گول یاخشیدیر، سن یاخشیسان!

سئوگیلیم! سیر گلستان یاخشیدیر، سن یاخشیسان؟

عاشیقن‌چین باشقا جانان یاخشیدیر، سن یاخشیسان؟

مین منیم تک عاشیقی حئیرتده قویموش گؤزلرین

سئوگیلیم، بیر سؤیله، جئیران یاخشیدیر، سن یاخشیسان؟

بیر دؤنوب باخماقلا تئز آلدین، آپاردین کؤنلومی

آولاییب چالماقدا طرلان یاخشیدیر، سن یاخشیسان؟

گؤگ اوزون آی رؤشن ائتمیش، حُسن‌ایله سن یئر اوزون

نازنینیم، ماهِ تابان یاخشیدیر، سن یاخشیسان؟

سن کیمی جانان اوچون جاندان کئچن بیر عاشیقه

ای گوزه‌للیک تانریسی، جان یاخشیدیر، سن یاخشیسان؟

سنده وارکن نازایله گولمک، دانیشماق، اینجه‌لیک

لطف‌ده گلبرگ خندان یاخشیدیر، سن یاخشیسان؟

مجلیسین خلوت، نیگارین، واحد، الده مئی توتوب

گؤر، بوخوش عالمده سلطان یاخشیدیر، سن یاخشیسان؟

شاعیر: علی آقا واحد

یار سنی

یارادوب تانری عزیزیم، نه گوزل یار سنی

گوزله بو حوسنله آلداتماسین اغیار سنی

دیشلرین اینجی، لبین لعل، اوزون گل کیمی تر

خلق ائدوب منجه طبیعت دُر شهوار سنی

عشق بیماری ساغالماز بونی درد اهلی بیلیر

ساغالار گورسه بو ترکیب‌ایله بیمار سنی

یاندیریب کعبه و بتخانه‌نی زناری آتار

گورسه صنعان کیمی مین عاشق دیندار سنی

سن کی حال اهلی‌ایدین عاشقی اینجیتمزایدین

ایندی جان آلماغا کیم ائیله‌دی وادار سنی

عاشیقین کونلونه رحم ائت، بو قدر اینجیتمه

گورمه‌میشدیم گوزلیم، بونجا ستمکار سنی

مست‌ایدین سن بو قارا گوزلولرین عشقینده

ایندی واحد سئوینیر کیم گورور هوشیار سنـی!

شاعیر: علی آقا واحد

نشئه‌سی پیمانه میزین!

