کیمده واردیر

کیمده واردیر گؤزلیم سنده اولان جاذبه لر

سنه دنیاده مگر عاشق اولاندا غم ائلر؟

بس دیر اولدورمه یه جکسن گؤزلیم دنیانی

هر یوزی گؤیچک اولا ندا بوقدر چم خم ائلر

اینجیمه گؤز یاشیم آخسا سنی گؤردوکده گولوم

گول آچیل دیکده باهار فصلی بولود شبنم ائلر

ناز و غمزه ن، یئریشین، شوخ باخئشین عالم دیر

بیرده زولفون اوزه توکسؤن اودا بیر عالم ائلر

حیف سن گزمه یاراشماز سنه بیگانه ایله

او آچیب سرینی دونیایه سنی محرم ائلر

واحدم عمرومو من عشقیله صرف ایله میشم

عشق یا اؤلدورر آخیر یا منی آدم ائلر

شاعیر: علی آقا واحد

موسیقی

موسیقی نشئه سی مین سوگیلی جانانه دگر

اثر ناله نی عارف ایچون جانه دگر

موسیقی اهلینه انصاف ایله قیمت قویماق

لحن داود ایله مین تخت سلیمانه دگر

بیخبرلر نه بیلیر لهجه خواننده نه دیر

اهل حال اولسا، بو سؤز قدرده میلیانه دگر

پرده غم داغیلیر تاره دگنده مضراب

طره دلبره هردم نئجه کی شانه دگر

موسیقیله اولار هر خسته یه عالمده علاج

بو طبابت نئچه مین چاره لقمانه دگر

بیزه بو علم حرام اولموش ایدی کئچمیشده

یعنی شیطان ایشی دیر، رخنه سی ایمانه دگر

یاشاشین قرمزی شهرتلی وطن قانونی

بوسخاوت نئچه مین حاتم دورانه دگر

قیلدی هر یئرده بنا موسیقی مکتب لرینی

نغمه نین فایده سی ایندی هر انسانه دگر

خلقیمیز موسیقی علمین اوخویور مین لر جه

ئولکه میزچون بو شرف مهر درخشانه دگر

موسیقیله منی دفن ایله سه لر واحد اگر

قبریمین تورپاغی مین روضه رضوانه دگر

شاعیر: علی آقا واحد

گولسون منه

آخر آغلاتدین منی، بیگانه لر گولسون منه

شمع تک یاخدین منی، پروانه لر گولسون منه

منده یالوارام، گوزون یادیله، پیر میکده

ائیله مست ائتسین منی، مستانه لر گولسون منه

پرتو خورشید رویین جام می ایچره گؤروب

آغلارام قوی دوریده پیمانه لر گولسون منه

قورخورام سر دهانین می ایچیب فاش ائیله یم

مست اولام کیم عارف، میخانه لر گولسون منه

باغلا اول زنجیر زولفونه من سرگشته نی

قویما کیم صحرانشین، دیوانه لر گولسون منه

لیلی وش، زولفوندن آیری ایسته رم مجنون اولام

قوی ائشیتسین بو سؤزی، فرزانه لر گولسون منه

ییخا بیلمزدی فلک اولسایدی ییخدی هجر یار

واحدم قوی ساکن ویرانه لر گولسون منه

علی آقا واحد

قان اولان کونلوم

گلوبدور تنگه ای ظالم، ستمله قان اولان کونلوم

همیشه باغ وصلینده، گولوب خندان اولان کونلوم

دوشوب مجنون کیمی، صحرایه بیر لیلی فراقیندا

بوتون عاشقلر ایچره، منبع عرفان اولان کونلوم

نه اولدو بیلمه دیم دوشدو، جدا گولزار کویوندان

همیشه خوان وصلین بزمینه، مهمان اولان کونلوم

کیمه بیلمم، گئدیب اظهار قیلسین محنت عشقین

دؤنوبدور قانه هجرینده غمی پنهان اولان کونلوم

نه چاره ائیله سین، بیلمم خلاص ائتسین اوزون غمدن

اسیر محنت و پا بسته هجران اولان کونلوم

اولورمی بیر زمان خرم، یئتیشسه وصل جانانه

غم هجرینله افغانلار چکیب، گریان اولان کونلوم

منم فرهاد! عصرین سئودیگی {واحد} گوزللر دیر

