انسانـــلار

ثرادن بیر ده لی شیطان دئیر: انسانلار، انسانلار!

نه دیر دونیانی دوتموش علم لر، عرفانلار، انسانلار!

قانان کیم، قاندیران کیم، فیض یاب اولسا عوام الناس

دوشر شان و شرف دن ملالار، ایشانلار*، انسانلار!

سئورمی اهل استبداد ملت هوشیار اولسون؟

بونا راضی اولورمو بیرنئچه وجدانلار، انسانلار!

آییلمیش رنجبرلر، آلماق ایستر حق مشروعین

نه یئرده قالمیسیز بگلر، آغالار، خانلار، انسانلار!

محررلر، مفتن لر اوسانمازلار، اوتانمازلار

بازارلار، هرزه لر، افسانه لر، هذیانلار، انسانلار!

شرارت دن چکیب ال، خیره مایل اولمایین بیر دم

کسین باشلار، الین جانلار، تؤکون مین قانلار، انسانلار!

بشر سیز، سیزده قان تؤکمک طبیعی در، جبلی دیر

بوفطرتدن اوزاقدیر، شبهه سیز، شیطانلار، انسانلار؟

دگول میحیف دل لردن غبار جهل محو اولسون

نچون هرگونده قاندان قوپماسین طوفانلار... انسانلار!

دمادم نفس اماره دئمکده اُقتل الاخوان

نچون سالم قالا باشلار، بدنلار، جانلار،انسانلار!

جهالت پرده سین چاک ائتمه یین، اوندا گؤره ر سیز کیم

ثرادیر جسم لر، هم نفس لر، شیطانلار، انسانلار!

*- ایشان: اوزبک و تاتار واعظلری

میرزه علی اکبر صابیر

«دبستان» دا قاپاندی!

المنته لله کی، «دبستان»* دا قاپاندی

بیر باد خزان اسدی، گلستان دا قاپاندی

حاصل لری پوچ اولدی بوتون مزرعه جاتین

یئل ووردی قاوون، قارپوزی، بوستان دا قاپاندی

«الفت» کسیلیب توخدادی «برهان ترقی»

محو اولدی «حمیت»، ادبستان دا قاپاندی

«رهبر» یورولوب، یوخلادی «ارشاد» و «تکامل»

آسلانلارا اوخ دگدی، نیستان دا قاپاندی

میدان رقابتده بیزیم همتیمیزدن

دعوا قاپانیب، رستم دستان دا قاپاندی

اطفال وطن قوی باغیریب اولسون آجیندان

یاندی آنالار سینه سی، پستان دا قاپاندی

قوی کهنه لرین داش اوره گی گول تک آچیلسین

دارالظفر تازه پرستان دا قاپاندی

*- نشریه آدی دیر

میرزه علی اکبر صابیر

... مشکله دوشدی ایشیم، الله!

وای، وای، نه یامان مشکله دوشدی ایشیم، الله!

فریادیمه یئت کیم، یانیرام آتشه، بالله!

اسلامه خلل قاتمادادیر بیر نئچه بدخواه

ایسترلر اولا بنده لرین طاغی و گمراه

ائتدیم نه یامان عصره تصادف، آمان ای وای

لا حول و لا قوة الا بالله!

مکتب لر آچیب ائیله یین احسانی- دئییرلر

مکتبده قویون «اوستولو»، داسقانی- دئییرلر

پر پوچ ائله یین چوب فلقانی- دئییرلر

دیشره چیخارین حضرت ملانی- دئییرلر

ملا قاوولا، یعنی معلم گله واه!... واه!...

لا حول و لا قوة الا بالله!

من آنلامیرام کیم، نولا معنای معلم

قیرخ- اللی منات پول آلا هر آی معلم

بیر تازه اصوله اولا ایفای معلم

پوللاری آلا، سؤیله یه، اوخفقای معلم

ملا اونا حسرتله چکه کوچه ده آه!...آه!...

لا حول و لا قوة الا بالله!

بیر ایلدی، بیر آز چوخ دا اولور، یوخدی دماغیم

نه چاتیر الیم بیر ایشه، نه گئدیر ایاغیم

هر دن یئنی بیر سوز دانیشیر اوغلان- اوشاغیم

تاققیلدایر، آلله دا شاهیدی، قولاغیم

«پورت آرتور»، حریت، «مانجوریا» قاه- قاه

لا حول و لا قوة الا بالله!

آند اولسون اوتن گونلره، دیوانه اولوبلار

اسلامه ده، ایمانه ده بیگانه اولوبلار

بالله باشیم چیخماییر آیا نه اولوبلار

حریته- مریته مستانه اولوبلار

باه باه... گئنه باه باه... گئنه باه باه... گئنه باه باه

لا حول و لا قوة الا بالله!

آخ، آی کئچن ایللر، نولا بیر ده دولانایدین

تازه گئنه بئش یوز ایل اولونجا دایانایدین

علمی، ادبی، فضلی، کمالاتی دانایدین

ای بیلدیر، اینیش ایل، نولا اودلاره یانایدین!