ساقیا! بیر بو ده‌گیل نشئه‌سی پیمانه میزین

هله بوندان سورادیر لذّتی میخانه میزین

بیز گرک باده‌ی گل‌گونی حکیمانه ایچک

پوزمایاق رؤنقینی مجلیسِ مستانه میزین

آیاغین اؤپمه‌لییک خادمِ میخانه‌لرین

بلکه، جام ایچره گؤره‌ک عکسینی جانانه میزین

زولف شؤقیله اولاق مست، بوتون عاقیل‌لر

قالسین ادراکینه حئیران دلِ دیوانه میزین

بیز همان رندِ خراباتیِ بی‌باک‌لریک

صحبتی ایندی‌ده دیل‌لرده‌دیر افسانه میزین

درد الیندن بوقدر چکدیگیمز ناله‌لره

نه گلیر یاریمیزن رحمی، نه بیگانه میزین

عشق زنجیرینه واحدده گرفتار اولدو

آزدی گویا، بیری‌ده آرتدی بو دیوانه میزین

شاعیر: علی آقا واحد

اوغرو منظومه‌سی

بیر اوغرو گلیب هر نه دئسن وار اونا قابی

حیرت‌ده قویوب هم منی هم شیخ ایله شابی

بال گورسه دویونجاق اونو بارماقلایاجاق‌دیر

بارداقه توکوب ایچمه‌لی‌دیر گورسه دوشابی

چوخ‌دان چوخا آزدان آزا قانع‌دی ایشینده

مشکل وئره الده‌ن بئله بیر کار ثوابی

انصاف‌لی دی خوف و خطری هاممیا بیر دیر

بیر نمره آلار مدرسه‌ده مهر و عتابی

بو اوغرو نه تاجردی نه قاضی نه وزیر دیر

آج قالماقین اوستن‌دی ایاب ایله ذهابی

ایش‌سیزدی ولی اهل و عیالین دیشی واردی

دیش‌لیک دیله‌یه‌ن اولادینا یوخدو جوابی

بو اوغرو اوزونده‌ن آجا حاشا تله قورسون

توخ اوغرویا همیانی‌ده وار بند و طنابی

بیر اوغرودا وار ظاهری خوش رتبه‌سی والا

دنیا منیم اولسون‌دی اونون جمله عذابی

چیرکین لیگی‌نین اورتوب اوزون جامه‌ی الوان

بیر قورخولو موجود ایدی رد اولسا نقابی

یای گلسه گوزه‌ل یایلاقی ساحل قیراغین‌دا

قیش اولسا بوران اینجیده بیلمز او جنابی

گوندوز نازینا مشتری‌دی میز ریاست

سون‌سوز گئجه‌لرده پر قو اوسته‌دی خوابی

قوللوق‌چو سونون دائم ایپک دستمال الینده

ماستون‌چو سونون شیش ده مهیادی کبابی

نیسگیل کوکونو قازمادا مانقال ماشا حاضر

گر نشئه‌نی تخت ائیله‌مه‌سه باده‌ی نابی

دولت حقوقون دا او داوام یوخ اوده بیلسین

بئش گون بو گئنیش لیک‌ده حساب ایله کتابی

ناچار سالیب دیر اله بیر حکم بو اوغرو

قادر دی اگر بیر گئجه‌ده چاپسا سرابی

چون قافیه حکم ایله سراب‌دان آد آپاردیم

حتماً قلمین شاکی‌یه کافی‌دی جوابی

مین‌سه دالووا بیزله‌یه‌جک مقصده چاتسین

مین‌سون دالینا چاپمالی‌دی خوش‌دو رکابی

مسجدده تمرد ائله‌مز اهل نمازه

میخانه‌ده ضایع ائله‌مز دور شرابی

هر کس دئیه بیلمز قاشون اوستون‌ده گوزون وار

الا او کی اوندان قازانیب رنگ و لعابی

بو اوغرویا کیم اوغرو دئسه باشی خطرده

او اوغرو همان اوغرو فلانی‌دی شهرده

بیر شهرده کی اوغروسونون یوخدو چیخاری

اول شهرده اولدوز سایاراق گوزله‌مه یاری

گئج گلمه سینه اینجیمه تئز گلسه یقین بیل

ائل‌لر آرا حیثیت‌ووی قونشون آپاری

باخ اوغرویا عبرت ائله؛ خالقین شهرین‌ده

اوچ مین دونه میلیارد تومن چکدی یوخاری

نه دوشدو خاما بئل بوخونو قددی بوکولدو

نه ذره‌جه ائل‌لر آرا اسکیل‌دی وقاری

یخچالی قویوب چیگن‌اینه امما بیزیم اوغرو

هم دورگونو یئل‌لندی همی قیردی داماری

اونلار بئجره‌ن اوغرو تورونتوی‌دا توی ائتدی

بیزلر بئجره‌ن اوغرو گئدیب گزدی نیاری

دریا پولا یئر وئردی او اوغرو بالا کیف‌ده

امما بونون اون مین تومن این دوتمادی گاری

او کندی چاپان چاغ‌دا گئدیب کاتدانی گوردو

بو بیر کئچی کتده‌ن گوتوروب اولدو فراری

او ال‌ده چراغ ایسته دیگین سئچدی آپاردی

بو بیر دریز اوتدان اوتوری یاخدی فناری

او خلقی سویوب بای بای ایلان چیخدی وطن‌ده‌ن

بو قارنی‌نین اوستونده گئدیر دوستاغا ساری

اوخشاتدی اونون قیش گئجه‌سین یازه اوغورلوق

بو اوغرویا بیر آن دا خزان ائتدی بهاری

گئت اوغرودا اولسون ائله‌بیر اوغرو اول ائل‌لر

قربان ائده‌لر هیکل اینه دار و نداری

بیر اوغرونو مامورایله گوردوم کوچه میزده

قولباق بیر الینده او بیری ال‌ده بخاری

زاغ زاغ بدنی تیتره‌مه‌ده شاخدا اونون‌ده

آرنین‌دا خجالت تری اوزده‌ن یئره جاری

سوردوم نه خطا چرتیب الینده‌ن بو اسیرین

آیدین منه ذکر ائیله سنی حضرت باری

تیکدی ائله گوز هیکلیمه باش‌دان ایاقه

بیر اووچو دو ات داش ائله‌یر سان کی شکاری

چیمخیردی تبخترله منه: کور کی دگیل سن!

