۰۷/۲۲
۲۰منهاجامید شمس آذرآذربایجان‌غربیسلماس۱۳۹۸/۰۶/۳۰
۱۹کوهسار سلماسسام رنجبر دله‌زیآذربایجان‌غربیسلماس۱۳۹۸/۰۵/۲۷
۱۸شعر آزاد ارومیهزهرا کریم‌زاده‌گانآذربایجان‌غربیارومیه۱۳۹۸/۰۵/۲۷
۱۷دانش خویگیو قهرمان‌زادهآذربایجان‌غربیخوی۱۳۹۸/۰۳/۲۰
۱۶گویندگان آکسانآرمان صفرزادهآذربایجان‌غربیارومیه۱۳۹۸/۰۱/۱۹
۱۵یاس کبودمجید قلعه بیکی‌پورآذربایجان‌غربیخوی۱۳۹۷/۱۲/۰۷
۱۴ادبیات داستانی سفیرژیلا مرادیآذربایجان‌غربیارومیه۱۳۹۷/۱۱/۲۸
۱۳نگاه مللصداقت صادق‌زادهآذربایجان‌غربیارومیه۱۳۹۷/۱۱/۲۸
۱۲باران سخن نقدهکمال راموزآذربایجان‌غربینقده۱۳۹۷/۰۸/۲۳
۱۱آداوحید طلعتآذربایجان‌غربیارومیه۱۳۹۷/۰۶/۰۶
۱۰دورهمی ادبیات ارومیهرضا خسرویآذربایجان‌غربیارومیه۱۳۹۷/۰۶/۰۵
۹مترجمین زبان نوفاطمه آریاییآذربایجان‌غربیارومیه۱۳۹۷/۰۵/۲۴
۸نون والقلمناهیده سلطانیآذربایجان‌غربیارومیه۱۳۹۷/۰۵/۰۸
۷نارکاوه مهدی‌زادهآذربایجان‌غربیمیاندوآب۱۳۹۷/۰۵/۰۳
۶کلک خیالفرزانه ولی‌زادهآذربایجان‌غربیارومیه۱۳۹۷/۰۴/۲۵
۵طلیعه فرهنگ سولدوزغلامرضا جعفریآذربایجان‌غربینقده۱۳۹۷/۰۴/۲۰
۴نیمتاج سلماسیخدیجه آزادبینآذربایجان‌غربیسلماس۱۳۹۷/۰۴/۰۳
۳تحکیهفاطمه میرحسن‌پور واحدیآذربایجان‌غربیارومیه۱۳۹۷/۰۴/۰۳
۲تشنه‌رودمحمد میلان‌لکآذربایجان‌غربیارومیه۱۳۹۷/۰۴/۰۳
۱ادبیات داستانی روایتعلی رزم‌آرای ایرانقآذربایجان‌غربیارومیه۱۳۹۷/۰۴/۰۳


تاريخ : پنجم مهر ۱۴۰۱ | 1:44 | نویسنده : مهدی همت زاده(ائلدار) |

آپار منی ناغیل لارا

آپار منی ناغیللارا !

خیال قوشوم اوچور یئنه ،
اوُیود دولو ، ناغیللارا !
آغیللیلار چاتانمادی ،
ناغیل وئره ن آغیل لارا ،
آپار منی ناغیللارا !

زامان ، سولار کیمی آخیر ،
آخیب ، اوره کلری یاخیر ،
بیری یئییُر ،بیری باخیر ،
الیم کَسیک ، اوزوم قارا ،
آپار منی ناغیللارا !

نه چاره وار ،نه ده: دوُزوم ،
بو ایشده قالمیشام اوُزوم ،
بودور منیم اوره ک سوزوم ،
دئدیم دومانلی یوللارا:
آپار منی ناغیللارا !

کئچیب اوشاقلیق ایللریم ُ
صولوبدو ایندی گوللریم ،
هانی ناغیللی ائللریم ؟ ،
خیال منی چکیر دارا...
آپار منی ناغیللارا !