تا ائیله مه ییدین ده بو غافل لری آگاه!

لا حول و لا قوة الا بالله!

بیلمم نه ایشیم واردی، باشیم هاردا قاریشدی

علم ایله بئله دوشمن اولان قوم باریشدی

تجدید وفابیرله معارفله ساریشدی

راحت یاتا بیلمم، منه غم موری داریشدی

ائتمکمی اولار بیر ده بو اویموشلاری اکراه؟

لا حول و لا قوة الا بالله!

میرزه علی اکبر صابیر

غم یئمه!

ماه کنعانین باتیب، ای پیر کنعان، غم یئمه!

تا گلستانین اولوبدور بیت احزان، غم یئمه!

ای دل محنت زده، اول شاد، لبریز سرور

کسب نامردی قیلار افکار وجدان، غم یئمه!

اولمادی مقصودیمیزجه دور چرخ کج مدار

قالمالی دیر بئیله حالت اوزره دوران پایدار:

قسمتیندیر، ائتگیلن هم روز و شب ناله، زار

ای رعیت، ای فقیر و فعله، دهقان، غم یئمه!

صبح تئزدن دور آیاغا، شامه تک چک زحمتی

گوجلولردن ده ائشیت هر نوع فحش و تهمتی

سن ذلیل اول، عیبی یوخ، قوی گوجلو چکسین لذتی

قوی سنی خوار ائیله سینلر خان و اعیان، غم یئمه!

ایشله قوی قدین بوکولسون، ایشله، آلنین ترله سین!

ایشله، آج قال، آج بهایم تک عیالین چرله سین

ظلمدن فریاد و دادی قوی دیلین ازبرله سین

غارت ائتسین روزینی ملا و بگ، خان غم یئمه!

چک گیلن عمرون چاتینجا، بینوا، آه و فغان

بئیله پنهان سرّیلر اولماز سنه هرگز بیان

ملا نصر الدین، «لسان الغیبه» اولدون ترجمان

روح پاکندیر سنین هر دم ثنا خوان، غم یئمه!

میرزه علی اکبر صابیر

لزگی قیزی

اتگینی چیرمیه رک

سامور چایدان کچنده سن

خفیف- خفیف اسه ن کولک

ئوپدی سنین گل اوزوندن ...

کونول دئدی: دایان بیر آز

او دلبیرین سیرینه دال

دئدیم تورا یاخین دورماز

اوچی گورموش اورکک مارال

آچدی خیال یلکنینی

سامور چایین باش بندینه

اورک دئدی: باغلار منی

او گوزلرین کمندینه

گلیب چخدین سن ساحله

آیاغینی ئوپدی چمن

نه من گلدیم، نه سن دیله

بودا کچدی عمریمیزدن ...

سن عمرینین گنج یاشیندا

آددیمینی سایا- سایا

گلیب کچدین داغ باشیندا

توستولنن بیر کومایا

اورک قالدی یانا- یانا

ایلک گوروشدن آیریلدیق بیز

سن او یانا، من بویانا

قالدی آیاق ایزلریمیز ...

صمد وورغون 1939

بنفشه

یارین نوباریسان بیزیم دیاردا

قیوریم تئللرینی سانا، بنفشه!

من سنی سئومیشم بیر ایلک بهاردا

کونلومی وئرمیشم سانا، بنفشه!

سنسن ازل گوندن منیم سرداشیم

گوزوندن آیریلسین آخار گوز یاشیم

گووده مین اوستونده دورماییر باشیم

بوراندا بوینونی یانا، بنفشه!

چیخمیشام سیرینه می لی، مزه لی

حیراندر حسننه ائللر گوزه لی

کونلوم اویلاغینی یاخین گزه لی

چوخلاری کوسندی مانا، بنفشه!

اوزونده گوردیگیم نه انتظار دیر؟

قلبینده واقفین سری می واردیر؟

گل اوندان سوز آچما، ایندی بهاردیر

باغریمی دوندرمه قانا، بنفشه!

بوینونی کج بورما گل ایننن بئله

من سنه سوز قوشوم، سن منی دینله

وورغونون شعریله، سنین حسننله

طبیعت گله جک جانا، بنفشه!

صمد وورغون 1937

جان اولماز ایسه

جان اولماز ایسه، سن تکی جانان یئتر منه

وصلین بو خسته کؤنلومه درمان یئتر منه

هیجرون جفاسی ائیله یاخوبدور بو کؤنلومی،

هر شب قاپوندا، ناله و افغان یئتر منه

ظلمت ایچینده، آب حیات ایستمز کؤنول،

لعلون، زلا‌لی چشمه ی حیوان یئتر منه

زاهد! قووارایسن منی میخانه‌دن بو گون!

