روزگاریم

زلفو کیمی آیاغین قویماز اوپم نیگاریم

یوخدور اونون یانیندا بیر قیلجا اعتباریم

انصاف خوشدور ای اشک! آنجاق منی زبون ائت،

ها بؤیله محنت ایله کئچسین‌می روزگاریم؟

بیلدی تمام عالم کیم دردمند عشقم

یارب هنوز حالیم بیلمزمی اولا یاریم

وصلیندن آیری نولا قانیم توکولسه گول- گول،

من گلبن خزانم، بو فصل‌دیر بهاریم

تصویر ائدن وجودوم یازمیش الیمده ساغر

رفع اولماغا بو صورت، یوخ الده اختیاریم

دور ایسته‌من زمانی، مئی نشئه‌سین باشیمدان

تورپاق اولاندا یارب! دُرد مئی ائت غباریم

رسوالاریندان اول مه سانماز منی! فضولی!

دیوانه اولماییم‌می، دونیاده یوخمو عاریم؟

شاعر: ملامحمد فضولی

بو گئجه

یئنه اول ماه منیم آلدی قراریم بو گئجه

چیخاجاق‌دیر فلکه ناله و زاریم بو گئجه!

شمع‌وش محرم بزم ائیله‌دی اول ماه منی

یاناجاق‌دیر یئنه هیجر اودونا واریم بو گئجه

هم وصالی اورار اود جانیما، هم هیجرانی

بیر عجب شمع‌ایله دوشدو، سر و کاریم بو گئجه!

نه توتون‌دور کی چیخار چرخه، دل زاره مگر

هیجر داغینی اورار لاله عذاریم بو گئجه!

صبحه سالدی بو گئجه شمع کیمی قتلیمی هیجر

اولا کیم صبح گلینجه، گله یاریم بو گئجه

پاره- پاره جیگریم، ایت‌لرینه نذر اولسون

اول سر کویا اگر دوشسه گذاریم بو گئجه

وار ایدی صبح وصالینا فضولی اومّید

چیخماسا حسرت‌ایله جانِ فگاریم بو گئجه

شاعر: ملامحمد فضولی

گذار ائتمز منه

غم دیاریندا اجل پیکی گذار ائتمز منه

یوخ سانیب واریم مگر کی اعتبار ائتمز منه؟

یار جور ائتمز منه اغیار تعلیم ائتمه‌دن

بالله اغیار ائیلین احسانی یار ائتمز منه!

داغیدیر هر لحظه برگ عیشیمی آهیم یئلی

هانسی ناحق ظلم‌دور کی روزگار ائتمز منه؟

عشق دردیله خوشام، ترک نصیحت قیل رفیق

من کی تریاکی مزاجم، زهر، کار ائتمز منه

چرخدن آشیرمادان یادینلا آه آتشین

قدر ائدیب گردون، شرردن زر نثار ائتمز منه

نقد جان تاراج غمدن ساخلاماق دشوار دیر

عشق تا سنگ ملامتدن حصار ائتمز منه

یاد لعلینله فضولی گؤزله‌ییب راه عدم

وار بیر تدبیری، اما آشکار ائتمز منه

شاعر: ملامحمد فضولی

زلف پریشانیندادیر

آشیان مرغ دل، زلف پریشانیندادیر

قاندا اولسام ای پری! کؤنلوم سنین یانیندادیر

عشق دردیله خوشام، ال چک علاجیمدان طبیب!

قیلما درمان کیم، هلاکیم زهری درمانیندادیر

چکمه دامن ناز ائدیب افتاده‌لردن، وهم قیل!

گؤیلره آچیلماسین اللر کی، دامانیندادیر!

