سنی من گورممیشیدیم ولی سنلن تانیشیدیم نه دن؟

بوباغین بولبولو بیرده ن بیره لال اولدو نه دن؟

قوزقونا قارقایا جولانه مجال اولدو نه دن؟

شانلی یازکسمیشیدی قاره قیشین بوز نفسین

یازا چیخمیش صونالار غرق ملال اولدو نه دن؟

هانکی صرصر الی پرپر ائله دی گول چیچگی

بو برومند آغاجین میوه سی کال اولدو نه دن؟

بیز کی جان جان دئمه دیک اولکه ده قان قان دئینه

سئوگی منظومه سی حال اهلینه قال اولدو نه دن؟

مِیِ انگوری سؤزوم یوخ کی حرام ایدی بیزه

انسانین قانینی نوش ائتمه ک حلال اولدو نه دن؟

بیز بیلردیک کی دوغولماز یئنی دن رستم زال

یوردون حرّاجه قویان رستم زال اولدو نه دن؟

ایسته دیک سیره چیخاق ماوی سمالرده بیر آن

سیندی قُول یاندی قاناد سیر محال اولدو نه دن؟

آی کیمین آیدین یدی (عاصمه) ناحقّیله حق

پس حقین قامت موزونو هلال اولدو نه دن؟

صالح عاصم اردبیلی 

به نقل از وبلاگ دکتر فیروزی

دوستلار گوروشو

دوستلار گوروشونه آنا یوردومدان

کونول بوقچاسیندا سوز گتیرمیشم

ادب باغچاسیندا سولماز گوللره

آراز کیمین آغلار گوز گتیرمیشم

دالغالی دنیز تک جوشوب چاغلایان

ائلر یاراسینی آچیب باغلایان

چئوریب بولودا قان یاش آغلایان

شعریزه بیر چیمدیک دوز گتیرمیشم

اولو بابالاردان یادگارلارا

عاشیقلار جمعینده بسته کارلارا

تایسیز ایگیدلره وورغون یارلارا

منده بیر وورغونام اوز گتیرمیشم

شعرین اوجاغیندان قالخان کوزلره

اوزون گئجه لرده اویاق گوزلره

سینه لر یاتاغی اودلو سوزلره

سولطان ساوالاندان بوز گتیرمیشم

وورغونام او آیدین گئتدیگیز یولا

نه ساغا باغلی سیز نه ده کی سولا

گلمیشم سیزیلن وئرم قول قولا

خورجوندا نه ییم وار دوز گتیرمیشم

محبت ایپه گین آچیب سرمه گه

کونلوزون آغری سین بر آز درمه گه

ظولماتا گونش تک سینه گرمه گه

یانیقلی سازیمدا کوز گتیرمیشم

ائشیتدیم سوز قیزین بوردا آلان وار

عاصیمین باغیری تک داردا قالان وار

غزل باغچاسیندا نغمه چالان وار

قارا تئل سارا تک قیز گتیرمیشم

من آنا یوردومون بیر دیلمانجی یام

بیر جوما آرزی یام، شعرم، سانجی یام

دنیزلر اونونده ایتگین دامجی یام

گونشه دیرماشان توز گتیرمیشم

صالح عاصم اردبیلی

سئوگی دن افسانه یاراد

گؤزلیم! سالما گؤزوندن منی، بیگانه کیمین

اذن وئر، شوط ائدیم اطرافینی پروانه کیمین

بخت آئینه سی تک، سیل اوره گیندن کدری

تا صداقت باخیشیندان جوشا، میخانه کیمین

اوخو عشقین کیتابین، سئوگی دن افسانه یاراد

کؤنلومو شوقیله سرشار ائله، پیمانه کیمین

روحوم آشوفته دی، زولفون کیمی آی سیزدی گئجه م

بو پریشانلیغا بیر نظم یاراد شانه کیمین

گل گؤزللر آرا، بی رحمیلیگ آییننی پوز

سالما اؤز عاشیقینی چوللره، دیوانه کیمین

بولبولم، قهر زمان، باغدان اوزه ندن الیمی

قارا خالیندی چکن دامه منی دانه کیمین

گل ملامت داشی آلتیندا، بو بیچاره کؤنول

تالانیب قیش گونو، تاراجه گئدن لانه کیمین

گون کئچیب، آی دولانیب، ایللر اؤتوبدور هله ده

سینه ده ساخلامیشام گنجیمی ویرانه کیمین

گلمه دین، اوندا کی جان دردینه درمان واریدی

ایندی درمان دا منه درد دی جانانه کیمین

عاصمین طبعی، صداقت بولاغیندان سو ایچیر

گر چی دؤزگونلوگ، اولوب دهرده افسانه کیمین

عاصم اردبیلی

شهید عشق اولوب ...

