کیم گؤروب، او دئسین!

صفایِ مجلیسِ جانانی، کیم گؤروب، او دئسین!

بلایِ محنتِ هیجرانی، کیم گؤروب، او دئسین!

اینانمرام، منه هر کیم دئییر کی جنّت‌وار

گؤزیله روضه‌ی رضوانی کیم گؤروب، او دئسین!

منیم گولوم، چیچه‌گیم، جنّتیم، گؤزه‌ل‌لردیر

بهشتی، حوری و قیلمانی، کیم گؤروب، او دئسین!

کمندِ عشقده، مجنونی گؤرمه‌یه‌ن، نه بیلیر؟

اسیرِ زولف پریشانی، کیم گؤروب، او دئسین!

من آغلادیقجا نیگاریم، گولردی گؤز یاشیما

گولرکن، اول گولِ خندانی، کیم گؤروب، او دئسین!

چمنده هر سحر عشق اهلینین ترانه‌سی وار

فغان بولبول نالانی کیم گؤروب، او دئسین!

منیمده، واحد، اؤز ایستکلیمین، گؤزه‌ل لیگیدیر!

باهار زمانی، گولوستانی، کیم گؤروب، او دئسین!

شاعر: علی آقا واحد

صابره

صابر! ای محترم بؤیوک شاعیر!

شعرده، نظم و نثرده ماهیر!

یازدیغین داهیانه مضحکه‌لر

گؤستریر خلق ایچینده معجزه‌لر

بیلیدیریر منجه هر کسه هنرین،

اوخونور هر بیر ئولکه‌ده اثرین

داد ائدردین همیشه: «حرّیت»!

او اسارتده گؤردیگین ملّت

ایندی آزاده عؤمر ائدیر خرّم،

بیتدی مظلومو آغلاداق ماتم...

ایندی بیر دربدر اوشاق یوخدور

اونلارین زحمتین چکن چوخدور

نا خلف بیلمه یوکسله‌ن ائلینی

قوردولار هر طرفده هیکلینی

بیرده سیزلارمی قلب مجروحین؟

بیزی البّته سئیر ائدیر روحین

بو تفاخر سنه کفایت‌دیر،

ملّتین ایسته ینجه راحت‌دیر

اؤلدون، افسوس‌لر، که بی‌حرمت!...

وئرمه‌دی وارلیلار سنه قیمت

گر اولایدین سووه‌ت زمانیندا

شرفین چوخدی کتله یانیندا

سنه قیمت قویاردی جمعّیت،

یاشایاردین همیشه بی‌منّت

نئجه شاعرلر ایندی خوش‌گذران

کچیریرلر، گونش کیمی خندان

بو بیزیمچون بؤیوک سعادت‌دیر

شانلی، تاریخی بیر شرافت‌دیر

شاعر: علی آقا واحد

قیل حذر افغانیمدان!

ای ییخان، کؤنلوم ائوین، قیل حذر افغانیمدان

ائوین آباد اولا، ال چک دلِ ویرانیمدان

منی مجنون‌ایله فرهاده برابر توتما

من اولاردان‌دا، هنرله گئچه‌رم جانیمدان

بیرجه گَل گور، نه جفالار چکیرم زولفوندن

خبرین یوخدو سنین، حالِ پریشانیمدان

طعن ائدیر ائل منه «یارین نه وفاسیز چیخدی؟»

ای وفاسیز، دئمیرم من بونو اؤز یانیمدان

سانکی باشدان باشا، بیر شعله‌ی آهیم گئجه‌لر

شمعلر، اودلانیر، آهِ دلِ سوزانیمدان

نئیله‌رم من گولو، یا لاله‌نی، انصافیم وار

اونلارین هانسی گؤزه‌ل‌دیر رخ جانانیمدان

وطنیمده نئجه من ایسته‌مه‌ییم بیر گولو کیم

جانی جانیملا بیر اولسون، قانی‌دا قانیمدان

واحدم، عصریمیزین ایندیکی فرهادی منم!