گؤزلریم یاشین گؤروب شور، ائتمه نفرت کیم بو هم

اول نمک‌دن‌دیر کی لعل شکّر افشانیندادیر

مست خواب ناز ائدیب جمع ائت دل صد پاره‌یی

کیم اونین هر پاره‌سی بیر نوک موژگانیندادیر

بس کی هجرانیندادیر خاصیت قطع حیات

اول حیات اهلینه حئیرانام که هجرانیندادیر

ای فضولی! شمع تک مطلق آچیلماز یانمادان

تابلار کیم سونبولوندن رشته‌ی جانیندادیر

شاعر: ملامحمد فضولی

ای حکیم!

عشقدن جانیمدا بیر پنهان مرض وار، ای حکیم

خلقه پنهان دردیم اظهار ائتمه، زنهار، ای حکیم!

وار بیر دردیم کی چوخ درماندان آرتیقدیر منه

قوی منی دردیم‌له درمان ائیله‌مه، وار، ای حکیم!

گر باسیب ال نبضیمه، تشخیص قیلسان دردیمی

آل امانت، قیلما هر بی‌درده اظهار، ای حکیم!

گل منیم تدبیر بیهوده‌مده سن بیر سعی قیل

کیم اولام بو درده آرتیقراق گرفتار، ای حکیم!

گؤر تنِ عریان ایله احوالیمی هیجران گؤنو،

وار ایمیش روزِ قیامت، قیلما انکار، ای حکیم!

چکمه‌یینجه چاره‌ی دردیمده زحمت بیلمه‌دین

کیم اولور درمانِ درد عشق دشوار، ای حکیم!

رنج چکمه صحّت اوچون، ال فضولی‌دن گؤتور

کیم قبول صحّت ائتمز بؤیله بیمار ای حکیم!

شاعر: ملامحمد فضولی

فزون حسن

حسنون اولدوقجا فزون، عشق اهلی آرتیق زار اولور

حسن نه مقدار اولورسا، عشق اول مقدار اولور!

جنّت اوچون منع ائدن عاشقلری دیداردان

بیلمه‌میش کیم جنّتی عاشقلرین دیدار اولور

عشق دردیندن اولور عاشق مزاجی مستقیم

عاشقین دردینه درمان ائتسه‌لر بیمار اولور

زاهد بی‌خود نه بیلسین ذوقونو عشق اهلی‌نین؟

بیر عجب مئی‌دیر محبّت کیم ایچن، بیدار اولور!

عشق سئوداسینا صرف ائیلر فضولی عمرونو

بیلمزم بو خواب غفلتدن هاچان بیدار اولور؟

شاعر: ملامحمد فضولی

اسیر دام غم

ای اسیر دام غم، بیر گوشه‌ی مئیخانه توت

توتما زوهّادین مخالف پندینی، پئیمانه توت!

دیشله‌دیمسه لعلین ای قانیم تؤکن! قهر ائیله‌مه

توت کی قان ائتدیم، عدالت‌ایله، قانی قانه توت!

گر سنه افغانیمی بیهوده دئرسه مدّعی

اول سؤزه توتما قولاق، من چکدیگیم افغانه توت

قیلمازام زنجیر زلفون ترکین، ای ناصح! منی

خواه بیر عاقل خیال ائت، خواه بیر دیوانه توت!

ای اولوب سلطان، دئیه‌ن دونیادا مندن غیری یوخ

سن اؤزون بیر جُغد بیل، دونیانی بیر ویرانه توت

ای فضولی! دهر زالی‌نین فریبیندن ساقین

اولما غافل، ارگیبی ترپن، اؤزون مردانه توت

شاعر: ملامحمد فضولی

خبر وئردین

صبا! لطف ائتدین اهل درده درماندان خبر وئردین

تن محزونا جاندان، جانا جاناندان خبر وئردین!

خزان غمده گؤردون اضطرابین بولبول زارین

بهار ایّامی تک گلبرگ خنداندان خبر وئردین

سؤزونو وحی مُنزل گر دئسم من، هیچ کفر اولماز

جهانی توتموش ایکن کفر، ایماندان خبر وئردین!