اگر چه آیینه‌تک کئچدیم جهانین جمله وارین‌دن

هنوز آردیمجادیر قید تعلق، زلف تارین‌دن

شهید عشق اولوب فیض بقا کسب ائیله‌مک خوشدور

نه حاصیل بی‌وفا دهرین، حیات مستعارین‌دن

حباب اشک و آه پرشرر، قیلمیش منی فارغ

جهانین قصر سیم اندود و کاخ زرنگارین‌دن

گورونمز صورت امید وصلین، لوح جانیم‌ده

مکدر دیر مگر اول آینه، جسمیم غبارین‌دن

اوزانیر رشته، طول امل، دیدار ذوق‌ایله

خم آچیلدیقجا، اول گلچهره زلف تابدارین‌دن

سنه‌دیر اقتداسی طواف کوی لیلی ائتمکده

خس و خارین قوپار ای ناقه، مجنون رهگذارین‌دن

"فضولی"دن، ملامت احترازین ایسته‌ین گویا

دئییل واقف، دل سوزان و چشم اشکباریم‌دن

شاعر: حکیم ملا محمد فضولی

پوخته اولماغا چوخ سفر گرگ

گئت دولانگیلن، خامسن هنوز

پوخته اولماغا چوخ سفر گرگ

مرغ قافیله همزبان اولـوب

دؤوره وورماغا بال و پر گرگ

کوه عشقه گل، گئتمه بی دلیل،

غول دنگ تک دوشـمه چوللره

تا کی سالیکه رهنمون اولا،

خیضـر ره کیمی راهبر گرگ

یوخ یالان دئدیم هرزه سؤیله دیم،

واضحین دئییم، دوغرو سؤیله ییم

حققه عارفی واصیل ائتمگه،

بیر دوداقلاری گول شکر گرگ

زولفی عنبرین خالی نازنین،

غنچه تک دهان، قاشی جان سیتان

شاه گولروخان، ماه بی قرین

نسترن کیـمی سیمبر گرگ

لاله تک أوزو آل یاناق اولا،

تازه گول کیمی تر بوخاق اولا

آغ آیاز أوزو آیدان آغ اولا

قاشلاری اونا هم سپر گرگ

همعینان اولا مهر و مار ایله

هم زبان اولا نور و نار ایله

زولفو بحث ائده شاهمار ایله

گنج سینه سی پر گؤوهر گرگ

حققه آشـینا، خلقـدن جدا،

ائیله میش اولا نفـی ماسوا

ترک ائده بوتون یاردان ادا

اول مسیح تک بی پدر گرگ

قویگیلن قدم دیره لاجرم،

نقش بوتده گور سیرر وحدتی

بو چگونه دن واقیف اولماغا

بیر جنون حق، مرد أر گرگ

آز دانیشگیلن، اولگیلن خمـوش،

ائتمه عالمی سیرر عشقی فاش

بوردا دورما چوخ، گئچ بو ورطه دن

بو مقوله ســؤز مختصر گرگ

منع قیلمایین چوخدا زاهیدی،

عذرو وار اونون، عاشیق اولماییب

او عبث یئره خلق اولونماییب،

باغبانه بیر کلّه خر کرگ

جد و جهد قیل، عارف اول، گؤزوم،

علم عشقدن اولما بی نصیب

جوم بو بحره بیر، تاپ او گؤوهری

عاشقم دئین ترک سر گرگ

راه پر خطر، بخت واژگون،

زولف یار تک شب سیاهگون

ایندی غئیبدن خان چوبانینا

نخل طوردن بیر شرر گرگ

هر خسیسه گل ائتـــمه التــجاءِ

اولماز اؤزگه دن حاجتین روا،

مشکول آچماغا شاه لافَتی

عنتر اولدورن شیر نر گرگ

بو جواهیرین یوخدو قیمتی،

آچگیلن گؤزوم یاخشی سئیر قیل

هر بیری ده یَر چین خراجینا،

موفته وئرمرم، سیم و زر گرگ

بیر گوزل جوان ایسترم، همان

کیم بو سؤزلری ائیله سین روان،

هاردا دیر دئسین بیر شکر زبان

کیم بو سؤز منه عامی تر گرگ

ساقی! گل منه جام عشقیدن

بیر کرم قیلیب اؤیله مست قیل،

تا دئسینله خلق لال اوتورماغا

بو نباتی تک بخته ور گرگ

سید ابوالقاسم نباتی

بولبول گولوستانه گلسین گلمه سین؟

صبا منـدن سؤیله او گولعذاره

بولبول گولوستانه گلسین گلمه سین؟

بو هیجران دوشگونو، ایللر خسته سی

قاپیـنا درمانه گلسین گلمه سین؟

من قوربانی اولوم عنبر تئللرین

غنچه دوداقـلارین، پسته دیللرین

او لاله رخسارین، مشکین خاللارین

اودونا پروانه گلسین گلمه سین؟

گؤزوم چوخ حسرتدیر خومار گؤزونه

گونش جمالینا شَکـر سؤزونه

اوتانیرام نئـجه دئیـیم أوزونه

دردین خسته جانه گلسین گلمه سین؟

دولاشدیـر بوینوما شمشاد قولونو،

قوجاقلاییم، قوجوم اینـجه بئلینی

لعل لبین أمیم، سوروم دیلیـنی

ایستر ألی جانه گلسین گلمه سین!