صولوبدو: باغچانین گولو ،
سوسوبدو: غملی بولبولو ،
نه قورد قالیب نه شنگولو ،
توتاق دوشوب بیر آز: آرا،
آپار منی ناغیللارا !

هانی ائلیم، هانی اوبام ؟
هایاندادی اودون سوبام ؟
دایی-م، عمی-م، بوُیوک بابا-م ؟
حیات اولوبدو :پول پارا ،
آپار منی ناغیللارا !

ناغیل دئیه نده ، خان نَنه -م ،
اوجاق باشیندا هه ل له نَم ،
چیراق سوُنن کیمی سوُنَم ،
یازام ، ائل اوغلو" ائلدار "ا ،
آپار منی ناغیللارا !

م . ه . ائلدار ماکو



تاريخ : بیست و پنجم شهریور ۱۴۰۱ | 11:54 | نویسنده : مهدی همت زاده(ائلدار) |

مرحوم عاشیق محمد حسین زاده

بسم الله الرحمن الرحیم

ائل صنعتکاری عاشیق محمد حسین زاده بازرگانی

دوغما یوردوموز آذربایجانین علم ، هنر ، صنعت، ادبیات و دیگر ساحه لرینده ، تاریخیمیزین قیزیل صحیفه لرینه ایز سالان چوخلو اولو شخصیت لری اولوب و اونلارین آدلاری دیلدن دیله و سوزلری سینه دن سینه یه یایلیب ها بئله گوزل گوزل سوزلر – شعرلر و اثرلر ، هنر پرور انسانلارین روحونو اوخشایاراق اوره کلرده کوک سالیب و ابدی قالمیشدی . اونلارین ایچیندن دولَلو مصطفی ، توفارقانلی عابباس ، خسته قاسم ، عاشیق علعسگر ، شاعیر فیضولی و شهریاردان آد آپارماق اولار . بئلنچی استاکار شخصیتلرین سایی چوخ اولدوغوندان آسیلی اولاراق بیر تعدادنین آدی خاطیره لردن سیلینیب دی آدی قالانلارین بیر چوخونون کیم لیگی گئت گئده یاددان چیخماقدادیر . بو سایاق انسانلارین کیم اولدغونو و اثرلرینی آراماق هر بیر آذربایجانلی نین وظیفه بورجودور .

عصریمیزین بو دورونون هنر استالاریندان بیری عاشیق محمد عزیز اوغلوحسین زاده دیر کی 1311 –گونش ایلینده ماکونون 20 کیلومتره لیگینده اولان بازرگان دا دنیایا گوز آچیب و 1376 – گونش ایلینده بو دنیادان وفات ائدیبدی . گنج یاشیندان عاشیقلیقا باشلییب ائل ائل دولانان و طوی مجلسلرینی سازیلن و سوزیلن شنلندیرن بو عاشیقین اوره کلره یاتان حزین سسی و کونوللری اوخشویان ساز هاوالاری ، اشیدنلره هر یئرده اوز درین تاثیرینی باغشلییب دیر .

اونون زخمه لری تئللرده گزدیرن سحیرلی بارماقلاری ، سازی نین تئلینی اوخشادیقجا – قلبی نین درین لیگیندن چیخان سسی ، ساز هاواسیلا قاریشدیقجا ، اونون زنگین احساسی و دویغوسو انسانلارین روحونو و احساسینی طوفانلی دنیزلرکیمی دالغالاندریب دیر.

