پیریمیز

بیز خرابات اهلی‌ییک، میخانه‌لردن چیخمیشیق

باده‌لر نوش ائتمشیک، پیمانه‌لردن چیخمیشیق

آتش غمدن نه قورخاق کیم، سمندر خصلتیک

شمع‌لر یاندیرمیشیق، پروانه‌لردن چیخمیشیق

پیریمیز پیر موغاندیر، خادم میخانه‌ییک

رندلر ذؤقین گؤروب، دیوانه‌لردن چیخمیشیق

ایندی بیر اکراه اولوب مئیدن، نظردن دوشموشوک

یوخسا مین مین مجلیس مستانه‌لردن چیخمیشیق

گاه اؤپوب یارین آیاغین، گاه دولاننیق باشینا

بیز پریشان زولف‌لر تک شانه‌لردن چیخمیشیق

بیر شعاعین ذرّه سیندندیر، فقط رنگ اؤزگه‌دیر

دیرلردن، مسجدِ ویرانه‌لردن چیخمیشیق

قدر و قیمت سیز بیزی ظن ایتمه واحد، عارف اول

پر بها گنجینه‌ییک، ویرانه‌لردن چیخمیشیق

شاعیر: علی آقا واحد

یامان گؤزده‌ن!

تؤکوب قانیم، روان، غیب اولدو اول سروِ روان گؤزده‌ن

بو روشن‌دیر که،قان توکجگ، اولور مردم نهان گؤزده‌ن

کمندِ زولفونه باغلی چیخار جان جیسمِ زاریمدن

کنار اولدوقجا هر لحظه او یارِ مهربان گؤزده‌ن

گؤزومده طفل تک اوینار خیالِ چشمِ مخموری

باسوب باغرینا مردم، قویماز آنی بیر زمان گؤزده‌ن

تکی مین اوخ رضایم، سینه‌مه پیوسته سانجیلسین

منی تا سالماسین اول دلبرِ ابرو کمان گؤزده‌ن

اگر بیر دفعه باغ ایچره بو قامتله خرام ائتسه‌ن

سالیر تا حشره‌تک اؤز سروِ نازین باغبان گؤزده‌ن

ائشیتدیم، غیرایله اول لاله اوزلوم سئیرِ باغ ائتمیش

خدایا، ساخلا سن اول ماهِ بی‌مهری یامان گؤزده‌ن

نئجه سرمست ایکن واحد، چیخیم میخانه‌دن هوشیار؟

منی بیر لحظه قویماز بزمده پیرِ مغان گؤزده‌ن

شاعیر: علی آقا واحد

ثواب ائده‌ر

معشوقه گرچه عاشقه ناز و عتاب ائده‌ر

عاشق شکایت ائیله‌مه‌ز، هر جوره تاب ائده‌ر

مین دفعه جور ائدوب منه بو ماه پاره‌لر

بیر دفعه‌سی یازیلسا اگر، مین کتاب ائده‌ر

من عاشقم، دئدیم، دئدیلر، ای اسیر عشق!

بیر درده دوشموسن کی علاجین شراب ائده‌ر

بیر آن شرابیم اولماسا، درد اؤلدوره‌ر منی

هر کیم بو درده چاره ائده، مین ثواب ائده‌ر

داغلاردا، لاله‌لر قدحی دولدو ژاله‌ده‌ن

گولگون شرابه غملی کونول‌لر شتاب ائده‌ر

جانا، لبیندن ائیله بو دردین علاجینی

اغیاره سرّی سؤیله‌مگه، دیل حجاب ائده‌ر

یا آل بو جانی، یا کی دوز‌لت احتیاجیمی

بو حسرت آتشی، منی، یوخسا کباب ائده‌ر

آلدیقدا جام مئی اَله، جمشیدی یاده سال

زرّین پیاله چوخلاری خانه خراب ائده‌ر

واحد، او شوخه دردینی ده جام وصل ایله

بیر لطف گؤستر‌رسه، سنی فیض‌یاب ائده‌ر

شاعیر: علی آقا واحد

شیونی نیلر!

چشمین که آلیر ناز ایله جان، شیونی نیلر؟

مژگانین اوخوندان ییخلان شیونی نیلر؟!

سرو چمنه قامتین افتاده‌سی باخماز،

محتاج تماشای رخین گلشنی نیلر!

سن جور ایله من یالواریم حقه، سن اینانما

تانریم، گورگ آخر، سنی نیلر، منی نیلر!

دفن ایله‌مه، اولسام سر کوینده شهیدین،

عریان گرگ عاشق، کفنی، مدفنی نیلر!