کیم منی آیری سالار خسروِ خوبانیمدان؟

شاعر: علی آقا واحد

بیزیم یئرده‌دیر

آی عاشیق! صحبت آچ، گولدن، چیچکدن:

چمن‌لر زینتی بیزیم یئرده‌دیر

بولبول‌لر ذؤق آلیر گوللریمیزدن

باهارین لذّتی بیزیم یئرده‌دیر

چال، اوخو شورایله چوبان بایاتی

سازیندا تعریف‌له بو شن حیاتی

عطرلی گوللری، باغی، باغاتی

گؤزه‌ل‌لیک خلقتی بیزیم یئرده‌دیر

ائلیمدن، آرخامدان، غم اوزاقلاشیر

ذوقی‌میز، نشئه‌میز، قایناییر، داشیر

خلقی‌میز فرح‌له گولوب اویناشیر

انسان سعادتی بیزیم یئرده‌دیر

سازین، کمانچانین، قارمانین، تارین

اوخویوب چالانین، گولون، باهارین

ادیبین، شاعرین، هر صنعت‌کارین

ان بؤیوک قیمتی بیزیم یئرده‌دیر

نه تاریخ‌لرده وار، نه باشقا یئرده

چوخ اوشاقی قادین وارمی بیر ائلده

ائلدن آلا تحسین، حؤرمت هر ایلده؟

آنالیق حؤرمتی بیزیم یئرده‌دیر

فاشیستین ظلمونه دونیالار باخیر

آنالار باغرینا سونگولر تاخیر

کؤرپه اوُشاقلاری یاندیریب یاخیر

بالا محبّتی بیزیم یئرده‌دیر

نوروز بایرامیندان آلدیق الهامی

شادلیقلا کئچیردیک بو شن بایرامی

وطن اوُشاقلاری سئونییر هامی

ائللرین قدرتی بیزیم یئرده‌دیر

بیر چوخ بایراملاری گؤردوکسه اگر

باهار بایرامیمیز هامسینا ده‌یر

بو خوش گونو گؤره‌ن سئوینمز مگر

کؤنوللر بهجتی بیزیم یئرده‌دیر

سیلینسین دونیادان بوش هنگامه‌لر

سسلنسین دیل‌لرده، جوشسون نغمه‌لر

یازسین بو ائل‌لر تبریک نامه‌لر

دونیالار جنتی بیزیم یئرده‌دیر

علی آقا واحد

وطن اولادی

ای وطن اولادی، بیر آن وئرمه فرصت دوشمنه

قهرمان ضربه‌نله گؤستر درسِ عبرت دوشمنه!

قوی آلوو یاغسین تفنگیندن، توپوندان جبهه‌ده

ائیله اؤز دونیاسینی قهرایله ظلمت دوشمنه!

سونگوتک سانجیل فاشیستین قلبینه، یار باغرینی

ضربه اوستدن ضربه وور خائن طبیعت دوشمنه!

پارتلاسین قوی هیتلرین آلچاق باشیدا بومبالار

هر طرفدن وور جسارتله خسارت دشمنه!

ییخ، داغیت، یانسین جهنم‌تک فاشیستین جبهه‌سی

قسمت اولسون، قویما، بو گولزارِ جنّت دوشمنه!

بیلدی عالم هیتلرین خائن‌لیگین، ادنالیغین

یاغدیریر میلیونلا دونیا خلقی، نفرت دوشمنه!

حاضریق، واحد، صداقتله وطن اوغروندا بیز

هر زمان گؤرسترمگه قطعی جسارت دوشمنه!