اودور کی لاله داغین گؤستریر، ویران اولان کونلوم

علی آقا واحد

سرو نازه وئریب

بوتون گوزللیگی تانریم او سرو نازه وئریب

او هر نه ائتسه طبیعت اونا ایجازه وئریب

اول آهو گؤزلو گؤرخورام منی خطایه سالا

کی، فیتنه سیله چوخ عاشیقلری گودازه وئریب

اَییلدی سجده یه، محراب گؤردو قاشلارینی

اودور کی، اهل ریا مئیلینی نمازه وئریب

گولردی قیرخ گوزل عشقیله، آغلایاردی خزر

همین او ذوق صفانی کره آرازه وئریب

جمال یوسیفه جاه و جلال محموده

کمالی معرفتی سرّی وار ایازه وئریب

گوزللیک عالمینین شهریاری دیر بو پری

بونا بو سلطنت حسنی ایندی تازه وئریب

بو فخریمیز بیزه واحد بؤیوک سعادتدیر

زمانه، ثروت آغیر یوکدور، آنلامازه وئریب

شاعیر: علی آقا واحد

زولفونده

زولفونده نه لازیم، گؤزلیم، شانه دولانسین؟

قویما او حرمخانه نی بیگانه دولانسین

عیب ایله مه، کویوندا دولانسام گئجه گوندوز

شمعین گرک اطرافینه پروانه دولانسین

ساقی دولانیم باشینا مئی جامینی گزدیر

سرمست اولوم، باشیما میخانه دولانسین

اول زولفه کونول وئرمه، دییرلر منه ال چک

اونسوز نئجه بس بو دل دیوانه دولانسین

مجنون نه برابر منه صحرالره قاچدی

عشق اهلی اودور عرصه ده مردانه دولانسین

اغیار ایله اؤز یارینی همدم گؤرن عاشیق

دوشسون او گرک دشت و بیابانه دولانسین

سرخوش لیق ایله عؤمرونی صرف ائیله مه «واحید»

عارف اونا دییرلر کی، حکیمانه دولانسین

شاعر: علی آقا واحد

پشیمان دئیلم

سئومیشم من سنی، ائی شوخ پشیمان دئییلم

سندن ال چکسم اولونجه اگر، اینسان دئییلم

او وفاسیز کی، سنین له بئله رفتار ائله دی،

من بو ایشدن، گوزه لیم، ذره جه خندان دئییلم

مین اگر دوشمنیم اولسا، او جفا پیشه کیمی،

سنده قورخما، مله ییم، من داها قورخان دئییلم

سئویرم من سنی، بی حد حساب ائتمه منی،

سندن اوزگه گوزه لیم عشقینه قوربان دئییلم

سن منیم له اولاجاقسان، نه قدهر عمروم وار،

سندن اوزگه گوزه ل عشقینده نیگاران دئییلم

منی سندن آییرا، بلکه، اولن واختدا عجل،

واحیدین عاقلی کئسیر هر شئی، نادان دئییلم

علی آقا واحدین شعرلرین‌دن

وورولمیشام

اجازه ویر باخیـــم، ای گــــل، اوقاره گوزلرینــــه

وورولمیشـــام، نه ایدیــــم، آشکاره گوزلرینــــه!

غم ایتمه رم منــی یوز دفعه گونده ئولدوره سن

باخانـــدا بیــــرده دیـریللــم دوباره گوزلرینـــــــه!

جمالین آچما گلـم، قورخورام گوروب اوزونـی

گون اولسون حسنینــــه عاشق، ستاره گوزلرینـــه!

اولایدی قسمــــت، ئوپه یدیــــم او نازک اللرینی

اورکـــدن ایله میشــــم استخاره گوزلرینــــــــه!

کمنـــد آه ایلـــــه صیادلـــــــر دالینجـــــا دوشــــر

بو ناز ایلـــــه اگر ایتســــــه ن اشاره گوزلرینــه!

گوزوم گوتورمییـر، اغیارلــر باخانــــدا سنـــــه

بیر آیـــری گوزلـــــه ایدیرلـر نظاره گوزلرینــه!

شکستــــه واحده اولماز طبیــــب لردن عــــــلاج

قالوبدور اینـــــدی سنین بیرجه چاره گوزلرینه! 