نباتی ایسته مز سنسیز دونیانی

عزّتی، حؤرمتی، شوکتی، شأنی

بیر زادا قالمایبدی داها گومانی

بو باش او میدانه گلسین گلمه سین؟

سید ابوالقاسم نباتی

بیر گوله اول طالیب دیدار

ایتدی منی غم تاپداغی بیر گوزلری خوممار، بیر دیلبر عییار،

ساقی منه وئر لوطفیله بیر ساغرِ سرشار، غمدن منی قورتار

یوخ غایتی تقریر ایله سم مین گئجه- گوندوز، شرح غم عشقی،

پایانا یئتیشمز، نه قیلیم درد دیل اظهار، مین گیزلی سؤزوم وار

ائتمین منی مجنونا برابر سیزی تانری، ای اهل خرابات،

گؤردو نئچه یول یارینی اول عاشیق حررار، اول ساکین کوهسار

الله بیلیر من کیمی بیر عاشیق محروم، دونیادا تاپیلماز

شاهیددی بو احوالا ایکی دیده خونبار، هم آه شرر بار

هر دم دیلرم چاره اجلدن غم هیجره، گلمز کی نه حاصیل

قالدیم بئله بو دردیله بی مونیس و غمخوار، بی یار و مددکار

ای عشقه دوشن عاشیق بیچاره، یقین بیل! کیم دادا یئتن یوخ،

من ائیلمه دیم دوغروسو آللاهیما اقرار، خوشدورمنه زوننار

مسدود اولوب چار طرفدن منه، یاران، ابواب فتوحات،

گویا کسیلیبدیر منه بیر محرم اسرار، بیر وفادار

افسون و فسونون اثری اولمادی هرگیز، اول طورفه نیگارا،

آسان ایشیمی ورد و دوعا ائیله دی دوشوار، قالدیم بئله ناچار

نه عقلده کام اولدو مؤیَسسر، نه جونوندا، ای عارف سالیک،

سن مندن ائشیت، بیر گوله اول طالیب دیدار، اگلش بئله بی کار

فاش ائتمه گیلن سررینی هر جاهیل و خامه، اول عاشیق کامیل،

سن اولماگیلن من کیمی هیجرانا گیرفتار، مهجور و دیل افگار

هیجران دئمیش اول دم، قلم اود دوتدو، آلیشدی، آهیم شرریندن،

بیر خنجر خونریز گتیر، باغریمی بیر یار، بیر گؤر کی نه لر وار!

زهر ائیله دیلر بو ایکی گون دیرلیگی بالله! من عاجیر زارا،

کور ائتدی منی جؤوریله بو چرخ ستمکار، جاندان نئجه بیزار!

چوخ ائتمه شیکایت ستم چرخدن، ای دیل! خوش شیوه دگیل بو،

ایسترسن اگر گؤرمیه سن طعنه ی اغیار، آه ائیلمه، زنهار!

اول سنگدیلین باشینا چوخ دؤیمه نباتی! والله کی یانارسان،

تؤک قانلی سیرشکین، دهء گیلن صدقیله تکرار: یا حیدر کرار!

سید ابوالقاسم نباتی

گوزلرون ده نه وار

گوزون دولوب سوزایلن بیلمیره م گوزون ده نه وار؟

اوزون گورن ده دیلیم لال اولور اوزون ده نه وار؟

باخان دا شـوق ایله شمشاد مثـلی قامت اینه

تاپانمیرام اوزومــو نازنین اوزون ده نه وار؟

آجی سوزون منه بال دان شیرین دی بیر سوزه گل

اوزون بویور بو معما نه دیر؟ سوزون ده نه وار؟

نه کوزدو کونلومو یاخدیقجا داغ لی لاله بیته ر؟

بو شـوره زاری گلستان ائده ن کوزون ده نه وار؟

عومور یازین دا کی کونلوم سن ایله یازلاندی

او یازلا یازلانیرام دادمیشام گوزون ده نه وار؟

او گون کی آیریلیقا چاره، دوز، دئدین هله لیک

اطاعتین ده وار عاصم گوره دوزونده نه وار؟

دئمه اوزون ده، سوزون ده، گوزون ده اولدوغونو

گوزون دولوب سوز ایلن کاش بیله ام گوزون ده نه وار؟

صالح عاصم اردبیلی

بیر گؤزو شهلا دلیسی

اولدی کؤنلوم یئنه بیر زولف چلیپا دلیسی

دوشدو زنجیره نه خوش یئرده بو سئودا دلیسی

عور و عریان،  باش آچیق، اوز چئویریب صحرایه

قویدو مجنونو یاری یولدا بو صحرا دلیسی

عاشیق سوخته دیر، بولبول شئیدا کی دگیل؛

کی اولوبدور دئیه سن بیر گول حمرا دلیسی!

ربّ اَرنی دیلنین ذیکری، دؤنوب موسایا

دشت ایمنده اولوب نور تجلی دلیسی

چوخلارین مست قیلیب ساقی میخانه عشق

گؤرمدی کیمسه منیم تک بئله رسوا دلیسی

دئمه فرهادیله مجنون دلیدیر بیر بری باخ

بیری شیرین دلیسیدر، بیری لیلی دلیسی

کنج وحدتده تباه اولدی عزیز عؤمروم حئییف!