علی آقا واحد

موسیقی مجلسی

موسیقی مجلسی‌نین طرفه علامت‌لری وار

گوش قیل گور نئجه جانسوز حکایت‌لری وار

موسیقی ذوقینه اول کس کی، ده‌گیلدیر واقف

بو بساطین نه بیلیر، کیم نه شرافت‌لری وار

تاری، بیهوده حساب ائتمه، اگر عارف‌سن

گورکی، مه‌رولر الیندن نه شکایت‌لری وار

اودا بیر زلفی سیه دلبرین آلوده‌سی‌دیر

که صداسیندا پریشانلیق اشارت‌لری وار

خوار، ظّن ائتمه، ساکین، موسیقی خادملرینی

اونلارین ذوقینه گیر، گور نه نزاکت‌لری وار

موسیقی غم داغیدیر، ذوق وئریر انسانه

درک قیلماز بونی اونلار کی، سفاهت‌لری وار

شاعرین، موسیقی خادملری‌نین، رسّامین

اینجه دقتله دوشون، گور، نه مهارت‌لری وار

موسیقی ذوقی هلاکولره، تاثیر ائتمیش

اوخو تاریخی، دوشون، گور نه روایت‌لری وار

بعضی نادان نه بیلیر موسیقی ذوقین، واحد!

چونکی جاهلدیلر، اولدوقجا جهالت‌لری وار

علی آقا واحد

صحبت اولماسین

میخانه مجلسینده گره‌ک صحبت اولماسین

بیرکسده صحبت ائیله مگه جرئت اولماسین!

صحبت خیلافدیر، دئمیرم، ترکین ائیله‌یین

مئی مجیلسینده، جهد ائیله‌یین، غیبت اولماسین!

سرخوشلیق ائتمه، گؤزله، مئی‌ین احترامینی

سالما آیاغه باده‌نی، بی‌حرمت اولماسین!

مئی‌دن مراد و ذوق و صفا آلماق ایسه‌گر،

مئی تک بساطه ذوق یئتیر، نفرت اولماسین!

ایچدیکجه اهل حالی ائدر هوشیار مئی،

پژمرده‌لنمه، قابل اوتور، غفلت اولماسین

پیرِ موغان او شخصه ائدوب باده‌نی حلال،

ذاتینده، شبهه یوخ، کیم، اونون علّت اولماسین!

سن آدم اول، ادبله مئی ایچ، اوُیما جنّته

کوثر، جهنمه! سنه قوی، قسمت اولماسین!

مئی‌دیر، خلاصه، روحه غذا، بیرده موسیقی،

بونلاردان اؤزگه عالی گره‌ک نعمت اولماسین!

ظنیم خطا دئییل کی، دئسه‌م، موسیقی کیمی،

صنعت‌لر ایچره اینجه گره‌ک صنعت اولماسین!

هر علمه قیمت اولدو ایگیرمنجی عصرده،

بیر یئر اولورمی، موسیقییه قیمت اولماسین؟!

واحد، او ملّت کی اونون موسیقیسی یوخ

باتسین‌دا یئرلی دیبلی، ائیله ملّت اولماسین!

علی آقا واحد

ای گؤزوم

ای گؤزوم، عالمِ انسانلیغا محرم‌سن اگر

ساکن اول مجلسِ میخانه‌ده، آدم‌سن اگر!

عرفا اهلی ایچون مجلسِ مئی جنّت‌دیر

قویما بو بزمه قدم، اهلِ جهنم‌سن اگر

مئی ایچیب، سرخوش اولوب، اؤزگه‌نی تحقیر ائیله‌مه،

سن اؤز اطوارینی تحقیر ائیله، سرسم‌سن اگر!

ئولچوده‌ن خارجه چیخما، ییخار آخر سنی مئی،

توت الیم کی، هامودان ایچگیده محکم‌سن اگر

مست و مدهوش زامانیندا بیر آیینه‌یه باخ،

اؤزون اؤز عکسینی تصویر ائیله اعلم‌سن اگر

گور، سنی باده نه حاله سالوب، ای خانه خراب،

آغلا اؤز حالینه بیردم، نولا، خُرّم‌سن اگر،

حیف‌دیر باده‌یه صرف ائتدیگین اول شانلی حیات،

بیلّیک اوغروندا اونی صرف ائیله، حاتم‌سن اگر!

