ازدیلر پهلوی عشقی دورمهدی جان تیترهدی
فاطمه تا آخ دئدی دین اسدی ایمان تیترهدی
معجرین آلدی اله داده چاغیرسین آللهی
اَل گویه قوزانامیش مسجیدده ارکان تیترهدی
رنگی سولموش گوللریننن اَل چکنده فاطمه
یئل گیجهلندی نوایه گلدی طوفان تیترهدی
زینبین نیسگیللرین ییغمیشدی یاره قلبینه
یارهلی گئتدی قالیب زینب هراسان تیترهدی
گئتدی مولا تیکیهگاهی یئر گؤیو ماتم توتوب
مظلوم اؤلدو فاطمه تاریخده عصیان تیترهدی
هر سازین بیر سوزی وار هر عاشقین بیر معشوقی
سسلهدیم یا فاطمه مست اولدو دیوان تیترهدی
شاعیر: شریفه جعفری
قوی اوپوم گوزلرووی بلکه اورک دینجلسین
سن ده بیر کلمه دانیش منده دیلک دینجلسین
قوزا یئردن باشوو سال قولومون اوستونده
قؤل دولاشسین بویونا یانقی بیلک دینجلسین
باشووا دونمهده یورقون دگیلم آمما آخی
اؤت قالا بیر دفعه وورقون کپهنک دینجلسین
پیشمیشم گون آلوویلا دؤداغیم قوپ قورودو
سنده بیر دامجی دامیز ساخسی سهنک دینجل سین
شاعیر: شریفه جعفری
سوسوزام، یانقییام بیر دامجی دامیز
دولانما خیال سیز هاوادا بولود
دیللندیر چمنی، دیللندیر چایی
توختاسین کونلومده یارادا بولود
گوناهسیر بیر قادین اؤزون اوتلادی
اؤزو محکوم اولدو آرادا، بولود
آلیب گوزهلرین باشین قارا دِوو
دوئوشوب یورولوب سارادا بولود
آختار کیلیدین تاپ حاق قاپیسینین
اینسانلیق قویلانیر پارادا بولود
حقیقت دالدادا بئله باتیر کی
داها باشی چاتمیر دارادا بولود
«دنیز» ساز گوتور اله سیزلییا
دردلری سیغمادی تارا دا بولود
شاعیر: شریفه جعفری
ائلیمین اوبامین سازینا بندم
ظولمه باش اَیمیین قئزینا بندم
گورمهلی قئشینا یازینا بندم
الدوزلار ایچینده دان اولدوزویام
افتخاریم بو دور آذر قئزییام
بینامی قویوبدور عشقیله آنام
اویرهدیب ائلی مین دردینه یانام
اولکهمی عزتیم شرفیم سانام
الدوزلار ایچینده دان اولدوزویام
افتخاریم بو دور آذر قئزییام
کوکومو قازمالار، قورودا بیلمز
اوزگهلر دیلیمی اونودا بیلمز
سوزو دوشونمیین، بونودا بیلمز
اولدوزلار ایچینده دان اولدوزیام
افتخاریم بو دور آذر قئزییام
قوربانام آدینا آذربایجانین
یورغون اولادینا آذربایجانین
ائل چاتسین دادینا آذربایجانین
الدوزلار ایچینده دان اولدوزویام
افتخاریم بو دور آذر قئزییام
شاعیر: شریفه جعفری
سن منیم تیتردهنیم سن
بولودا چاتدیرانیم
ساز دا اولسایدیم اگر توز بوروموشدو کوکومو
منی ایدیم؟ غم سیزلیک
سندهکی شاعیرلیک
بیردن آنجاق منی دیللندیردی
اولدوم عاشیق
یئریدیم، سونرا ایناندیم کی
وارام
حرکت دونیامی آلت اوست ائلهدی
مهربان اللریوین ردی هله کؤنلومده
گوزلریندن الهنن دویغولارین
دادی داماغیمدا قالیب
او لطافتلی گولوشلر
خیالیمدان کوچمور
ایندیسه
من یازیچی
من شاعیر