اولمادی یار منه بیر بوت زیبا دلیسی

خوشلاییبدیر گؤره سن هانسی مزارستانی

دیون اول زاهیده ای بیر کؤکه حالوا دلیسی

باشینی آز یئره دؤی، دنگ صیفت، ای حیوان!

آلمادی جنّتی بیر آرپایا مولا دلیسی

گول ایاغینده سحر واختی ییخیلمیشدیم مست

بیری سسلندی کی ای بیر گول رعنا دلیسی

بیر آییل گؤر کی نباتی نئجه اوراد ائیلر

نه یاتیبسان بئله؟ ای بیر گؤزو شهلا دلیسی!

سید ابوالقاسم نباتی

گئتمه

سن سیز اوره گیم ناره گرفتار اولو گئتمه

کئچمیش قارا گونلر منه تکرار اولو گئتمه

مین دردیمه درمان گتیریب نرگس مستون

گئتسون دل سودا زده بیمار اولو گئتمه

اون دورت گئجه لیک آی کیمی ساچ کونلومه یوخسا

زولفون کیمی آیدین سحریم تار اولو گئتمه

کونلوم قوشو چیخمازدی چمن سئیرینه سن سیز

سنلن گوزلیم مایل گولزار اولو گئتمه

حاشا گوله بیر گول اوزومه دهر ده سنسیز

گولشنده ده گوللر گوزومه خار اولو گئتمه

جان نقدینه بیر نازینی ساتسون آلارم من

کیم من کیمی اول نازه خریدار اولو گئتمه

عشاق آرا باشیم اوجالار داغ کیمی قالسون

اغیار آرا عاصیم قوجالیب خوار اولو گئتمه

استاد عاصم اردبیلی

نازا قویدی

بیر بوسه تمنّا ائله دیم یار نازا قویدی

قیشدیر دئدی وعده ی وصلین یازا قویدی

بیلمم منی گورجک نییه سرعتله سووشدی

یالواردیم ایاق تورموزا قویسون گازا قویدی

لطف ائیله دئدیم قویما بو عشقین کوزی سونسون

چونبلدی بیر آز مجمر عشقه آزا قویدی

اصرار ائله دیم لطفووی آرتیر بو حقیره

چوخلوق دئدی پوخلوقدی بناسین آزا قویدی

کونلوم قوشون، ازل؛ اوزی پروازه گتیردی

سونرا منی مرج ائیله مه گه قوشبازا قویدی

آهیم دالیسیجان او قَدَر کئش تک، اوزاندی

اولچوب حسابین ساخلاماقی بزّازا قویدی

برکیدی اَتیم پیشمه دی عشقین اوجاقیندا

باسدیردی کوله پیشمگیمی آشبازا قویدی

صادق بو غزلدن ایکی بیت ائیله دی انشا

لطف ائیله دی شعرین دالین عاصیم یازا قویدی

استاد عاصم اردبیلی

لافَتـی الاعلی، لاسیـف الا ذوالفقار

ساقیا! دور باده وئـر، آچیلدی گول، گلدی باهار،

ابر رحمت ائیله دی صحرا و باغی لاله زار

ناله چـک بولبول کیمی، دور! رقصه گل دیوانه دار،

مست و مستانه بواسمی سؤیله هر دم آشیکار:

شـــیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

بالیغین قارنیندا یونس اولدو چون زار و حزین،

طاقتی طاق اولدو صبری گئتدی اولدو چوخ غمـین

حاضیر اولدو اول زامان یانیندا جبریل امین،

سؤیله دی غمدن خیلاص اول، ائیله بو ذکری همین:

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

ماه کنعانـی که ائتـدی رنج زندان بی قرار،

اولدو زنجیر جفادان جیسم پاکی پاره پار

حددن ئوتدو چون که محنت، تاپمادی بیر غمگسار،

یوز دوتوب درگاه حققه، سؤیله دی بی اختیار

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

حضرت ایوبی چون ائتـدی بلای حق نزار،

نیش کرمان ائیله دی جان ضعیفین زخمدار

چون که تابی قالمادی، گئتـدی الیندن اختیار،

تا که ذکر ائتدی بواسمی، اولدو غمدن رستگار:

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

آدمی شیطان چوائتـدی باغ رضواندان جدا،

بی کس و تنها و سرگردان گزردی هریانا

بیر طرف حوا فراقـی، بیرطرف رنج و عنا

عاقبت بو ذکری ائتدی، اولدو هیجراندان رها:

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

ایسته دی یاندیرسین ابراهیمی تا نمرود دون

منجنیقه قویدو، آتدی نار و نورا سرنگون

تا که دوشدو آتشه، اولدم او مرد ذوفنون

آتشی ائتدی گولوستان، سویله دی بو اسمی چون

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

چون کی خیبر قلعه سینده قالدی عاجیز مصطفی،

نا اومید اولدو که حاصیل اولماز اولدو مدّعا

گلدی ناگه جبرئیل و گتدی فرمان خدا

سؤیله دی بو ذکری تکرار ائت که گلسین مرتضی

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

دشت ارجینده چو ائتدی شیر، سلمانی اسیر

عاجیز و بیچاره قالدی، تاپمادی بیر دستگیر

یوز توتوب درگاه حققه آغلادی اول مرد پیر

ظاهر اولدو اوندا ناگه شهسوار شیرگیر:

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

چون سلاسیل قلعه سینده اولدو احمد بی مدار،

نازل اولدو پیک رحمان، جبرئیل نامدار

سؤیله دی قوی منجنیقه، آت علیـنی بی قرار

فتح ائدر بیر لحظه ده سؤیله بو اسمی آشیکار:

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

روز اوّل جبرئیلدن تا که حق ائتدی سؤال،

سن نه کیمسین، من کیمم، سؤیله جوابیم اولما لال!

دئدی سن، سن؛ من منم، اود دوتدویاندی پرّ و بال

ملتجی اولدو بو اسمه تاکه رفع اولدو ملال:

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

ای نباتی! مدح شاهی ائیله دائیم آشیکار،

تا که اولسونلار خوارجلر حسددن کور و کار

حاصیل اولدو تا مورادین غافیل اولما زینهار

سؤیله بواسم عظیمی دم به دم بی اختیار:

شیر یزدان، شاه مردان، حیدر دولدول سوار،

لافَتـی الاعلی، لاسیـف الا ذوالفقار

سید ابوالقاسم نباتی

زامان آغلاتدی منی

آغلامازدیم زامان آغلاتدی منی

دوز یولوندان آزان آغلاتدی منی

گوردوم حسرتدی همالر سوموگه

ایشله ییر شاخدا سوموکدن ایلیگه

دوزوموزده اییلیر ایری لیگه

قالدی قانماز قانان آغلاتدی منی

آغلامازدیم زامان آغلاتدی منی

تک صبیر گلدی دئدیم ایش دوزه لر

قار گئدر، بوز ارییر یازدا گلر

نه بیلیم یازدا بوران باغری ده لر

یوخاچیخمیش گومان آغلاتدی منی

آغلامازدیم زامان آغلاتدی منی

دئدیلر بیر گون اولار ساز حالیمیز

قیتدیق اولسا واریمیز یاغ بالیمیز

ایندی کی اون تک اولوب ساققالیمیز

بو یالان سوز یامان آغلاتدی منی

آغلامازدیم زامان آغلاتدی منی

ظن ائدیردیم آغیر اولسا یارالار

یارالار آغریسین آنجاق یار آلار

نه بیلیدیم اوره گی یار یارالار

بیلمه مز لیکدی، قان آغلاتدی منی

آغلامازدیم زامان آغلاتدی منی

اره لر توشدو که جنگل جانینا

تولکی لر تور توخودو اصلانینا

طرلانی اووچی باتیر جاق قانینا

اوخدان آرتیق کامان آغلاتدی منی

آغلامازدیم زامان آغلاتدی منی

اری مز قالدی بیینده بوزوموز

گویده سایریشمادی بخت اولدوزوموز

نه قویون قالدی نه املیک قوزوموز

قوردا بنذر چوبان آغلاتدی منی

آغلامازدیم زامان آغلاتدی منی

من دئدیم باغلاسا یادلار قولومو

دایاقیم وار قورییا ساغ سولومو

قوپدی بیر چن که ایتیردیم یولومو

داغا باخدیم دومان آغلاتدی منی

آغلامازدیم زامان آغلاتدی منی

وای بیزه اولدی پوزولماز یازیمیز

مضراب اود توتدی قیریلدی سازیمیز

قالدی قیشلانمادا عاصم یازیمیز

یازی گول سوز یازان آغلاتدی منی

آغلامازدیم زامان آغلاتدی منی

استاد عاصم اردبیلی

گلمیشم

گوستر اوزون کی سیر گلستانه گلمیشم

بیر زائرم زیارت جانانه گلمیشم

لطف ائله، ویرما، قهر داشین داغلی سینه مه