تحصیلات گورموین بو عاشیق ائشیتدیگیمیزه گوره استاد عاشیق نجف قره تپه لی دن عاشیقلیق بیلگی سی آلیب و اوزونه عاید قوشمالاری و شعر لری اولوبدور . عاشیق محمد ائلینه لایق بیر عاشیق اولوب و ائل ایچینده یاشیبدیر الله اونا رحمت ائله سین . (متنی یازان : مهدی همت زاده – ائلدار ، ماکو )

عاشیق محمدین مزار داشینا حک اولموش بیر شعری ، نیمه شعبان مناسبتینه گوره

نیمه شعبان گونو دو امام زمان دی گلن

اسلام پرچمین قوزویان آخرین امام دی گلن

یئرین گویون لنگریدی عالملرین سروریدی

قرآن اونون ازبری دی ناطق قرآن دی گلن

قدم قویدو بو دنیایه باشیمیزا سالدی سایه

جانیم قربان او مولایه امام زمان دی گلن

اون دورد لاله نین بیری دی مومن کیشی لرین پری دی

اسلامین تاج سری دی امام زمان دی گلن

الینده ذولفقار دوران دنیانی نورلا دولدوران

علی کیمی قلیج ووران امام زمان دی گلن

عالیملره فرمان وئره ن مسکین لره درمان وئره ن

قرآن یولوندا جان وئره ن امام زمان دی گلن

یولونو گوزلویور هامی سربلند ائدیب اسلامی

مبارک دی بو بایرامی امام زمان دی گلن

رویادا گورموشدوم اونو گوزل دی عباسی دونو

(حسین زاده ) سوزون سونو امام زمان دی گلن


موضوعات مرتبط: بیلگی لر - یادداشلار

تاريخ : هفتم تیر ۱۳۹۵ | 12:36 | نویسنده : مهدی همت زاده(ائلدار) |

شعر

گونش دوغاجاقدیر وارلیقیمیزدان

سحر آچیلاجاق اوزلر گوله جک

اوموتلو گونلرین آیدین لیقین دا

کلمه لر بیرلشیب سوزلر گوله جک

-------------------------------------

اریینده اوجا داغلارین قاری

سیل اولوب آخاجاق دوزلره ساری

یوردوموز گوره جک گوللو باهاری

دره لر تپه لر دوزلر گوله جک

------------------------------------

قالخاجاق داغلارین دومانی چنی

شادلیق بورویه جک شانلی وطنی

گزیب دولانان دا چولو چمنی

کونول لر گوله جک گوزلر گوله جک

--------------------------------------

گل چیچک عطرینی یایاجاق چوله 

دورنالار سوروسو گله جک جوله

بوللوق مژده سینی وئره جک ائله

شنلیک قورولاجاق سازلار گوله جک

---------------------------------------

بلبل اوخویاجاق سئوگی باغیندا

گلیب اگلشه جک گول بوتاغیندا

(ائلدار)، بو باهارین اوغلان چاغیندا

خیالدا کوک سالان ایزلر گوله جک

----------------------------------------

سلام مهدی بئی اللروارسنین بوگونئش دوغوموشعرین حقیقتامنی دویغولاندیردی ادای
دین برحسب وظیفه ایسته دیم بیرنظیره یازام انشاءالله کی بئیئنمیش اولاسیز:

.......................................(گونئش دوغاجاق)......................................
هاچان ائلــــــداردوغاجاقدیربوگــــــونئش......آچاجاق سحریمیــــــزائللرگوله جئــــــک
اومـــــــودوباغلی یاخ گئلئن گـــــــــونلره......ائل اوبــــابیرله شیب تئللرگوله جئــــــک
داغلارین قـــــــارلاری دُون بوزدوهلــــــه
اری یئن دئییــــــل بوقــــاردئیین ائلــــــه
اینانمایین چــــــوله بیرده سئل گئلـــــه
............................................نه زامان سئل گئلیب چوللرگوله جئـــک
گوله ک چـــــــوللرله برابــــــرداغــــــلارا
یاراداخ شادلیقـــــــی یاشیل باغـــــلارا
نفس سالاخ شیرین شیرین چاغـــــلارا
............................................آجیــــــلارآتیلیب دئیللــــــرگوله جئــــــک
گول چیچه ک واختی ائله بیل ساویلیب
قاطــــــارقاطــــــاردورناجولـــدن قاویلیب
خیلقتیــــــن غم یوکـــــــوغملـــه آویلیب
.............................................یاغیش یاغاجاقدی چوللرگوله جئــــــک
(مسعودون)قلبیندن کئچئن بیرســــوزلر
قورومــــــازبیرداهی آغلــی یان گــــوزلر
گولمه ریک گولمــــویه کئدرلی ئــــــوزلر
..............................................نه قدرگوزلــــــویئک گوللرگوله جئــــــک