آیا بو بخاری‌ده‌ن آغیر مدرک کاری

گوردوم نه بخاری کی تداعی ائدیر آنجاق

تهران‌دا قجر عصری نی مسکوودا تزاری

گوزلرده‌ن ایراق چون کی چیخیب آشغال ایچین‌ده‌ن

پارتداق پامادورلان بزه‌نیب جسم نزاری

ماموره دئدیم کور دگیل‌ام وئرسن اجازه

ثابت ائده بیل له‌م کی اوتوزدون بو قماری

گر اوغرو دوتورسان بو یازیق دوغرو دی سن‌ده‌ن

اینجیتمه داریخدیرما بو زاری سنی تاری

گر حکم وارون آج دوتاسان وقتی یوباتما

دوستاق‌دا آپار میل ائله‌یه بلکه ناهاری

احسن بئله ماموره کی بوشان‌لی شهرده

هوش باشدا جیمیز بانددان آرتیق‌دی عیاری

بیرده یئری اولسا او عزیز قاضی‌یه عرض ائت

دورونده کی توخ اوغرولارین یوخدو شماری

مال میدانی‌نین اوغروسونا بیر کئچی بسدیر

لعنت لیگ ائده حشره کیمین ایل و تباری

گئت قصرلرین ایچره گزیش اوغرونو بلکه

منصور کیمین شوط ائده‌سن چوبه‌ی داری

یوخ سهو ائله‌دیم حقی اونود «عاصمه» باخما

بیر عومردی چیگن‌اینده گزیر سنگ مزاری

قوی عومرو ووروبدور باشا بئش گون‌ده دئینسه

تا گلسه اجل جامی اونون جانینه ساری

شاعر: پرویز عاصم اردبیلی

اگلش‌میش

نگاریم بزم عشرت‌ده بئلینده خنجر اگلش‌میش

مگر نوشابه تختینده گلوب اسکندر اگلش‌میش؟

رقیب شومینی گوردوم حوری پیکرلر میانینده

که گویا قصر جنت‌ده گلوب بیر کافر اگلش‌میش

بو بزم جان‌فزاده آفتاب عالم‌آرا دی

و یا جام می الده اول بت سیمین‌بر اگلش‌میش

رخی دورینده گورجک زلف پرچینین خیال ائتدیم

سراسر کشور دارانی توتمیش لشگر اگلش‌میش

بساط اهلین بوتون جذب‌ائیله‌میشدی چشم مستیله

سانیرسان شهر بابل‌ده گلوب جادوگر اگلش‌میش

باکو شاعرلریندن واحدا یوسف‌دی رحمتلیک

او گئتدیسه اونون ایندی یئرینده آذر اگلش‌میش

شاعر: علی آقا واحد

شهید اولماق

بیزی مردانه دوغمشدیر طبیعت ابتدا سیندان

عدونین قورخماریق قانلار توکن نوک جدا سیندان

اولونجه شکوه‌یه دیل آچماریق اعدای بی‌رحمین

اگر یوز یول کسیلسه باشیمیز تیغ جفا سیندان

عدولر باغرینی چاتلاتمیشیق میدان حرب ایچره

بیز اول فاتحلریک حقین ظفرپرور صدا سیندن

شرار تیغمیزدن هر زمان دشمن فرار ایتمیش

قاچار خفاش بد طینت نیجه شمسین ضیا سیندان

شهید اولماق فقط حریّت اوغروندا سعادتدیر

اسارتله حیاتین بی‌ثمر ذوق و صفا سیندان