دئدی‌لر یار عشّاقین گلیر جمع ائتمگه کؤنلون

مگر کیم یاره عشّاق پریشاندان خبر وئردین؟

سلیمان مسندیندن دیو گُمره رغبتین کسدین

دنیزده خاتم حکم سلیماندان خبر وئردین

فضولی! روزگاریم تیره گؤردون شام هجراندان

نسیم صبح تک، خورشید رخشاندان خبر وئردین

شاعر: ملامحمد فضولی

منده مجنوندان فزون...

منده مجنوندان فزون عاشیق‌لیک استعدادی وار

عاشق صادق منم، مجنونون آنجاق آدی وار!

نولا قان تؤکمکده ماهر اولسا چشمیم مردمی

نطفه‌ی قابل دورور غمزه‌ن کیمی اوستادی وار!

قیل تفاخر کیم سنین‌ده وار منیم تک عاشقین

لیلی‌نین مجنونو، شیرینین اگر فرهادی وار

اهل تمکینم، منی بنزتمه ای گول بولبوله

درده یوخ صبری اونون هر لحظه مین فریادی وار

اؤیله بد حالم کی احوالیم گؤرنده شاد اولور

هر کیمین کیم دور جوروندن دلِ ناشادی وار

گزمه ای کؤنلوم قوشو غافل فضای عشقده

کیم بو صحرانین گذرگاهیندا چوخ صیادی وار

ای فضولی! عشق منعین قیلما ناصحدن قبول

عقل تدبیری دیر اول، سانما کی بیر بُنیادی وار

شاعر: ملامحمد فضولی

عرض نیاز ائیله

حذر قیل آه اودوندان، جؤورونو عشّاقه آز ائیله

خس و خاشاکی یاخما، شعله سین دن احتراز ائیله

صنملر سجده سیدیر بیزده طاعت، تانری چون، زاهید

کیمی گؤرسن سن اؤز دینین ده تکلیف نماز ائیله

حقیقت خطّینی یازماق دیلرسن لوح ذاتینده؟

خطین گلرخلرین منظور توت، مشق مجاز ائیله

صنم لر سنگ دللردیر، ائشیتمزلر سؤزو زاهید

یئتر بیهوده من تک اونلارا عرض نیاز ائیله

سنین نازین گؤرنده، عقل قالماز حسبتاٌ لله

آمان وئر عاشق دیداره، بیر دم ترک ناز ائیله

یولوندا انتظار مقدمینله خاک اولان چوخدور

خرام ائت بیر قدم، من خاکساری سرفراز ائیله

فضولی! جانه تاپشیردین خیالین، ایندی رسواسان

سنه کیم دئیرکی هر نامحرمه، افشای راز ائیله

فضولی

شهید عشق اولوب ...

اگر چه آیینه‌تک کئچدیم جهانین جمله وارین‌دن

هنوز آردیمجادیر قید تعلق، زلف تارین‌دن

شهید عشق اولوب فیض بقا کسب ائیله‌مک خوشدور

نه حاصیل بی‌وفا دهرین، حیات مستعارین‌دن

حباب اشک و آه پرشرر، قیلمیش منی فارغ

جهانین قصر سیم اندود و کاخ زرنگارین‌دن

گورونمز صورت امید وصلین، لوح جانیم‌ده

مکدر دیر مگر اول آینه، جسمیم غبارین‌دن

اوزانیر رشته، طول امل، دیدار ذوق‌ایله

خم آچیلدیقجا، اول گلچهره زلف تابدارین‌دن

سنه‌دیر اقتداسی طواف کوی لیلی ائتمکده

خس و خارین قوپار ای ناقه، مجنون رهگذارین‌دن

"فضولی"دن، ملامت احترازین ایسته‌ین گویا

دئییل واقف، دل سوزان و چشم اشکباریم‌دن

شاعر: حکیم ملا محمد فضولی

عشق دیر

قد انار العشقُ للعشّاقٍ منهاج الهدا

سالک راه حقیقت عشقه ائیلر اقتدا

عشق دیر اول نشئه ی کامل کیم آندان دیر مدام

مئیده تنویر حرارت، نئیده تاثیر صدا

وادی وحدت، حقیقتده، مقام عشق دیر

کیم مشخص اولماز اول وادیده سلطاندان گدا!