موضوعات مرتبط: شعر

تاريخ : پنجم فروردین ۱۳۹۵ | 23:37 | نویسنده : مهدی همت زاده(ائلدار) |

قارداشلار

بوگوزل یوردوموزون شوکتی وار قارداشلار

ائل ایچینده شانی وار، شهرتی وار، قارداشلار

گل چیچکدن بزه نیپ دیر چولوموز کوشنی میز

بورا جنّت دی دئسم ، علّتی وار قارداشلار

وارلیقی سایماقا گلمز، باغی وار بستانی وار

سویو بول توپراغی بول ، ثروتی وار قارداشلار

یام یاشیل دوزلری حیرتده قویور هر گوره نی

قوجامان داغلاری نین هیبتی وار قارداشلار

آتالاردان بیزه گنجینه کیمی ارث قالان

دیلی نین داغدان آغیر قیمتی وار قارداشلار

آنالار لایلاسی دی ماهنی سی شعری غزلی

سینه لرده سوزو وار صحبتی وار قارداشلار

بیر فیکیر وئر دئییلن سوزلری نین آنلامینا

سوزلری بال کیمی دیر لذّتی وار قارداشلار

آنا دیلده یازی یاز صحبت ائله بیلسین لر

نه قده ر خالقیمیزین غیرتی وار قارداشلار

هره نین اوز ائلی اوز یوردو گوزل دیر اوزونه

(ائلدارین ) دا ائلینه حورمتی وار قارداشلار



تاريخ : سی ام بهمن ۱۳۹۳ | 20:20 | نویسنده : مهدی همت زاده(ائلدار) |

شعر (بیر آندا )

بیر آندا

گلیب گئچدین کناریمدان  گئنه مستانه ، بیر آندا

یخیب کونلوم ائوین قویدون نئجه ویرانه ، بیر آندا

ائله بی اعتنا گئچدین  گورن لر قالدی حیرت ده

منی بی اعتبار ائتدین سن ای جانانه ، بیر آندا

حلال اولسون سنه خوشگون حرامیم اولدو سایَنده

دئدیم انصاف ائله سالما منی هجرانه ، بیر آندا

وجودین شمعی دورینده کول اولماقدیر منیم قصدیم

بو سودای محبت دیر یانیر پروانه ، بیر آندا

اوزون گورمک امیدیله یورولدوم یولدا دورماقدان

سنین هجرینده کاشانم اولور غمخانه ، بیر آندا

داغیلمیش زولفویون نقشی خیالیمدان گئچیر هردن

سبب سیز سانمایین گلسم اگر افغانه ، بیر آندا

 اینانمیشدیم سنه آنجاق صونوندا بی وفا چیخدین

خلیل الله تک آتدین ، منی نیرانه ، بیر آندا

منی سن سیز ، سنی من سیز تصور ائتمک اولمازدی

بو سرری بیلمه دیم اولدون نییه بیگانه ؟، بیر آندا

خوشام اول باخماقیندان کیم رقیبی یاندریب یاخدین

بیزیم (ائلداری ده)ائتدین ده لی دیوانه ، بیر آندا

مهدی همت زاده (ائلدار ) ماکو



تاريخ : سیزدهم دی ۱۳۹۳ | 15:43 | نویسنده : مهدی همت زاده(ائلدار) |

شعر (وصف آواجیق)

بو غزل حورمتلی دوستوم و شاعر قارداشیم آقای دکتر پیمان یارمحمدزاده جنابلارینا عاید دیر  