سئورسه‌ک کاوه تک آزاده‌لیک، مظلوم دنیانی

خلاص ایتمک گره‌ک ضخاک عصرین هر بلا سیندان

اگر مظلومی قورتارماقسا مقصد ظلم ظالمدن

گره‌ک بالمرّه ییخماق قلعه‌ی ظلمی بنا سیندان

شاعیر: علی آقا واحد

بیر بیر

جمالین شمعینه، جانا، یانار پروانه‌لر بیر بیر

چکر زنجیرِ زولفون حسرتین دیوانه‌لر بیر بیر

ائدر عشاق کؤنلون جمع ایکن آشفته هر ساعت

پریلر زولفونه دگدیگجه، ای دل، شانه‌لر بیر بیر

یئنه بیلمم نه افسون ائیله‌میش جادویِ چشمانین

که دگمیش بیر بیرینه مردم فرزانه‌لر بیر بیر

نه مئی‌دیر، گؤزلرین قوربانی، بیلمم باده‌ی عشقین

کی، ایچدیکجه تاپار هشیارلیق مستانه‌لر بیر بیر

لبین اؤپمک خیالیله دلِ ساغر اولوب پر خون

اول حسرتله گزه‌ر الدن اله پیمانه‌لر بیر بیر

دهانیندن اثر یوخدور، دئمیشلر، شرطی وار، آمما

یئتر تحقیقینه شرح ائتسه‌لر فرزانه‌لر بیر بیر

عرق درمی دوزولمش عارضِ آلیندا سر تا سر؟

گول اوزره ژاله‌دیر، یا اینکی اول دوردانه‌لر بیر بیر

مذاقِ لعلینی گؤرمشله، دئرلر جامِ مئی ایچره

شرفیاب اول جهت‌دن‌دیر اولوب میخانه‌لر بیر بیر

آییلماز جهل اهلی، واحد، هرگز خوابِ غفلتدن

مگر اهلِ ریادن ترک اولا افسانه‌لر بیر بیر

شاعیر: علی آقا واحد

زولفی پریشان

منی محروم ائدن روخساریدن زولفی پریشان‌دیر،

بو دریایی لطافت موجی عنبر ایچره پینهان‌دیر

اگر خورشیدی تابان‌یله سنسیز هم‌شراب اولسام،

لبی لعلی مئی آلودی گؤزومده قانلو پئیکان‌دیر

دد و دامی موسخّر ائیله یوبدور جذبه‌ی عشقین،

دوگون مجنونی شیدا باشینا چتری سلیمان‌دیر

منی مکری رقیب آواره قیلدی یار کوییندن،

چیخاران آدمی فردوس‌یدن تزویری شیطان‌دیر

قاچان عاشیقلرین فیکرینه دوشدو اول عقیقی لب

کی، اونون بیر قارا گؤزلولرینده‌ن آبی حیوان‌دیر

مسلمانام، دئییر مستین، ایچیر عاشیقلرین قانین،

منم کافیر، اگر اول دوشمنی ایمان مسلمان‌دیر

محبّت اهلی هنگی جام و نشاطی درد دن دؤنمز،

نئچون چکسون خومار اول کیم همیشه ایچدیگی قان‌دیر

منی خاکی نه تنها اولموشام مجنون کیمی رسوا،

کی، اول درد دن فلک سنگی ملامت ایچره پینهان‌دیر

فلک‌لر قان ایچر گؤردوکجه تجرید اهلینی، صائیب،

کی، یوقسیزلار حرامی‌لر گؤزینده تیغی عریان‌دیر

شاعر: صائب تبریزی

کفری ایمان ائیله‌مک اولماز

