وار اولاندان سور ...

شفای وصل قدرین، هیجرایله بیمار اولاندان سور

زلال شوق ذوقون، تشنه‌ی دیدار اولاندان سور!

لبین سیرّین گلیب گفتاره مندن، ئوزگه‌دن سورما

بو پنهان نکته‌نی، بیر واقف اسرار اولاندان سور

گؤزو یاشلیلارین حالین نه بیلسین مردم غافل؟

کواکب سرینی، شب تا سحر بیدار اولاندان سور!

خبرسیز اولما فتّان گؤزلرین جؤرون چکن‌لردن

خبرسیز مست‌لر بیدادینی، هشیار اولاندان سور

غمیندن شمع تک یاندیم، صبادان سورما احوالیم

بو احوالی، شب هیجران، منیم‌له یار اولاندان سور

خراب جام عشقم، نرگس مستین بیلیر حالیم

خرابات اهلی‌نین حالین، یورو خمّار اولاندان سور

محبّت لذتیندن بی‌خبردیر زاهد غافل

فضولی! عشق ذوقون، ذوق عشقی وار اولاندان سور

شاعر: ملامحمد فضولی