آواجیق وصفی  

هر کس ایستر گوره جنت باغی نین منظره سین

یای زمانیندا دولانسین آواجیق منطقه سین

اللها شکر ایده جکدیر بیلیرم گورسه اگر

صوفعلی گمرکینی یاکی کریمخان دره سین

قارلی داغلاره باخان قدرت معماری گورَر

هاموسینداندا وقارلی قوجامان قورد تپه سین

سولاریندان نه دییم وصفینه عاجزدی دیلیم

زی سویون یا کی عرب دیزجی نین شرشره سین

گوز دولاندیقجا چمن لیقدی یاشیل کوینگیلن

سویرم مال داوارین آت قوزو اوغلاخ هوسین

واردی بیر گمرکی امَا قاپوسین باغلادیلار

اولاریکه اشیدیب یاخشی بیلیر همهمه سین

ملَتیندن نه دییم قلبلری آینه دی

آذری خالقینین الله بینوب عایله سین

شهریمیز شهر شهیداندی اونون خاطرینه

ساخلاریق ان اوجا یرده اولارین خاطره سین

اردبیل اورمیه تبریز بیزه هیچ فرق ایلمز

   اصل اودور حس ایلیاق آذربایجان نفسین                   

  وطنیم شانلی دیاریم سنه (پیمان )ویریرم

تا جانیم وار یاشادام بایراغوین منظره سین  

شاعر : دکتر پیمان یارمحمدزاده

آواجیق - منطقه سرسبز و خوش آب و هوا در جوار ماکو و از نظر تقسیمات کشوری از توابع شهرستان چالدران  

گمرک صوفعلی - گمرکی تاریخی در این منطقه که در روستای صوفعلی واقع است  

زی سو نام چشمه ای که در روستای طهماسب کندی قرار دارد و آب معدنی این چشمه برای دفع سنگ کلیه بسیار نافع است  

قورد تپه سی نام کوهی واقع در شهر آواجیق  

عرب دیزجی - روستایی در منطقه آواجیق  

شُرشُر - نام آبشاری واقع در روستای عرب دیزج  

کریمخان دره سی - درَه ای سرسبز و دیدنی در آواجیق   

 

 



تاريخ : نهم آذر ۱۳۹۳ | 21:5 | نویسنده : مهدی همت زاده(ائلدار) |

شعری از استاد اصغری

منبع : وبلاگ ادبی استاد بزرگوار اصغری


شعری یاز کی شعرا    ایچره  گوزل آد  اولاجاق
اهل ذوقه نه  گوزل   انس وگوزل    داد اولاجاق

 

خیمه ی شعره نه یل  رخنه نه سیل  لطمه ویرار

تا جهــان   وار  او گوزل     خیمه ده  آباد اولاجاق

 

هر گوزل کی بو جهان دا   گورونوب  یا  گورونور

اونلارین وصفی ده اشعاریله خوش     یاداولاجاق

 

اولمــاسا   شاعــر شــیرین  غزلیــن    شـعـــرلری

کیم دئیر  محبــــس  غمدن      اوره ک  آزاد اولاجاق

 

یاز  گوزل شــعر عزیـــز(( مـهـدی همت زاده))

اهلینه  شـعر یتیشسه  اوره گی شاد اولاجاق

 

اوگوزل شعری که هر   بندی ده بیر گنج یاتوب

گوندریبسن بیزه احسن که  گوزل    یاد اولاجاق

 

گنه ده  یازکی  یازان      لذت شـــعری    داداجاق

اوخــویاندا  اوخودوقجـا   اولاری      شاد اولاجاق

 

بیــرده   یاز    شـعری  (( محرم بابا زاده )) آدینا

شـعروی گورسـه اوشیریـن سوزه فرهاد اولاجاق

 

