چکیب هارای

آمان- آمان منی بیر زولف یار یاندیردی!

گؤرون منی نئجه بو زهرمار یاندیردی!

چکیب هارای، قیلیب نؤوحه ائیلرم فریاد،

نه گؤزلوسوز، منی بیر گول‌عزار یاندیردی!

قیلیب کباب منی، چکدی شیشه هر ساعت،

تؤکوب گؤزوم یاشینی، زار- زار یاندیردی

نئجه دئییم کی، منی یاندیریب نه غایتده،

مجوس آلوس و کیمی تؤکدو خار یاندیردی

او جادو گؤز، سنه قوربان، منی بو حاله سالیب،

سنه گمان کی، منی روزگار یاندیردی؟

خزان اولاندا، دئییرلر شجر تؤکر برگین،

خزانی گؤر کی، منی نو باهار یاندیردی

نه جام وصل ایچیب، نه گول مراد دریب،

عبث– عبث منی رنج خومار یاندیردی

نباتی، ائتمه شیکایت کی، اود توتوب یاندیم،

او بینوانی دا چوخ آشکار یاندیردی

نباتی