ائیله مز خلوت سرای سرّ وحدت محرمی

عاشقی معشوقدن، معشوقو عاشقدن جدا

ای کی اهل عشقه سؤیلرسن ملامت، ترکین ائت

سؤیله کیم، ممکون مودور تغییر تقدیر خدا؟

عشق کلکی چکدی خط، حرف وجود عاشقه

کیم اولا ثابت، حق اثباتینده نفی ماعدا!

ای فضولی انتها سیز ذؤوق بولدون عشقدن

بؤیله دیر هر ایش کی حق آدیله قیلسان ابتدا

حکیم فضولی

نی کیمی

ناله‌دن دیر نی کیمی آوازه‌ی عشقیم بلند

ناله ترکین قیلمارام نی تک کسیلسم بند- بند

قیل مدد ای بخت، یوخسا کام دل ممکن دئیل

بویله کیم اول دلربا بی درد دیر من دردمند

داغ لر دیر اودلو کوکسوم دن قاراسی قوپمامیش

یا ثبات عشق ایچون اود اوزره بیر نئچه سپند

آچیلیر کونلوم گهی کیم گریه ی تلخیم گوروب

آچار اول گلرخ تبسم بیرله لعل نوشخند

خاک راهیم دن منی قالدیرا بیلمز سایه تک

قیلسا گردون آفتابین هر شعاعین بیر کمند

"جام توت" دئییر ساقی گلچهره، زاهد ترک جام

ای کونول فکر ائیله گور کیم، هانسی دیر توتماغا پند

ای «فضولی»، صورت فقرین قبول دوست دور

هیچ درویشی، سنین تک گورمه دیم سلطان پسند

شاعر: حکیم ملا محمد فضولی

آیینیم منیم

سجده دیر هر یئرده بیر بت گورسه م آیینیم منیم

خواه کافر، خواه مومن توت، بو دور دینیم منیم

باغبان، شمشاد و نسرینین منه عرض ائتمه کیم

اول قد و رخسار دیر شمشاد و نسرینیم منیم

خاک درگاهین نظردن سورمه ای سیلاب اشک

قیلما ضایع سرمه ی چشم جهان بینیم منیم

اشک موجی گزدیرر هر یان تن خاشاکیمی

ممکن اولماز اشک تحریک ایله تسکینیم منیم

چاره اومدوم لعل شیرینین دن اشک تلخیمه

تلخ گفتارایله آلدین جان شیرینیم منیم

من ده ساکن اولدو درد عشق، مجنوندان کئچیب

اوندان آرتیق دیر مگر عشق ایچره تمکینیم منیم

ای «فضولی»، هر یئتن طعن ائیلر اولدو حالیمه

بو یئتر اهل ملامت ایچره تحسینیم منیم

فضولی

نه ایمیش

ای خوش اول مست کی بیلمز غم عالم نه ایمیش

نه چکر عالم ایچون غم، نه بیلیر غم نه ایمیش!

بیر پری سلسله‌ی عشقینه دوشدوم ناگه

شیمدی بیلدیم سبب خلقت آدم نه ایمیش؟

واعظ اوصاف جهنم اوخور، ای اهل ورع!

وار اونون مجلسینه! گؤر کی جهنم نه ایمیش!

اوخو کؤکسومدن ئوتوب، قالمیش ایمیش پیکانی

آه بیلدیم، سبب آه دمادم نه ایمیش!

ای فضولی! مزه‌ی ساغر و صهبا بیلدین

توبه قیل تا بیله‌سن زرق و ریا هم نه ایمیش!

شاعر: ملامحمد فضولی