درگاهینه امیدله درمانه گلمیشم

ایللر بویو تحمل ائدیب هجر دردینه

بئش گون قوناق بو خانه احسانه گلمیشم

شرمنده یم اگر چی برازنده تحفه دنچ

جان نقدی الده، ملک سلیمانه گلمیشم

سن سیزلیگه دوزونمه میشم، گرچه قطره یم

مین شوقیلن قوشولماغا عمانه گلمیشم

کافر آدیلا گر چی قاپوندان قاوولمیشام

رحم ائیله باری، ایندی کی ایمانه گلمیشم

سیندیرمیشام جسارتیلن عقل سددینی

دیوانسرای عدلووه دیوانه گلمیشم

تا مهریلن غرور باشین ویرمیشام داشا

مهر نگاردن سر و سامانه گلمیشم

من عشق مجمرینده اوره کدن آلیشمیشام

تسکین درده، چشمه ی عرفانه گلمیشم

نیزار تک سیزیلتی چوکوب سوزلو سینه مه

هجران نوالی، منده نیستانه گلمیشم

عشق اهلی دیر، حقارتیلن باخما عاصمه

عالم بیلیر بو عرصه یه مردانه گلمیشم

استاد عاصم اردبیلی

گل، گئت

گل بوشان شان اوره گین قصه سین انشاءائله گئت

بیربه بیر ووردوغون اوخلاره تماشا ائله گئت

آیریلیق دان نظر ائت گوزده ن آخان قان یاشیما

قطره لرده ن توره نن چشمه نی دریا ائله گئت

گیزلی اسراریمی ائل ده ن ائله دیل ده ن دیله سال

سن ده مجنونونو ائللر آرا رسوا ائله گئت

داغلی یام بارلی باغین پنجره سین آچ اوزومه

قاراقیش دان قارالان باغریمی احیا ائله گئت

بیر باخیش سئوگی یه ایللر بویو حسرت ده وارام

گل گولوم گل اونو بو جان ایله سودا ائله گئت

قتلیمین حوکمونو سن سیزلیگیم امضا ائلئیب

گل بو محکومون اوزون حوکمونو اجرا ائله گئت

ظلماتین داش قلعه سین ده ن باشا داش یاغمادادیر

تکجه بیر جلوه قارانلیق دا تماشا ائله گئت

باخ بو وحشت ده بوغولموش آجی قیشقیرتی لارا

لال سکوت دان دوغولان های کویو معنا ائله گئت

گئجه نین باغلا قارا معجرین آیدین سحره

گوندوزون خیمه سینی اولکه ده برپا ائله گئت

عاصمین دردی آغیر اولسادا یونگول دو یوکو

گل بو قارقانمیش ایلان کوسمه مدارا ائله گئت

استاد عاصم اردبیلی