توتولموش کؤنلومو جام‌ایله شادان ائیله‌مک اولماز،

اَل‌ایلن پسته‌نین آغزینی خندان ائیله‌مک اولماز

نه سؤزدور بو کی، اولسون صاحب نظر زوهّاد،

قارا تورپاغی هرگز آبی حیوان ائیله‌مک اولماز

بولوت قیلان کیمی جؤولان اوراردا ایلدیریم تیغی،

کؤنول پرده‌لرینده عشقی پنهان ائیله‌مک اولماز

قیلیج گر ایچسه عالم قانینی سیراب‌لیق بیلمز

سنی عشّاق قتلین‌دن پشیمان ائیله‌مک اولماز

منیم گؤز یاشیمی چیخ گئل فلک‌لردن تماشا قیل،

حبابی قصرلر ایچینده طوفان ائیله‌مک اولماز

منی مجنونی عاقل ائیله‌مک ممکن دگیل ناصح،

سؤزایلن مشکی نابی قان کی، بیر قان ائیله‌مک اولماز،

خطا‌دان کئچدی جئیران قانینی مشک ائیله‌دی صائیب،

دئمه، عصیانی طاعت، کفری ایمان ائیله‌مک اولماز

شاعر: صائب تبریزی

باشیمدا‌دیر قاراسی هنوز

چیخاردی خط منم زولف مبتلاسی هنوز،

دوگون ساقالدی و باشیمدا‌دیر قاراسی هنوز

خطین غوباری قویاشی اگرچی یاشوردی،

گؤزومو خیره قیلور یوزیین صفاسی هنوز

بهار یئتدی ده قانلار کی، تؤکدی گؤزلردن،

خزان اولاندا نه‌لر ائیله‌سون جفاسی هنوز

سوواردی‌لار قیلینجیلا مگر گولوستانی،

کی، بیر بیرینه قووشماز گولون یاراسی هنوز

حیات سویونا بیر داغ قویدو رشکی لبین،

کی، کئچدی عؤمری ابد، توشمه‌دی قاراسی هنوز

محیطی عشق آرا من اول حبابی بی‌باکم،

کی، گئتدی باشیم و باشیمدا‌دیر هواسی هنوز

وصال امیدینه عؤمرون کئچیردی کویینده،

یئتیشمز ایشلرینه صائبین دواسی هنوز

شاعر: صائب تبریزی

پیریمیز

بیز خرابات اهلی‌ییک، میخانه‌لردن چیخمیشیق

باده‌لر نوش ائتمشیک، پیمانه‌لردن چیخمیشیق

آتش غمدن نه قورخاق کیم، سمندر خصلتیک

شمع‌لر یاندیرمیشیق، پروانه‌لردن چیخمیشیق

پیریمیز پیر موغاندیر، خادم میخانه‌ییک

رندلر ذؤقین گؤروب، دیوانه‌لردن چیخمیشیق

ایندی بیر اکراه اولوب مئیدن، نظردن دوشموشوک

یوخسا مین مین مجلیس مستانه‌لردن چیخمیشیق

گاه اؤپوب یارین آیاغین، گاه دولاننیق باشینا

بیز پریشان زولف‌لر تک شانه‌لردن چیخمیشیق

بیر شعاعین ذرّه سیندندیر، فقط رنگ اؤزگه‌دیر

دیرلردن، مسجدِ ویرانه‌لردن چیخمیشیق

قدر و قیمت سیز بیزی ظن ایتمه واحد، عارف اول

پر بها گنجینه‌ییک، ویرانه‌لردن چیخمیشیق

شاعیر: علی آقا واحد

یامان گؤزده‌ن!