مبتلادیر بو بلایه، دئمه، واحد اؤزی‌ده،

اونی‌دا علم‌ایله تشویق ائیله، آدم‌سن اگر

شاعیر: علی آقا واحد

سن اولماسان

سن اولماسان، گؤزه‌لیم، گولستانه باخمازایدیم

چمن چیچک‌لرینه عاشیقانه باخمازایدیم

اسیر زولفون اگر اولماسایدیم عالمده

جمالینا بو قدر عاجزانه باخمازایدیم

منیم‌له اولساایدین بیر دقیقه عمرومده

جهان بوتون گؤزه‌ل اولسا، جهانه باخمازایدیم

منی فراقین اودی یاخماسایدی شمع کیمی،

گؤره‌نده گول اوزونی، یانه- یانه باخمازایدیم

فراقینا دؤزه بیلسه‌یدی قان اولان کؤنلوم

یولوندا چکدیگیم آه و فغانه باخمازایدیم

او گول جمالینا من عاشیق اولماسایدیم اگر،

فغانِ بولبوله چوخ محرمانه باخمازایدیم

نزاکت اولماسا، واحد، طبیعتیم‌ده منیم

او قارا گؤزلره من شاعرانه باخمازایدیم

شاعیر: علی آقا واحد

جیراندا اولور

گؤزه‌لیم گوزلرینین صحبتی هر یاندا اولور

بو ملاحتلی باخیشلار قوزی جیراندا اولور

بیر علاج ائت منه، ایستکلی طبیبیم سن‌سن

عاشیقین چاره‌سی اوز سئودیگی جاناندا اولور

بولبول ایستر گولی طوطی- شکری، من‌ده- سنی،

عشق سوداسی بو اوچ عاشیق نالاندا اولور

نه طبیعت گوروب عمرونده، نه دنیا یئتروب

او گؤزه‌ل‌لر کی، بیزیم آذربایجاندا اولور

گول اگر بولبولی اینجیتسه، وفاسیز دئمه‌یین

قیزلارین تقصیری اولماز؛ گنه اوغلاندا اولور

بو گؤزه‌ل‌لیک که سنین وار، گؤزه‌لیم، انصافاً

نه ملک‌ده، نه پری‌ده، نه ده انساندا اولور

مبتلا کونلومه، بیلمم نه اولوب هر گون ایتیر

آختاریر کن یئنه اول زولف پریشاندا اولور

واحدین بللی ده‌گیل مسکنی پروانه کیمی

گاه شمعه دولانیر، گاه گولوستاندا اولور

شاعیر: علی آقا واحد

آشیان گؤروم

گئتمه بو نازایله، گؤزه‌لیم، بیر دایان گؤروم

عشقینده من یانان کیمی بیر سن‌ده یان گؤروم

درد اؤلدوره‌ر منی سنی گر بیرده، سئوگیلیم

خائن رقیبلرله گؤلوب اوینایان گؤروم

چشم زمانه‌دن سنه آفت توخونماسین

دائم او قاره زلفی گؤز اوستونده یان گؤروم!

نه لاله بیتمه‌سین، نه ده سونبول، سن اولماسان

نه شاخ گول‌ده بولبول ایچون آشیان گؤروم

مستانه گؤزلرین کیمی سن مست سن هله

چوخ باخما، نازایله، گؤزه‌لیم، بیر اویان گؤروم!

واحد، جهاندا هر گؤزه‌لین دوشسه‌م عشقینه

بیر خیر گؤرمه‌سه‌م ده، گره‌ک مین زیان گؤروم

شاعیر: علی آقا واحد

آخشاملار

دوشه‌نده طره‌ی دلبر خیاله آخشاملار

محبّت اهلی باتار مین ملاله آخشاملار

شکسته بولبوله بنزه‌ر بلا چکن عاشیق

گولوندن اؤتری ائدر آه و ناله آخشاملار

گونوزلر عاشیقه طعن ائتمه کی، گولوب دانیشیر

سالار فراقین، اونی گور نه حاله، آخشاملار

دوشه‌نده زولفون اوزه، قاشلارین خیاله دوشر

باتاندا گون، باخار عالم هیلاله آخشاملار

شرابی یارسیز ایچسه‌ن بیر آزدا غم گتیره‌ر

گول اوزلی یار ایله اول هم‌پیاله آخشاملار

بیر اؤزگه لذّتی وار، عاشیق‌ایله معشوقه

رقیب‌سیز اولا محرم وصاله آخشاملار

میسّر اولماسا گوندوز سنه شراب ایچمک

اوُنوتما، واحد، اونی لامحاله آخشاملار!