هامیسی آددی بولار
هر نه واریم سندندی
شاعیر: شریفه جعفری
سوگیلیم زولفون توکوبدور گینه اول شانه سینه
قوربانام زولفونه هم زولفو گزهن شانه سینه
گئجه گوندوز گزرم دلبریمین کویینی من
...چونکی یوخ منده لیاقت گئدم اول خانه سینه
دالیسیجان دوشرم فیکر و خیال ایلیهرم
دوشجکدیر پس هاچان سایهم اونون سایه سینه
حوری جنت ده گرک دیر گورورم حورینی من
تا کی گوزلر ساتاشیر گوزلرینین قاره سینه
دوزدی غمزه اوخونون یارهسی کار ائتدی منه
لاکین آرزوم بو دی کی مرهم اولوم یاره سینه
من گونش اولسام اگر سنده گرک مهپاره
چونکی یئتمز اول گونش سئودیگی مهپاره سینه
شاعیر: الهامی علمداری
عشقه وئردیکجه کونول دردایله دریالاندیق
اتک آچدیقجا یخیب سدلری دنیالاندیق
دویغولار دالغالارا دونمه ده دالدیق دولدوق
اوتوروب بارلی باخیشلاردا تماشالاندیق
من عطش سن ده گونش عشقیمیز آتش آرادا
جلوه لندیکجه دل ذره ده گویالاندیق
اولدو لال کار بیزی کور تعبیر ائدهن تصویرلر
گوردولر هر دورو صاف گوزگوده رویالاندیق
گونشین عشقینه مین رشک ایله آچماغدا آغیز
درو گوهر آخیدیب لولو لالالاندیق
بیزده بیر ذره قرار دوتمادی عشق ایله عطش
هئی پریشانلیقی آشدیق گئنه بلوالاندیق
دوشدو فیکر ائتمه چکیمدهن داها پیر اولدو موغان
هر نفس دهن دم آلارکن ئینه شیدالاندیق
محمدعلی نهاوندی(موغان)
بسلهییب دیر سینه سینده چیلخا عصیانلار کوراوغلو
قالدیریب دیر گؤزلرینده قانلی طوفانلار کوراوغلو
دالغا دالغا آغ بولودلاردان قیرآتلان ایسلانیبدیر
اورمان اورمان هایلاییبلار بارلی نیسانلار کوراوغلو
پوتقو پوتقو کیشنهییب آت شئهلی یول لاردان کئچیب دیر
چیرپینیبدیر چنلی بئل باغریندا وولقانلار کوراوغلو
دالغالاندیرمیش عدالت بایراغین آل یوردو اوسته
مینلر عشق اولسون گتیرمیش تازه دورانلار کوراوغلو
تا گؤروبلر قان قیلینجین آل گونشده پارلادیبدیر
سسلهییبدیر جان جییردن، زوغ زوغ اورمانلار کوراوغلو
تورپاق اوسته لالهلردن ژاله ژاله عشق آخاندا
سؤیلهییب قانلار کوراوغلو، دینلهییب جانلار کوراوغلو
وار آدین زنگین قوپوزلاردان یاییلمیش ماهنی ماهنی
هایدی بوی بوی سؤیلهییبلر اسکی دستانلار کوراوغلو
بوردا بیر سورگون آتین کیشنرتی سسی داغلاردا قالمیش
آختاریرلار هئی اودور ائللرده کروانلار کوراوغلو
کاظم نظری(بقا)
کؤنول کؤنول سیزه غوربتده نالهدن یازیرام
سینیق سینیق آیا، ایواندا هالهدن یازیرام
آراندا بولدوزرین قانلی قیناغین گؤرورهم
چمن چمن پوزولان غملی لالهدن یازیرام
زامان دوداق لارینا بوش پیالهلر چیلهنیب
چاخیر چاخیر اورهیه قان پیالهدن یازیرام
آیاق لانیبدی شوخوملوقدا آرزولار چیچهییم
نه آرزو بیر تیکه روح مچالهدن یازیرام
بولاق بولاق قورویوب بختیمین ایشیق گؤزهسی