اصغری وئر غزلین     رشته سین    استاد الینه

هر کیمین   ذ و قی اولا   شعرده   استاد اولاجاق



تاريخ : بیست و دوم مهر ۱۳۹۳ | 19:26 | نویسنده : مهدی همت زاده(ائلدار) |

حورمتلی دوستلار و عزیز قلمداشلار یئنی بیر ویلاگ (معرفی اشعار و آثار استاد حامد ماکویی ) عنوانیندا آچمیشام لطفا" بو وبلاگا باش وورون و نظرلریزی یازین انشالله بئله لیکله بو بزرگوار شاعرین حقینده آرتیق بیلگی لنمیش اولاق . منت دارام سیزه. hamidmakuy.blogfa.com  - آدرس وبلاگ

 

 



تاريخ : سی و یکم شهریور ۱۳۹۳ | 9:41 | نویسنده : مهدی همت زاده(ائلدار) |

شعر

نه گوزل گور یاراشیر، تارزنین تار الینه

ائله بیل زولفون آلیب ، یار وفادار الینه

اوخشادقجا تئلی مضرابیله ، غملر داغیلیر

مین اورک باغلیدی بیر نقطه ده انگار الینه

بیزیم آذر ائلی نین به بهی ماشاللاهی وار

گوه نیر اوز وارینا قوربان اولوم وار الینه

اهل حال اولسا بیلر ، موسیقی نین قیمتینی

حرمتین ساخلار اگر دوشسه خریدار الینه

زخمه لر غم داغیدیر آفرین اولسون ائلیمین

شعرینه ، صنعتینه ، جمله صنعتکار الینه

عشق دیوانه سی نین همدمی دیر موسیقی میز

تارا ، نا محرمی قویما ، آلا زینهار الینه

بو ائلین اوز هنری اوز سازی اوز عادتی وار

وئرمه یین سیز بئله گنجینه نی اغیار الینه

سوزو سوز اهلینه توشور سازی وئر ساز چالانا

ائلین ، ائلدارلیقینی ، وئربیزیم (ائلدار) الینه



تاريخ : هفتم شهریور ۱۳۹۳ | 17:20 | نویسنده : مهدی همت زاده(ائلدار) |

شعر (معلم)

اویره تمن لرگونو مبارک اولسون 

                       معلم

 

هله ده ذهنمین یادداشلارین دا

                    شیرین خاطره لر آراسینداسان

هله ده دنیاما افق دان باخان

                  شافاق اولدوزونون سیراسینداسان

سودالی کونلومون درین لیگینده

                   ایزسالیب یاشاییر یاشادیر منی

هر زامان هر یئرده اوز صحبتیمده

                   یادیما سالمیشام ، اونوتمام سنی

درین محبتین بیر اجاق کیمی

                  قیشی می باهارا یایا دونده ریب

قارانلیق گئجه ده بیر کلمه سوزون

                  اوزومو گونشه آیا دونده ریب

حیات دگیشسه ده یئر کوره سینده

              سن یاشیاجاقسان اولومسوزسن سن

گئچمیش لر سایاقی گله جکده ده

                بیر سن قالاجاقسان بیرده کی وطن

اول ده آنامین لای لای سسینه

                   کورپه کن آچیلسا صحبته دیلیم

(ائلدارین ) بیر داها آچدین دیلینی

                    اوخویوب یازماقا ای معلمیم

                                   مهدی همت زاده (ائلدار)   



تاريخ : ششم اردیبهشت ۱۳۹۳ | 0:31 | نویسنده : مهدی همت زاده(ائلدار) |

شعر (سن سیز)