شاعیر: علی آقا واحد

غارت‌گرِ دل

کؤنلوم سنه وابسته‌دیر، ای شوخ، بیر ایل‌دیر

نه اؤلدورور عشقین منی آخر، نه دیریل‌دیر

عاشقلرینی قصدین اگر محو ائیله‌مک‌سه

من حاضیرم، اوّل منه مقصود دینی بیل‌دیر

مئیلیم سنه‌دیر، بیر سنه عالمده اسیرم

ایسترایسه‌ن آزاد ائیله، ایسترایسه‌ن اُول‌دیر

کج باخما، بوتون خلق‌ده گر بیر- بیره، ظالم

زولفون گرهین آچما کی، غارتگرِ دیل‌دیر

مبهوت ائله‌یوب عالمی آیینه‌ی رویین

نه شکل و شمایلدی، بو نه حُسن جمیل‌دیر!

روخسارینه اول خال سیه دیرمی دوزولموش؟

یا برگِ گول اوسته سپیلوب دانه‌ی هئل‌دیر؟

واحد، دئمه‌کیم، یار ایله شیریندی مئی ایچمک

زهر اولسون او عشرت کی، حکیمانه دگیل‌دیر

شاعیر: علی آقا واحد

من عاشیقم

ئوگونمه چوخ گؤزه‌لیم، چوخ‌دا گؤزلرین قارادیر

طبیعت‌ین ایشیدیر، گونده مین گؤزه‌ل یارادیر

بو جانی ایسته، ویریم اؤزگه بیر شئی‌یم یوخدور

من عاشیقم، نه‌ییم اولسا، منیم‌کی آشکارادیر

سنی گؤره‌ن کیمی عالم منه بهشته دؤنور

او گون کی گول اوزونو گؤرمه‌سه‌م، گونوم قارادیر

رقیبه وئرمه نشان، یاخشی ساخلا قوینوندا

منیم‌ده عشقیم او بیر جوت ده‌ریلمه‌میش نارادیر

دیسه‌م قیلینج قاشینا، قورخورام که غضب‌لنه‌سن

سوزون دوزی، نه بیلیم، بلکه اگری آی پارادیر؟!

او یئرده که، ده‌لی کؤنلوم سنی گزیب سوروشور

اؤزوم‌ده بیلمه‌ییره‌م چوخ زامان، او یئر هارادیر؟

رقیب طعنه‌سی، واحد، منه توخوندی اوگون

سیزیلدایر اوره‌گیم، سانکی اوخ‌ده‌ییب یارادیر

شاعیر: علی آقا واحد

جانیم وار

تمنا ائت، گولوم، وئررم، یولوندا نقد، جانیم وار

اگر بولبول ده‌گیلسه‌م، اوندان آرتیق مین فغانیم وار

قارا گؤزلر سنی آلداتماسین، بیمارم عشقینده

علاجیم سنده‌دیر، ای گول، سنه آنجاق گمانیم وار

قبول ائتسن یولوندا جانیمی یوز یول فدا قیللام

اسیرِ عشقینم، سنسیز بو عالمده خزانیم وار

امانت ساخلا قلبینده همیشه عشقیمین سرّین

حقیقی عاشیقم هیجرینده، چشمِ خون فشانیم وار

آلوب تئز جانیمی، بیر دفعه‌لیک قورتار اذیّتدن

باخیلسا کؤنلومه، عشقینده مین درد نهانیم وار

سنی هر شئی‌دن آرتیق سئومیشم عالمده، ای ظالیم!

قضا ایسترسه، گلسین، راه عشقینده توانیم وار

منی هر بی‌وفایه، واحدم، توُتما برابر کیم

منیم ده عشق ملکونده، عزیزیم، آد و سانیم وار

شاعیر: علی آقا واحد