قارانلیغا بورولان کور شلالهدن یازیرام
حکایهلر پوزولوب، قالماییبدی نئیده نوا
اوتورموشام هله پیس پیس نوالهدن یازیرام
بوداق بوداق باهاری داللاییبدی کوز دولوسو
دایانمیشام هله من رقص ژالهدن یازیرام
نه دالغا دالغا قالیب بوغدالیق نه بیلدیرچین
نه دنسه من هله یئردن، قبالهدن یازیرام
باهارلی سؤزلره نئیلیم کاغیذ عطیرلنمیر
نه دن بقا! سیزه من زر کلالهدن یازیرام
کاظم نظری(بقا)
مین مین اوجالان قصر بیر آلچاق داغا دگمز
ظلم اوسته دوران قله اسن چارداغا دگمز
یوز پارچا تیکانلیق دره باغبان باخیمیندان
بیر باغچا قرنفیل بیتیرهن توپراغا دگمز
حشمتلی سرای لاردا کی مرمر پاسیولار
دامان طبیعتده حصار سیز باغا دگمز
اشداد الینین زینتی قیمتلی بیلرزیک
احراره دهمیردهن دوزهلن قولباغا دگمز
بی غیرت آدام قصرده اگلشسه ده آنجاق
زنداندا شهامتله یاتان دوستاغا دگمز
هر بیر یاراماز قولدورا تعظیمهانن باش
ظالم باشینا اندیریلهن توخماغا دگمز
ناحق لره یاردیملیقا قالخان یوموروقلار
حق اوسته گناهسیز چکیلن دیرناغا دگمز
ایش گورمهین آرتیق یئیهن آغ جانلی بیلهکلر
بیر ایلمه سالان خیردا قابار بارماغا دگمز
هرگون بو فنا دهرده مین رنگه دوشنلر
یئللن دولانان یئرده گئدهن یارپاغا دگمز
بو جرم و جنایت یئرینین جاه و جلالی
مولا بویوروب بیرجه جیریق باشماغا دگمز
خوشدور بو شعار: آزیاشا انسان یاشا«صادق»
چوخ چوخ یاشایان گورموشم اوچ مترآغا دگمز
علی عسگر صادقی(صادق) اردبیلی
سنی تاری بایرام خانیم
راضی اولما من اوتانیم
بایرام دا یوخدور تومانیم
گئت تبریزه، گلمه بیزه
من ده یوخ حوصله بایرام!
الیم بوشدور هله بایرام!
شیل اولاسان بئله بایرام
گئت تبریزه، گلمه بیزه
بایرام اگر گلسن بیزه
بیر شال گتیر قارا قیزه
گتیرمه سن، گت تبریزه
گلمه بیزه، گلمه بیزه
گلسن بیزه آغام جانی
باشین یاررام، آخار قانی
اوغلانین یوخدور تومانی
گئت تبریزه، گلمه بیزه
گؤرسن آخیر چرشنبهنی
سؤیله اینجتمه سین منی
پلووون یوخ یاغی– دنی
گئت تبریزه، گلمه بیزه
ساققیزی سالمیشام انگه
اوغلان گتدی منی تنگه
پول یوخدور وئرم فیشنگه
گئت تبریزه، گلمه بیزه
بایرام! واللاه یوخدور ناریم
یاری گورمه یه آپاریم
نار وئرمه سم، کوسر یاریم
گئت تبریزه، گلمه بیزه
وارلی یئییر یاغلی چیلوو
یوخسول چکر، غصه– خینوو
بیزده یوخدور، خوروز پیلوو
گئت تبریزه، گلمه بیزه
یوخسول مین درده توش اولار
مئی ایچمه دن سرخوش اولار
تبریز حالواسی خوش اولار
گئت تبریزه، گلمه بیزه
معجز شبستری
قارانلیقین کوچه سین دهن گونش ضیافتینه
سفردهیم گئدیرهم سئوگی مین زیارتینه
گره ک بو دار کومه دهن اوز قویام سماواته
وئرهم بویوک عرضی جوهرین طراوتینه
سفر بولیل لی سولاردان گره ک دی ماوی لیگه