جان و تنی نذر ایله میشم راه وفا ده،

یارین سئوه‌ن عاشق داخی جان و تنی نیلر!

غم پیرهنین سیل سرشک ایچره بوراخدیم،

گرداب‌ده غرق اولسا گمی، یلکنی نیلر!

ئوز دوستی که، مین جور ایله‌دی واحده، گیتی،

قیل ایندی تصوّر اونا، گؤر دشمنی نیلر!

شاعیر: علی آقا واحد

دیوانه‌لره

او قـارا زولف که هر دم دولاشیـر شانه‌لره

گؤستریر عشق کمندین دل دیوانه‌لره

مهرِ روخسارینی مندن کسوب اول ماه تمام

دوشدی فرصت یئنه بوندان بئله بیگانه‌لره

یوخسا، ای گول بو قدر باده‌ی ناب ایچمه‌ز ایدیم

شوقِ لعلین منی جلب ائیله‌دی میخانه‌لره

قانا دؤنسون، گؤروم، اول باده‌ی گولگون سنسیز

بیر ده، گر رغبت ائدیم ساغر و پیمانه‌لره

حسرت چشمِ خمارین، لبِ لعلین هـوسی

گؤستریر گوشه‌ی میخانه‌نی مستانه‌لره

شوقِ روخسارین ایله اودلارا یانمش کؤنلوم

اؤرگه‌دیب شمعده یانماقلیغی پروانه‌لره

جؤرین آز ائت منه، قورخوم بودو، بیر آه چکیم

بیر یانار اود دوشه باشدان باشا کاشانه‌لره

واحدم، شاعیر آزاده پرستم، نه غمیم!

قیلماسام رغبت اگر مسجده، بوتخانه‌لره

شاعیر: علی آقا واحد

مستانه سیز اولماز

زولفون نییه بیر آن، گؤزه‌لیم، شانه‌سیز اولماز!

عادت بئله‌دیر عشق ائوی بیگانه‌سیز اولماز!

طعن ائیله‌مه، زولفوندن اوُزاقلاشماسا کؤنلوم

بیر یئرده کی زنجیر اولا، دیوانه‌سیز اولماز!

غمدن یانیرام، رویونی گؤسترمه رقیبه

بیر شمع کی، شؤق آرتیرا، پروانه سیز اولماز!

مخمور گؤزون قویمادی بیر کؤنلومی راحت

بیردم بو ستم خانه‌سی مستانه‌سیز اولماز!

سن شوقِ لبِ یارایله ایچ، باده ایچینده

کیمدیر دییه، مئی مجلیسی پیمانه‌سیز اولماز!

بیر دلبرین عشقینده بوتون دیللره دوشدوم

هنگامه‌دیر، عشق عالمی، افسانه‌سیز اولماز!

واحد مئی ایچیر گیزلی، دئییرلردی ائشیتدیم

او رندِ خراباتی دیر، میخانه‌سیز اولماز!

شاعیر: علی آقا واحد

صنعان

کؤنلوم کیمی، او زولفه یئنه شانه باغلانوب

جان رشته‌سی او زولـفِ پریشانه باغلانوب

آهسته شانه چک، گؤزه‌لیم، تار زولفونه،

هـر بیـر تئلینده مین دلِ دیوانه باغلانوب

ساقی، آپارما مست منی خُم آیاغینا

مستانه‌لر یاتوب، درِ میخانه باغلانوب

کؤنلوم، اوزون غمیندن، اولوب باغلی زولفونه

پروانه سانکی شمع شبستانه باغلانوب

میخانه‌لر آچیلدی، قدح‌لرده نشئه وار

محنت بیناسی، خانه‌ی ویرانه باغلانوب

صنعان اگرچه باغلادی زونّـار، بیلمه‌دی

عاشیق همیشه طـره‌ی جانانه باغلانوب

واحد! زمانه حوری‌لری کئچدی جنّتی

زاهید هنوز روضه‌ی رضوانه باغلانوب

شاعیر: علی آقا واحد

قانه قان ائتمه

قارا زولفون اومه رخساره، ای گول، سایه‌بان ائتمه!

هلالی ظلمـت شبده بولوت ایچره نهان ائتمه!

لبیندن دیشله‌دیم، قان ائیله‌دیم، سانکی خطا ائتدیم

آماندیر، سن داها گل تؤکمه قانیم، قانه قان ائتمه!

او گول رویونده کی خال سیه‌دن احتیاط ایله

بهشتین باغینا هندونی، گؤزله، باغبان ائتمه!