شعر: علی آقا واحد

عدودن قورخماریق

بیــزی مردانــه دوغمشـــدر طبیعــت ابتدا سینـــدان

عدونیــن قورخماریق قانلار توکـن نوک جداسیندان

ئولونجه شکوه یه دیل آچماریق اعدای بی رحمین

اگـر یوز یــول کسیلسـه باشیمیـز تیــغ جفاسینــدان

عدولـــر باغرینـــی چاتلاتمیشیق میدان حرب ایچــره

بیز اول فاتحلریـــک حقین ظفرپرور صدا سینــــــدن

شرار تیــــغ میزدن هر زمان دشمـــن فرار ایتمیــش

قاچار خفاش بـــد طینت نیجـــه شمسین ضیا سینـدان

شهیــــد اولمـاق فقط حریــــت اوغروندا سعادتـــــدر

اسارتلـــه حیاتیـن بی ثمر ذوق و صفــا سینـــــــــدان

سه ورسه ک کاوه تک آزاده لیــــک، مظلوم دنیانی

خلاص ایتمک گره ک ضخاک عصرین هر بلا سیندان

اگر مظلومـــی قورتارماقسا مقصـــد ظلم ظالمدن

گره ک بالمره ییخماق قلعه ی ظلمی بنا سیندان... 

شعر: واحد

شیونی نیلر!

چشمین کی آلیر ناز ایلــــه جان، شیونــــی نیلـــر؟

مژگانیــــن اوخونــــدان ییخلان شیونـــی نیلــــر؟!

ســــرو چمنــــــه قامتیـــــن افتاده ســـــی باخماز،

محتـــاج تماشای رخیـــــن گلشنـــــــــی نیلــــــــر!

سن جور ایلــــه من یالواریم حقـــه، سن اینانمــا

تانریم، گورگ آخــــر، سنـــــی نیلـــــر، منی نیلر!

دفن ایله مه، اولســام ســــر کوینــــده شهیــدیـــن،

عریـان گـــرگ عاشـــق، کفنــــی، مدفنـــی نیلـــــر!

جــان و تنـــــی نــــذر ایلــــه میشــــم راه وفـا ده

یاریــن ســه ون عاشـــق داخــی جان و تنــــی نیلر!

غم پیرهنیـــن سیـــل سرشک ایچـــره بوراخدیــم

گردابـــــده غـرق اولسا گمـــــی، یلکنــــــی نیلــر!

ئوز دوستی کی، مین جـور ایله دی واحده، گیتی

قیل اینـدی تصــــــور اونـا، گـــور دشمنـــی نیلــر!

واحد

نازلی باخیشلار

او اینجه، نازلــی باخیشلار، او آتشیــن گوزلـر

حزین- حزین نه باخیر، سانکی عاشیقیـن گوزلر

سنین کیمی، گوزه لیم، نازنین گوزه ل چوخـدور

که یوخدور هیچ بیریسینــده بو نازنین گوزلـر

سنیـن او گوزلرینــی بیرجه یول گوره ن عاشق،

اینان کی، سویله یه جک یوز یول «آفرین گوزلر!»

سورولسامنـدن، اسیــر ایلیه ن کیم اولدی سنی،

باخوب بو گوزلره عرض ایله رم: «همین گوزلـر»

وفالی اولماسا بیر گون ده، چوخ گمان، دوزمــه ز

وفالـــی اولسا، یوز ایل عاشیقیــن یقین گوزلــر

همیشــه شاد اولــورام انتظار وصلیــن ایلـــه

نئجــه کی بیــر تازه داماد اولان گلیــن گوزلــر

من ئوز نگاریمــی، عیب ایتمه، گوزله سه م، واحد

کی بلبل ئوز گلینــی، عاشــق همدمیـــن گوزلـر

شعری از واحد

گوزلرین قاره سینه

گوزلرین قاره سینـه بیر نیچه قربان دیمیشم

قاشلارین طاقینـه قربان یرینــه جان دیمیشم

راز پنهانیمی خلق ایچره منیـم فاش ایله دیـن

بی وفا، من کی سنه سریمی پنهان دیمیشم

خوبلــر جمله گدادیــر سـر کوینــده سنیـن

سنه بو خوبلــر ایچــره مـه تابان دیمیشــم

قاشینا تیغ دیدیـم قانیمی تو کمک نه ایچـون؟

توت کی، ظالیم، نولا بوباره ده بهتان دیمیشم

اینجییوب چیخسا سینه مدن یری وار پیکانین

کی، نیچون باغریما گلدیکجه باسوب، جان، دیمیشم

واحدم، قویمایین، ئولدوردی او مهپـاره منی

سهو ایدوب گل اوزونـه مهر درخشان دیمیشم

شعر: علی آقا واحد