قاتام بو دامجی نی دریالارین لطافتینه
قیرام نه باغلی لیقیم وار بو کوهنه توپراق دان
چکهام قاناد ابدی وارلیقین مساحتینه
سفر سفر ابدی دور دونوم لی داغ دره لی
نهایتین ده چاتیر خلقتین قیامتینه
سفردهیم بویوروبلارکی یولچو یولدا گره ک
او دورکی ائلچی گئدیر کهکشان سیاحتینه
عباسعلی یحیوی(ائلچی)
ایلدیریم حک ائیله یر عرشه سما آیه لرین
عرش ده نقش ائله یر فرشه هدا آیه لرین
باغلایب قول قولا بیر جاذبه مین لر فلکی
مین هالای ذکر ائله یر گوی ده ثنا آیه لری
یئل اسیر یازنفسین دهن اویانیر گوللو باهار
دولدورور جامه سوزهن چاغدا صفا آیه لرین
هرنه وارسینه افلاک ده تسبیح ائله یر
ذکر ائدیر هرنه کی وار یئرده دعا آیه لرین
قابلیت آنا توپراق دا بویوک معجزه دیر
کی دوزوب سرگی یه خوش نشو و نما آیه لرین
بیر مقدس گئجه نین خاطره سین دهن نه دئییم
حوری لر یای دی سماواته حرا آیه لرین
(ائلچی) از باب بشیرا و نذیرا قرآن
هر نفس نشر ائله یر خوف و رجا آیه لرین
عباسعلی یحیوی(ائلچی)
گوی ده ن منه بیر بایداقیزیل قان گتیریب لر
یوخ یوخ گونشین آلماسین احسان گتیریب لر
حیرت یوگوره رکن ائله اوزسوزله میشم کی
بوهیکله آلقان داچیمه ن جان گتیریب لر
بیر دالغالی جوشغون دنیزی من ده اکرکن
هر بیریئنی چیرپینتیما طوفان گتیریب لر
گوی قورشاغی منظومه لری بیرساپا دوزموش
بوسینه مه مین حالقالی کیهان گتیریب لر
بوجان کی غزل چشمه لرین ده ن می ایچیب دیر
هر دالغادامین شیهه لی دیوان گتیریب لر
بهت عالمی دیر سن هار بو من هارا بالله
بیلمم منی هاردانن هارا حیران گتیریب لر
قوی دال بادال انسین نفسون روحومه وحشی
مجنونلوقوما عشقی پریشان گتیریب لر
شاعردئیه بیلمز نه یازیر یا یازاجاق دیر؟
وحی عطرلی الهام لاری الان گتیریب لر
حورالره باخ ائلچی غزل طرحی توکنده
مضمون یئرینه آتش و عصیان گتیریب لر
عباسعلی یحیوی اردبیلی
دولغون سمالاردان یاغیر توفان لی توفان یاخشی باخ
حیران کونول ده چیرپینیر عصیان لی توفان یاخشی باخ
یئرسیز ده ییل بیر بویله های بیربویله گون بیر بویله آی
هاردان آخیر بیربویله چای بو جان لی توفان یاخشی باخ
جوشغون دی شاعرسینه سی اوددور اوره ک گنجینه سی
شاعر خیالیندان بیتر آلقان لی توفان یاخشی باخ
بو حس یوخ بیر جذبه دیر روحو یاران بیر ضربه دیر
توپراق جانین دیکسیندیریر عصیان لی توفان یاخشی باخ
رقصان دی عالم شبهه سیز هم غمزه گر هم عشوه ریز
وارلیق نه دی جوشغون دنیز طغیان لی توفان یاخشی باخ
آخ آخ ریاست ده ن دئمه زوردان سیاست ده ن دئمه
دیل باغلادار قان آغلادار بحران لی توفان یاخشی باخ
قوی کوکره سین قان چایلاغی جوشسون سوزون قان قایناغی
چاخناشدیران دا ائلچی نی جولان لی توفان یاخشی باخ
عباسعلی یحیوی اردبیلی