غمیندن تنگه گلدیم، سرو بویلوم، بؤیله ناز اولماز

ترّحم ائیله، کویندا گؤزوم یاشین روان ائتمه!

کؤنول، وهم ائیله جانین‌دان، دوشرسن صیدوش دامه

گئدیب هـر نا کسین زولفون اؤزونه آشیان ائتمه!

آپاردی کؤنلومو زولفون خیالی، ظالیم، انصاف ائت!

هیچ اولمازسا،آلوبسان کؤنلومو،گل قصد جان ائتمه!

رقیبین باشقادیر کویونده گزمک‌دن تمناسی

اینانما، سئوگولوم، هر خائنی محرم گومان ائتمه!

اؤزون، واحد! مقصرسن، سنه جانان نه جؤر ائتسه

کؤنول وئرمه گؤزه‌للر زولفونه، آه و فغان ائتمه!

شاعر: علی آقا واحد

مردانه دولانسین

زولفونده نه لازیم، گؤزلیم، شانه دولانسین؟

قویما او حرمخانه‌نی بیگانه دولانسین

عیب ایله‌مه، کویونده دولانسام گئجه گوندوز

شمعین گره‌ک اطرافینه پروانه دولانسین

ساقی! دولانیم باشینا، مئی جامینی گزدیر،

سرمست اولوم، باشیما میخانه دولانسین

اول زولفه کونول وئرمه، دییرلر منه؛ اَل چک!

اونسوز نئجه بس بو دل دیوانه دولانسین

مجنون نه برابر منه! صحرالره قاچدی

عشق اهلی اودور عرصه‌ده مردانه دولانسین

اغیار ایله اؤز یارینی همدم گؤرن عاشیق!

دوشسون او گرک دشت و بیابانه دولانسین

سرخوش‌لیق ایله عؤمرونی صرف ائیله‌مه «واحد»!

عارف اونا دییرلر کی، حکیمانه دولانسین

شاعیر: علی آقا واحد

گؤزه‌لیم

سانما، کؤنلوم بو چمن‌زارده خرّم کیمی‌دیر

یارسیز عاشیقه جنّت‌ده جهنم کیمی‌دیر

آچیلیر، زولفون آچیلدیقجا، توتولمش کؤنلوم

زولفونی گؤرمه دیگیم گون منه ماتم کیمی‌دیر

ییخدی مین عاشیقِ بیچاره‌نی، بیر غمزه‌ن اوخی

مرحبا گؤزلرینین شستینه!، رستم کیمی‌دیر

اؤزونی قاشلارینین طاقینه بنزه‌تمک اوچون

گور، هلالی فلکین ایندییه‌جن خم کیمی‌دیر

گؤزه‌لیم، لاله یاناغیندا کی تر قطره‌لرین

تازه گول یارپاغی اوستنده کی شبنم کیمی‌دیر

بیر فقیر عاشیق اگر سئوگیلی جانانی ایله

توتا مئی جامینی الده، او هله جـم کیمی‌دیر

دلبریم همدم اولوب غیرایله، واحد، نه غمیم!

غم عشقی منه هیجران گونی همـدم کیمی‌دیر

شاعیر: علی آقا واحد

باغرینه قان ائتمه!

مجنونه دییه‌ن یـوخدور: ای عـاشیقِ بیچاره

لیلی‌له نه کارین وار، قویسون سنی آواره؟

عشق عالمی عشاقه بیر وادیِ محنت‌دیر

فرهادی سالوب داغه، منصوری چکـوب داره!

پـایـانِ غـم عشقـی تفسیره نه حاجت وار

گؤر، بیر نئجه پروانه شـؤق ایله یانار ناره!

دنیا او قدر لیلی، مجنون یئتیروبدور کی

سایسان، نه قدر گویده وار ثابت و سیّاره

هر لاله رخ عشقینده اؤز باغرینی قان ائتمه!

هر دردی چکیر بولبول، گول قسمت اولور خاره

بی‌مهر گــؤزه‌للردن عالمده وفا اوُمما

میل‌ین سالاجاق بونلار آخر یئنه اغیاره

واحد! بیز اؤلوب گئتدیک، مهرایله، محبتّله

دنیا دؤنـه‌جک بیر گون بیر صحنه‌ی گلزاره!

شاعیر: علی آقا واحد

جاندان کئچر

جانین ایستر، اول ده‌گیل عاشیق که، جاناندان کئچر

عاشیق اولدور، من کیمی جانان ایچون جاندان کئچر

منـع قیلما طرّه‌ی جاناندان، ای واعظ منی

هانسی بیر دیوانه اول زلف پریشاندان کئچر؟

شیخ صنعانه مذمّت قیلما، ای نـاصح، عبث!