تؤکوب قانیم، روان، غیب اولدو اول سروِ روان گؤزده‌ن

بو روشن‌دیر که،قان توکجگ، اولور مردم نهان گؤزده‌ن

کمندِ زولفونه باغلی چیخار جان جیسمِ زاریمدن

کنار اولدوقجا هر لحظه او یارِ مهربان گؤزده‌ن

گؤزومده طفل تک اوینار خیالِ چشمِ مخموری

باسوب باغرینا مردم، قویماز آنی بیر زمان گؤزده‌ن

تکی مین اوخ رضایم، سینه‌مه پیوسته سانجیلسین

منی تا سالماسین اول دلبرِ ابرو کمان گؤزده‌ن

اگر بیر دفعه باغ ایچره بو قامتله خرام ائتسه‌ن

سالیر تا حشره‌تک اؤز سروِ نازین باغبان گؤزده‌ن

ائشیتدیم، غیرایله اول لاله اوزلوم سئیرِ باغ ائتمیش

خدایا، ساخلا سن اول ماهِ بی‌مهری یامان گؤزده‌ن

نئجه سرمست ایکن واحد، چیخیم میخانه‌دن هوشیار؟

منی بیر لحظه قویماز بزمده پیرِ مغان گؤزده‌ن

شاعیر: علی آقا واحد

ثواب ائده‌ر

معشوقه گرچه عاشقه ناز و عتاب ائده‌ر

عاشق شکایت ائیله‌مه‌ز، هر جوره تاب ائده‌ر

مین دفعه جور ائدوب منه بو ماه پاره‌لر

بیر دفعه‌سی یازیلسا اگر، مین کتاب ائده‌ر

من عاشقم، دئدیم، دئدیلر، ای اسیر عشق!

بیر درده دوشموسن کی علاجین شراب ائده‌ر

بیر آن شرابیم اولماسا، درد اؤلدوره‌ر منی

هر کیم بو درده چاره ائده، مین ثواب ائده‌ر

داغلاردا، لاله‌لر قدحی دولدو ژاله‌ده‌ن

گولگون شرابه غملی کونول‌لر شتاب ائده‌ر

جانا، لبیندن ائیله بو دردین علاجینی

اغیاره سرّی سؤیله‌مگه، دیل حجاب ائده‌ر

یا آل بو جانی، یا کی دوز‌لت احتیاجیمی

بو حسرت آتشی، منی، یوخسا کباب ائده‌ر

آلدیقدا جام مئی اَله، جمشیدی یاده سال

زرّین پیاله چوخلاری خانه خراب ائده‌ر

واحد، او شوخه دردینی ده جام وصل ایله

بیر لطف گؤستر‌رسه، سنی فیض‌یاب ائده‌ر

شاعیر: علی آقا واحد

شیونی نیلر!

چشمین که آلیر ناز ایله جان، شیونی نیلر؟

مژگانین اوخوندان ییخلان شیونی نیلر؟!

سرو چمنه قامتین افتاده‌سی باخماز،

محتاج تماشای رخین گلشنی نیلر!

سن جور ایله من یالواریم حقه، سن اینانما

تانریم، گورگ آخر، سنی نیلر، منی نیلر!

دفن ایله‌مه، اولسام سر کوینده شهیدین،

عریان گرگ عاشق، کفنی، مدفنی نیلر!

جان و تنی نذر ایله میشم راه وفا ده،

یارین سئوه‌ن عاشق داخی جان و تنی نیلر!

غم پیرهنین سیل سرشک ایچره بوراخدیم،

گرداب‌ده غرق اولسا گمی، یلکنی نیلر!

ئوز دوستی که، مین جور ایله‌دی واحده، گیتی،

قیل ایندی تصوّر اونا، گؤر دشمنی نیلر!

شاعیر: علی آقا واحد

دیوانه‌لره

او قـارا زولف که هر دم دولاشیـر شانه‌لره

گؤستریر عشق کمندین دل دیوانه‌لره

مهرِ روخسارینی مندن کسوب اول ماه تمام

دوشدی فرصت یئنه بوندان بئله بیگانه‌لره

یوخسا، ای گول بو قدر باده‌ی ناب ایچمه‌ز ایدیم

شوقِ لعلین منی جلب ائیله‌دی میخانه‌لره

قانا دؤنسون، گؤروم، اول باده‌ی گولگون سنسیز

بیر ده، گر رغبت ائدیم ساغر و پیمانه‌لره

حسرت چشمِ خمارین، لبِ لعلین هـوسی

گؤستریر گوشه‌ی میخانه‌نی مستانه‌لره

شوقِ روخسارین ایله اودلارا یانمش کؤنلوم

اؤرگه‌دیب شمعده یانماقلیغی پروانه‌لره

جؤرین آز ائت منه، قورخوم بودو، بیر آه چکیم

بیر یانار اود دوشه باشدان باشا کاشانه‌لره

واحدم، شاعیر آزاده پرستم، نه غمیم!

قیلماسام رغبت اگر مسجده، بوتخانه‌لره

شاعیر: علی آقا واحد