قانلی زمان

گینه آلیپدی زامان شور عاشقانه می الدن

نگاری اوخشاماقا وئرمیشم بهانه می الدن

غزل آدیندا قیزین ساچلارین داراخلیاریدم

چیخارتماسایدی زمانه ماراخلی شانه می الدن

یارین کامان قاشینا کونلومو نشانه بیلیردیم

دییپدی تیر جفا وئرمیشم نشانه می الدن

حیات چشمه سینین ایزلرین گوزونده گورردیم

او گؤز یاتاندان آلیب عمر جاودانه می الدن

کونول قوشوم یووا سالماخدایام یاشیل چمن ایچره

خزان یئلی اسه ره ک آلدی آشیانه می الدن

ائلین ترانه لریلن دونه ردی جنته یوردوم

آپاردی بمبلا موشک سسی ترانه می الدن

ووراردی شعر آغاجی یازدا مین جوانه کونولده

قوجالتدی کونلومو قیش آلدی مین جوانه می الدن

خیال قاناد چالاراق «عاصم» ام سماده گزردیم

دمیر قانادلی لِی آلدی اوشَن فسانه می الدن

یئر اوزره اود یاغاراق سازکول اولدی سیمده قیریلدی

چیخارتدی جبر زمان چنگیلن چغانه می الدن

گل ای طراوتی پوزقون چمنلره گتیرن یاز

اوزانسا قیش آلاجاق طبع شاعرانه می الدن

عاصم کفاش اردبیلی 29 اسفند 1366 اردبیل- مجموعه ی شعر سوزلو گوزلر

زندگی نامه ی استاد عاصم اردبیلی

صالح عاصم کفاش معروف به پرویز که در شعر "عاصم" تخلص میکند روز13 دی ماه 1320 در محله ی قدیمی جمعه مسجد اردبیل در خانه ی پدر بزرگ فقیدش شادروان غلام عسگر عاصم کفاش- که از خادمین دربار حسینی و شاعری دل سوخته و بی تکلف بوده- قدم به جهان هستی گذاشت. پدر مرحومش اسمعلی دارای ذوق ادبی بود و در راسته ی کفاشان بازار اردبیل به کفاشی اشتغال داشت.

صالح عاصم تحصیلات ابتدایی را در دبیرستان سنایی واقع در کوچه ی حسن آباد و تحصیلات متوسطه را در دبیرستان پهلوی و صفوی به پایان رسانید. پس از انجام خدمت وظیفه وارد تربیت معلم تبریز شد و پس از گذراندن دوره ی آموزشی یک ساله به زادگاه خود بازگشت تا به عنوان معلم استخدام شود و در دبیرستان های اردبیل به تدریس پرداخت. وی در سال 1353 به دانشسرای عالی تهران راه یافت و در رشته ی زبان و ادبیات انگلیسی به اخذ مدرک لیسانس نائل گردید.

عاصم، علاوه بر مهارت در مراثی غزل های اجتماعی و چارپاره های هجایی، منظومه های شیوایی به صورت بحر طویل دارد که از آن جمله می توان به قطعه ی سوری(جهنمده بیتن گول) و شیخ محمد(ایکینجی بهلول) اشاره کرد.

آثار چاپ شده از این شاعر عبارتند از:

1- قانلی سحر 1373

2- یارالی دورنا 1377

3- نیسگیللی گولوشلر 1382 

۴- سوزلو گوزلر 1388

عاصم در حال حاضر عضو انجمن های ادبی شعرای آل محمد(ص)، حافظ و نیز انجمن شعر و ادب اردبیل می باشد و در غالب مراسم ملی مذهبی فعالانه شرکت می کند و سرودهای خود را به سمع علاقه مندان می رساند. با نقل یک بند از ترکیب بندهای عاصم این نوشته را به پایان می بریم:

وفا سیز دهریدیر (عاصم) وفا سیزدان وفا اومما

خزان تاراج ائدن گلزاردن، روح صفا اومما

کئچین دردیله، ناکس دن شفا اومما، دوا اومما

کی ذلت عشقی دانماق دور حسینون جان نثاریندن

گوزگو داش اولدی

گوردون گوزه لیم گوزگو نهایت ده داش اولدو

باشلار ایاق اولماق دا ایاق دوندو باش اولدو

گوزده ن کیمی ائل آتدی گئدیب غیره ال اولجاق

گوزده ن نه فقط دوشمه دی گوز اوسته قاش اولدو

ایل لر بویو گوردوک قورویان آرخا سو گلسین

سو گلمه دی آنجاق کی گولوف لرده یاش اولدو

قارداش قاراداش دان آشاقی بولگو بولنده

قانلی دویوشون جان بازاریندا داداش اولدو

بیر سورمه لی گوز قالمیش ایدی پاخلا گوزون ده

گوز دگدی او بیچاره یه گوز چیخدی ماش اولدو

ایش دوندو چراغ سوندو سماده ن قیر الندی

اول گون کی قویون قوردولا "عاصم" هاماش اولدو

استاد عاصم اردبیلی

قاتماقاریشیق سوزلر

ای نازنین اول جه گلیب من ده ن آل منی

بیر گون ساتاندا ایسته دیگون حاله سال منی

هجران نوالی نی کیمی قیمت ده یونگولم

گوستر محبتین سورا بیر عمر چال منی

سینمده چئوریلیب زهره ایچدیگیم سودا

ازبس چکیب دی چارمیخا بوش قیل و قال منی

گاه بال کیمین شیرین دی دادیم گاه زهر کیمین

بئش دیقه امتحان ائله داد دال با دال منی

توشدوم غزل خیالینه دلداری اوخشایام

دردین الینده ن آلمادی آنجاق خیال منی

ائل ده ن گوزوم سوزآچدی دیلیم سوسدی دینمه دی

کورلاردا حق واربیله یوردومدا لال منی

من بیرقوشام اسارت، اولوم حکمودور منه

یوخ فرقی آل جانیم یادا زندانه سال منی

سوردوم خیال آتین باغا حال آختاریب تاپام

آت هورکدی ایت یوگوردی یئره چالدی حال منی

شعریمده ایسته دیم قالا ایمن ده مال داوار

بیلمه ام نه اولدو ووردو داوار یولدو مال منی

من بیرموتال چی ییت سوزو آتدیم ایت آغزینا

کئفلندی ایت قودوز کیمی قاپدی موتال منی

گیردیم آیی لا بیر چووالا چنگه لشمه گه

حیوان کی یوخ بودارلادی یول سوز چوال منی

گئتدیم کمال اهلینه دستانی سئوله یه ام

یئتمیش یاشیمدا بیلدی کمال اهلی کال منی

گلدیم شعر یغینجاسینا فیض کسب ائده م

گوردوم ائدیرله آلت جنگ و جدال منی

گئتدیم عزا محافیلینه مطلب آلماقا

مومن لر ائتدی خولی یه شمره مثال منی

گاه ایسته دیم کی قاره یه آق سئوله یم ولی

بیلیدم کی آغلارائتمه یه جک لر حلال منی

ظنیم بو ایدی دوستا افندی خطاب ائده م

گوردوم چتین باغیشلایا تورگوت اوزال منی

بیریول دا کونلوم ایسته دی کوک ده ن عرب له نم

گوردوم ائلیم ده ن آیری سالار انفعال منی

وئردیم بو پیرتداشیق سوزومو تارچی سیزلایا

تارتوشدو تیرتیرا داشا باسدی قاوال منی

دوستوم سوروشدو شعرده ن عاصم نه تاپموسان؟

دردا جوابیم اولمادی بوغدی سئوال منی

واقتسیز خوروزکیمین منی سوزبانلادیر اودور

یئرسیز دئیل کی دانلایا اهل و عیال منی

من قافیه گزنده چاپان چاپدی یوردومو

وئردیم خارال خارال پولو تاپسین مارال منی

آنجاق مارال دا دوزمه دی فقرین فشارینا

آتدی یامان زامان دا اوزیبا جمال منی

نشرائیله دیم بوسوزلری حشمت لی ائل لره

ائل لرده ائتدی شاعر صاحب مدال منی

من یازدیم ائل بگندی سوزوم دوشدو دیل لره

سالدی ایاقدان هجرده ن آرتیق وصال منی

کس لرسوزونده داغ کیمی بویلاندی سوزلریم

ناکس ایاغی آلتدا خیال ائتدی نال منی

عاصم ائلین دینن دیلی دیر ساخلا حورمتین

نال آرزیسین بوراخ ائله بوینوندا شال منی

استاد عاصم اردبیلی

سارا سن

نه وامق من نه عذراسن نه من مجنون نه لیلا سن

منی جانا گوزون ده غرق ائده ن طوفانلی دریا سن

دیریلدیرسن نگاهونله توکورسن قان سپاهونله

منیم ظنیم جه گه چنگیز سن گاهی مسیحا سن

نه قهرون ده ن منیم ایمن قالار بو قان اولان کونلوم

نه مهرون ناردن ساخلار منی اولما زلیخا سن

سنیلن من منم سن سیز کیم ام ای نازنین بیلمه ام

بونوبیللم کی ذهنیمده آچیلماز بیر معما سن

بوغازیمده ن قوپان های سان منه حق ده ن چاتان پای سان

دئیه بیلمه ام کیمه تای سان کی سن هر حسنه دارا سن

بولاق سان داغ دوشونده یا قیزیل گول سن یاشیل باغدا

کی بوندان باش گلر سن عطرده اوندان مصفا سن

سوزون وارسوزلو سازلاردا ایزون وار شانلی یازلاردا

دنیز خوی لی آرازلاردا زامان تا واردی گویا سن

کیمه بیربوغدا غیرت چاتسا سنده ن غیره باش اگمه ز

بلی سن آدمی آلداتمایان بیر آیری حوا سن

عنایت قیل سنون بیر غمزه وون محتاجی دیر "عاصم"