  سن سیز

گونلر گئچیر ای شوخ عجب نافیله سن سیز

بوندان بئله ظنَ ائتمه کی کونلوم گوله سن سیز

هر جوریوه دوزدوم ، بودوزوم دایره سینده

دوشدوم ائل ایچینده گئنه دیلدن دیله سن سیز

دنیاده حیاتین منه یورقونلوقو قالدی

هر لحظه برابردیر اینان بیر ایله سن سیز

آه ائتمه دیگیم بیر گونوم اولمور ،اوسبب دن

بوغمده گوزوم یاشی دونوبدور سئله سن سیز 

همدم دی منه خاطره لر بیرده سه تاریم

هردن توکورم دردیمی تئلدن تئله سن سیز

بو عصر ده مجنونه سایاق گونلریم اولدو

مجنون کیمی دوشدوم گئنه چولدن چوله سن سیز

بوش وعده لره ساده لیگیمدن من ایناندیم

قالدیم بو معمَاده عجب موشکوله سن سیز

من ایندی ده اوز عهدیمه پیمانیمه بندم

سندن صورا میل ائتمه میشم بیر گوله سن سیز

بیر عمردو حسرت یوکو آلتیندا یورولدوم

یاندیم غم هجرانیوه دوندوم کوله سن سیز

دنیانی دئمیشلر کی مکافات عمل دی

بیر گون گئچرالبته قالان قافیله سن سیز

(ائلداری) سالیب دردسره درد فراقین

           افسوس گئچن گونلری دوشمور اله سن سیز                                      18/1/1393 مهدی همت زاده (ائلدار) - ماکو



تاريخ : هجدهم فروردین ۱۳۹۳ | 19:11 | نویسنده : مهدی همت زاده(ائلدار) |

تضمین

                                          تضمین        

  نازنین باشدا اولا نازین اتک دن سوزوری      سوز لبیندن دئیه سن بالدی پتک دن سوزوری                                                                                             «انزاب»   

دلبرین عشق تمنّاسی ، دیلک دن سوزولور

یئل قاتان زولفو داغیلدیقجا لچک دن سوزولور

زروزیوردی سوزو سنگ محک دن سوزولور

«نازنین باشدا اولان نازین اتک دن سوزولور »

«سوز لبیندن دئیه سن بالدی پتک دن سوزولور» ...................................................

یایلیقی باشدان آچان یئرده اولایدیم قوناغین

اوخویایدیم سنه من اوردا ، محبّت وراغین

حسرتیم قالماز اگر بیرده گورم گنج چاغین

«ساچینی یئل داغیداندا گورونور گل یاناغین»

سانکی آی هاله تک نور فلک دن سوزولور» ................................................

من اوره ک باغلامیشام آذربایجان ائلینه

شاُنینه شهرتینه سئومه لی شیرین دیلینه

سوزولن سورمه لی گوزلر یاراشیق دیرگلینه

«نازیلان سن نه زمان شانه چکنده تئلینه »

کونلومون ناله سی اول اینجه بیلک دن سوزولور» ................................................

حسنی حیرت ده قویوب دهرده شمس و قمری

یاراشیر قامتینه بئل ده گوموش دن کمری

او باخیشلان گنه بو کونلومه ووردون شرری

«اوتانارکن اوتوران دا اوزونه شرم تری »

«گوز دئییر بسکی نارین دردی الک دن سوزولور» ...................................................

قار یاغاندا یاغار اوّل اوجا داغلار باشینا

دن دوشوپدورگورورم ساچلارا کیپریک قاشینا

اویوب آلدانما دئدیم سن بو یولون یولداشینا

«غصه دن گوزلرین اول دم کی دولور گوز یاشینا»

کیپریگین دن دیه سن اینجی ایپک دن سوزولور » ................................................     

گئجه نی صبحه کیمی گوزلری میز قالدی اویاخ

یاشادیق گونلری گئچمیش ده سراسر بو سایاخ

سحر آخشام سیز اولانماز ، گئجه دی صبحه دایاخ

«عاشقین مهرینی گور طاقت معشوقیه باخ »

«شمع یاندیقجا سیزیلتی کپنک دن سوزولور » ..............................................

نه اولار دوز اولاسان عهدیله پیمانین دا

منی مهمان ائده سن بیر گئجه لیک یانیندا

داغیلا غصّه لریم زلف پریشانین دا

«شمع تک من یانیرام آتش هجرانین دا »

قطره قطره جانیمین یاغی اوره کدن سوزولور » ............................................