گؤرسه هر کس اول بتِ ترسانی، ایماندان کئچر!

خاکِ کویین بیلسه زاهد باغ جنّت اولدویغین

اویماز اول افسانه فکره، باغ رضواندان کئچر

خضر اگر عؤمرونده بیر دم گؤرسه زلف و لعلینی

ترک ائدر ظلمات سئیرین، آبِ حیواندان کئچر

بو نه معجزدیر قیلیب حئیران سراسر عالمی

ماه روخسارین گـؤره‌ن مهرِ درخشاندان کئچر

مـایـل قـد و روخون، لعــل و لبین آلوده‌سی

غنچه و گول ایسته‌مز، سـروِ گلستاندان کئچر

دیشله‌دین لعلین، کؤنول، وهم ائیله قانوندان ساقین

سانما اول بی‌مهر رحـم ائیلـر سنه، قـاندان کئچر

واحدا! صرّاف اولان گؤرسـه او شـوخـون لبلرین

میل یاقـوت ائیله‌مـز، لعـل بدخشاندان کئچر

شاعیر: علی آقا واحد

باخمام گوله سنسیز!

عشقین منی دؤندردی گولـوم، بولبوله سنسیز

کؤنلوم توتولار، باخسـام اگر بیر گوله سنسیز

زولفون اوُجی گوستردی منه عشق کمندین

دوشدوم یئنه مجنون کیمی دیلدن- دیله سنسیز

بیر گون اوزونون هجری، بیر آی اولدی گوزومده

زولفوندن ایراق دوندی گیجـه‌م بیر ایله سنسیز

لیلاسی ایچـون دوزمـه‌دی بیر محنته مجنون

حق عاشیقی‌یم، دوزموشم هـر مشکله سنسیز

هر عاشیقین اوز یـارینه‌دیر میلی، منیم‌ده

میلیم گوله یوخدور، هوسیم سونبوله سنسیز

گوز یاشی ایله بسله دیگیم نخل امیدیم

گلمه‌ز، گوزه‌لیم، مین گول آچا حاصله سنسیز

سن گورسه‌ن اگر واحدی رحمین گلر، ای گول!

بیچاره ائدر آه و فغان بیر بئله سنسیز!

شاعر: علی آقا واحد

مهرو منی

سن نظردن سالماسایدین، ای هلال ابرو منی،

دام عشقه بونجا سالمازدی یئتن مهرو منی

گوز یاشیم آخدیقجا، آرتار سوزِ عشقیم سینه‌ده،

یوخدیر امیدیم، خلاص ائتسین بو اوددان سو منی

اینجه‌لوب زولفون خیالی‌له وجودیم، اویله کیم،

تارِ زولفوندن حساب ائیلر گــوره‌ن بیر مومنی

بیلمه‌دیم، قیلدیم نظر اول زولـفِ عنبر فامینه،

سحرله سالدی کمنده نرگسِ جادو منی،

مجلسِ می‌ده نگاریم آچدی مشکین زولفونی

بیلمه‌دیم مئی نشئه‌سی مست ائتدی، یا کیم بو منی!

مـن اسیـر زولفونم، آنجاق جمالین سئومیشم

فکر قیلما، ایستـه‌ییر وصلمدن اُوتری بو منی

گورمه‌ینجه گول اوزون، واحد، او شهلا گوزلونون

ساکت ائتمه‌ز نه چمن سیری، نه بیر آهو منی

شاعر: علی آقا واحد

قان اولا

یارین ره عشقین‌ده کونول قان اولا، خوش‌دیر

هیجرین‌ده گوزوم هر گئجه گریان اولا، خوش‌دیر

من کی، بو قارا گوزلولر عشقینده اسیرم،

سینم هدف ناوک مژگان اولا، خوش‌دیر

سن عصری‌میزین ایندی زلیخاسی‌سن، ای گول!

عاشق سنه مین یوسف کنعان اولا، خوش‌دیر

ییغما، باشینا، نازایله بیر شانه چک هر دم

کونلوم کیمی، زولفون‌ده پریشان اولا، خوش‌دیر

آچ سینه‌نی گوستر منه هر صبح زمانی،

گول بولبول ایچون چاک گریبان اولا، خوش‌دیر

رخسارین اودی کونلومی یاخدیقجا سئویننم

پروانه یوز ئیل شمع‌ایله سوزان اولا، خوش‌دیر

جانان نه جفا ایله‌سه، واحد، یئنه صبر ائت!

عشق اهلی اسیر غم جانان اولا، خوش‌دیر

شاعر: علی آقا واحد