کی سن قسمت ده سهمی سن عصمت لی سارا سن

استاد عاصم اردبیلی

داغ دایاق لی...

ای نازنین گئدنده اوزونلن آپار منی

قالسام بیلیرسن اولدوره جک انتظار منی

دونموش چاغیمدا یای نفسینلن سواولموشام

گوستر محبتین قاراقیشدان قوتار منی

حسرتده یه م یاشیلیقا ای یام یاشیل یازیم

سن سیز داریخدیرار بوچیچک سیز باهار منی

من اووچویامسا سن کیمی شیرین شکاری ام

کیپریک اوخون کامان قاشا قوی ائت شکار منی

اغیارایلن عومور، عومور اولماز ممات دیر

باش دیر حیات ده ن اگر اولدورسه یار منی

سینه مده سوزلریم قالانیب دیر قاطار قاطار

هاردان بولال جماعته ائل لر قاتار منی

من ائل لرین دینه ن دیلی ام سانما دینمیره م

سوسموش دیلیم گلر سوزه دیندیرسه تار منی

من لال سکوت دا زهرلی فریادی دینلیره م

ای مدعی حیا ائله چوخ سانما کار منی

تا ائلده نم اولن گونه جک داغ دایاقلی یام

حاشا ائلیمده ن آیری سالا شاختا قار منی

آیدینلایب عیاریمی ائل لر قیزیل کیمی

"عاصم" اوجالداجاق بئله بیر اعتبار منی

استاد عاصم اردبیلی

الماسایدی

جاندان دوشردی کونلوم، جـانانه اولماسایدی

چاتمازدی شمعه شهرت، پروانه اولماسایدی

تـئللر اسـیب سـالاردی عـاقیللری آیــاخـدان

زنــجیر زولفــه بـاغلی دیــوانه اولمــاســایدی

میخانه لرده باده مـوشکول دوشــه ردی یـاده

آهـو باخیشلی گــوزلر خـمخانه اولمـاسـایدی

بــــاد صـــبا پــوزانــدا گیــــسولرین نــــظامین

اولمـازدی یـاره کـونلوم گرشـانه اولماسـایدی

مــنع شــراب ائـــدردیم زاهــد مـــثالی مــنده

پــیمانی سـیندیراردیـــم پـیمانه اولمـاسایدی

مــین درد عشــقه چــاره ائــیلردی بـیر اشاره

جـان دردیــنه گــوزه للر بــیگانه اولمــاسـایدی

گـول تک گـولردی اوزلـر قان آغـلامازدی گـوزلر

گـــوندن دورو حــقیقت افسـانه اولمــاسایدی

روحوم قوشون ائدردیم جان دوستاغیندان آزاد

حاجت بو جسـم آدیـندا زنــدانه اولمــاسایدی

گنج محبت "عاصم" سالمــازدی یئر اوره کـده

جانان یـولـوندا کــونلون ویـــرانه اولمــاسایدی

استاد عاصم اردبیلی

قانلی سحر

فلکین قانلی الیندن بیر آتیلمیش یئره اندی،
بیر فلاکت آنانین جان شیره سیندن سودون امدی،
بوللو نیسگیل شله سین چیگنینه آلدی
تای توشوندان دالی قالدی،
ساری گول مثلی سارالدی
گونو تک باغری قارالدی 