اوزونه باخماقیلان تر یاناقین دا دوزولر

ساللانار قاش قاباقی غنچه دوداقلار بوزولر

(ائلدارین) حسرتی آرتار الی یاردان اوزولر

«گورموشوق چوخ یورولان خسته دوشن گوز سوزولر»

«انزابین گوزلری ده شعر دئمک دن سوزولور » ..................................................

                                                             مهدی همت زاده (ائلدارماکو)  



تاريخ : نهم فروردین ۱۳۹۳ | 16:9 | نویسنده : مهدی همت زاده(ائلدار) |

شعر(ای یار)

                     اي يار

  ياز گلدي گؤزل يوردوما داغلاردا ارير قار

بايرام نفسي ائتدي ياتان غنچه‏ ني بيدار

 بولبوللر اوخور تازه‏ لنير وعده‏ ي ديدار

باخ گؤر نه گؤزل پرده چكيب كؤوشنه گولزار

 گؤيلرده گزركن اولورام يئرده گرفتار

بير گوللو باهاردا سني من سئوميشم اي يار

---------------------------------------------

 بیر عمر سنين حسرت هجرانيوه دؤزدوم

سينديرديغين اوْل عهد ايله پيمانيوه دؤزدوم

 بيهوده يئره بير قورو عنوانيوه دؤزدوم

حوسنون ساياراق عيبيوه نقصانيوه دؤزدوم

 اولدوم گئنه هر جؤوريوه شوق ايله خريدار

بير گوللو باهاردا سني من سئوميشم اي يار

 ------------------------------------------

 عاشق اولانين بلكه حياتي هدر ايميش

سئودا چكنين هر گونو محنت كدر ايميش

 مجنون او سببدن بير عؤمور دربه‏ در ايميش

شايد بو دا تقدير قضا و قدر ايميش

 گولشنده آچان گوللره همدم يارانيب خار

بير گوللو باهاردا سني من سئوميشم اي يار

 --------------------------------------------

 كوسمك گؤزليم سن كيمي جانانه ياراشماز

غم شانه‏ سي، گيسوي پريشانه ياراشماز

 تدبير خطا، يوسف كنعانه ياراشماز

باور ائله، هر كنج لبه، دانه ياراشماز

 ايسترسن اينانما سؤزومه، ائتگيلن انكار

بير گوللو باهاردا سني من سئوميشم اي يار

 -------------------------------------------

 كون ايله مكاني يارادان خاليق عالم

كامل ياراديب سنده كمالاتي مسلّم

 تدبير سنيندير هله ده اؤل دئسن اؤللم

انصاف ائله باري بو قدر ائيله ‏مه چم-خم

 ال چك بو ادادن گؤزليم، اولما دل‏ آزار

بير گوللو باهاردا سني من سئوميشم اي يار

 -------------------------------------------

 گر اولمايا عشقين آدينا دهرده بير زاد

نه مجنون اولاردي نده شيرين‏ ايله فرهاد

 گل ائيله‏ گيلن محبس غمدن مني آزاد

عارفسن اگر ايسته‏ مه اغياردن امداد

 اغيار اولا بيلمز بئله بير عشقه سزاوار

بير گوللو باهاردا سني من سئوميشم اي يار

 -----------------------------------------------

 بيچاره كؤنول صبر ائله چوخ اولما گئيلئي لي

عشق اولماسا بولبوللرين اولماز گوله مئيلي

 افسانه ده اولسا هله ده ليلي‏ دي، ليلي

سالدي هوس عشقه بيزيم (ائلداري) خيلي

 بو سنده اولان ناز، ادا ايله بو رفتار

بير گوللو باهاردا سني من سئوميشم اي يار

-----------------------------------------------

مهدی همت زاده (ائلدار) - ماکو



تاريخ : بیست و نهم اسفند ۱۳۹۲ | 22:42 | نویسنده : مهدی همت زاده(ائلدار) |
        مطالب قدیمی‌تر >>


.: Weblog Themes By M a h S k i n:.