خان چوبانسیز سئله تاپشیرسین اوزون،
یوردوموزا بیر سارا گلدی
بیر وفاسیز یار الیندن یارا گلمز سانا گلدی
بیر یازیق قیز، جان الیندن جانا گلمز جانا گلدی
کئچه جکده الموت دامنه سیندن بورایا درمانا گلدی
بیرآدامسیز سوری آدلی، الی باغلی، دیلی باغلی!
سوری کیم دیر؟
سوری بیر گول دی جهنمده بیتیبدیر
سوری بیر دامجی دی، گوزدن آخاراق اوزده ایتیبدیر
سوری یول- یولچوسودور، ایری ده یوخ، دوزده ایتیبدیر
سوری، بیر مرثیه دیر اوخشایاراق سوزده ایتیبدیر
او کونول لرده کی ایتمیش دی ازلدن، اودو گوزدن ده ایتیبدیر
سوری بیر گوزلری باغلی، اوزو داغلی سوزوداغلی،
اولوب هاردان هارا باغلی!
بوشلاییب دوغما دیارین، اوموب البته یاریندان
ال اوزوب هر نه واریندان
قورخماییب، شهریمیزین قیشدا آمانسیز بورانیندان، نه قاریندان
گزیر آواره تاپا، یاندیریجی دردینه چاره، تاپابیلمیر
چوخ سئویر عشقی باشیندان آتا، آمما آتا بیلمیر
اووا باخ آووچی دالینجا قاچیر، آمما چاتا بیلمیر
ایش دونوب، لیلی توشوب چوللره مجنون سوراغیندا
شیرین الده تئشه، داغ پارچالاییر فرهاد اوتورموش اوتاغیندا
تشنه لب قو نئچه گور جان وئری دریا قیراغیندا
گوزده حسرت یئرینی خوشله ییب ابهام دوداغیندا
وارلیغین سون اثری آز قالیر ایتسین یاناغیندا
سانکی بیر کوزدی بورونموش کوله وارلیق اوجاغیندا
کوزه ریر پیلته کیمین، یاغ توکه نیب دیر چراغیندا
بوی آتیر رنج باغیندا؛ قوجالیر گنج چاغیندا،
بیر آدامسیز، سوری آدلی، الی باغلی، دیلی باغلی!
سوری جان!
اومما فلکدن، فلکین یوخدو وفاسی،
نه قدر یوخدو وفاسی، او قدر چوخدو جفاسی،
کوهنه رقاصه کیمین، هر کسه بیر جوردی اداسی،
او آیاقدان دوشه نی، ایستیر آیاقدان سالان اولسون
او تالانمیش لاری ایستیر گونو- گوندن تالان اولسون
او آتیلمیشلاری ایستیر هامیدان چوخ آتان اولسون
او ساتیلمیشلاری ایستیر قول ائدرکن ساتان اولسون
نئیله مک قورقو بوجوردور
فلکین نظمی ازلدن اولوب اضدادینه باغلی
قاراسیز آغلار اولانماز،
دره سیز داغلار اولانماز
اولو سوز ساغلار اولانماز
گره ک هر بیر گوزه له بیر دانا چیرکین ده یارانسین،
بیری انسین یئره گوکدن، بیری عرشه اوجالانسین
بیری چالسین ال آیاق غم دنیزینده،
بیری ساحیلده سئوینج ایله دایانسین
بیری ذلت پالازین باشه چکیب یاتسادا آنجاق،
بیری نین بختی اویانسین
بیری قویلانسادا نعمت لره یئرسیز،
بیری ده قانه بویانسین
آی آدامسیز سوری آدلی، ساچلاریندان دارا باغلی!
نئیله مک ایش بئله گلمیش. چور گلنده گوله گلمیش
فلکین ایری کمانینده اولان اوخ آتیلاندا دوزه دگمیش،
دیلسیزین باغرینی ده لمیش
ایری قالمیش، دوزو اگمیش
اونو خوشلار بو فلک،
ائل ساراسین سئللر آپارسین،
بولبول حسرت چکه رک گول ثمرین یئللر آپارسین
قیسی چوللرده قویوب
لیلی نی محمللر آپارسین،
خسرووی شیرین ایلن ال اله وئرسین، کئفه دولسون،
سوری لار سولسادا سولسون،
بیری باش یولسادا یولسون،
سیقسا بیر اولدوز اگر اولماسا اولدوزلار ایچینده،
بو سماء ظولمته باتماز
داش آتان، کول باشی قویموش،
داشینی اوزگه یه آتماز
سن یئتیش سون هدفه،
اوندا فلک مقصده چاتماز،
داها افسانه یاراتماز
سوری، ای باشی بلالی، زامانین قانلی غزالی
سوری بیر قوش دی خزان آیری سالیبدیر یوواسیندان،
ال اوزوبدور آتاسیندان،
جوجه دیر حیف اولا سود گورمه ییب اصلا آناسیندان
او زلیخا کیمی یوسف ایی ین آلمیر لباسیندان
بونا قانع دی تنفس ائله ییر یار هاواسیندا
درد وئرن درده سالیب آمما خبر یوخ داواسیندان
آغلاییب سیتقایاراق بهره آپارمیر دوعاسیندان
او بیر آئینه دی رسسام چکیب اوستونه زنگار،
اوندا یوخ قدرت گفتار،
اوزو چیرکین، دیلی بیمار،
گنج وقتینده دل آزار،
گوره سن کیم دی خطاکار،
گوره سن کیم دی خطاکار! 

شعر: عاصم اردبیلی