روز ازلده یار ایله پیمان یئتر منه

گر چی،"خطایی"، گئتدی الوندن وصا‌ل دوست،

هر دم خیا‌ل دیده ده مهمان یئتر منه

خطایی(شاه اسماعیل)

گئتدی اول دلبر

گئتدی اول دلبر، بسی درد و بلا قالدی منه،

نی بلا، بل کیم، یوکوش جور و جفا قالدی منه

مونجا گلدیم من گدایه هئچ عنایت قیلمادون،

ائشیگونده قالدوغیم دست دعا قالدی منه

مژده گلدی دلستانومدن کی، قتل اولدی رقیب،

شکر کیم، بیگانه گئتدی، آشنا قالدی منه

آنجه کوکب کیمی، یاش تؤکدی، غموندن گؤز‌لریم،

یئر ایله، گؤگ ایله، کیواندا باخا قالدی منه

ای "خطایی"! زولفو تک آریندی یوز‌دن زنگبار،

دلبر چین و ختن، خوب "ختا" قالدی منه

شاه اسماعیل صفوی(خطایی)

انس و جن

بار الها سن بیزه وئر بو شیاطین دن نجات

انسانین نسلین کسیب، وئر انسه بو جین دن نجات

بیزدن آنجاق بیر قالیرسا، شیطان آرتیب مین دوغوب

هانسی رؤیا ده گؤروم من، بیر تاپا مین دن نجات

بئش مین ایلدیر بو سلاطینه گرفتار اولموشوق

دین ده گلدی، تاپمادیق بیز بو سلاطین دن نجات

بیر یالانچی دین ده اولموش شیطانین بیر مهره سی

دوغرو بیر دین وئر بیزه وئر بو یالان دین دن نجات

هر دعا شیطان ائدیر، دنیا اونا آمین دئییر

قوی دعا قالسین، بیزه سن وئر بو آمین دن نجات

ارسینی تندیرلرین گوودوشلاریندا اویناییر

کیمدی بو گودوشلارا وئرسین بو ارسیندن نجات

یا کرم قیل، کینلی شیطانین الیندن آل بیزی

یا کی شیطانین اؤزون وئر بیرجه بو کین دن نجات

اؤلدورور خلقی، سورا ختمین توتوب یاسین اوخور

بار الها خلقه وئر بو حوققا یاسین دن نجات

دینه قارشی(بابکی- افشینی) بیر دکان ائدیب

بارالها دینه، بو بابکدن، افشین دن نجات

(ویس و رامین) تک بیزی رسوای خاص و عام ائدیب

ویس ده اولساق، بیزه یارب بو رامین دن نجات

شوروی دن ده نجات اومدوق کی بیر خیر اولمادی

اولماسا چای صاندیغیندا قوی گله چین دن نجات

من تویوق تک، اؤزنینیمده دوستاغام ایللر بویی

بیر خوروز یوللا تاپام من بلکه بو نیندن نجات

«شهریارین» دا عزیزیم بیر توتارلی آهی وار

دشمنی اهریمن اولسون، تاپماز آهین دن نجات

استاد شهریار

صلح اولماسا

گول منی سن ایسته سن عومروم هدر اولماز

صلح اولماسا، اولاد وطن بخته ور اولماز

آزاده لیقی، صولحی سئویلر بیزیم ائللر

بیر یئرده کی، صولح اولسا، او یئرده ضرر اولماز

اودلار وطنین نازلی گوزه للر بورویوبدور

ائللرده مثل وارکی، گوزل سیز شهر اولماز

آهیم اودو بلکه ائله سین قلبینه تاثیر

نیسان سویونو ایچمه یه داشدان گهر اولماز

هیجران گئجه سی، من چکنی چکمه سین اغیار

ظننیم جه قیامت گونو بوندان بتر اولماز

زولفون اوزونو توتسادا، گویچک لیگین آرتیر

ظلمت گئجه لر اولماسا آیدین سحر اولماز

واحد سنه، غم چکمه رقابت ائدن اولسا

مین گول قووشا بیر یئره، بحر خزر اولماز

علی آقا واحد

ناز ایله میسن!

چوخلار انجیکدی کی، سن اونلارا ناز ایله میسن

من ده اینجیک کی، منیم نازیمی آز ایلمه میسن

ائتمیسن نازی بو ویرانه کؤنولده سلطان      

ائوین آباد اولا، درویشه نیاز ایله میسن

هر باخیشدا چالیبان کیپریگی مضراب کیمی

بیر قولاق وئر بو سینیق قلبی نه ساز ایله میسن؟

باشدان آچ یایلیغی افشان ایله سوسن- سنبل

سن بیزیم بایراممیزسان قیشی یاز ایله میسن

سن گون اول، قوی غم میز داغدا قار اولسون، اریسین

منیم آنجاق ایشیمی سوز و گداز ایله میسن

من بو معناده غزل یازمالی حالیم یوخدی

سن جوجوق تک قوجانی فرفره باز، ایله میسن

کاکلی باشدا بوروب باغلامیسان تاج کیمی

او قیزیل ساچدان اونا، گوللی قوتاز ایله میسن

سینه بیر دشت مغان دیر، قوزی یان- یانه یاتیب

منیم آغلار گوزومی اوردا آراز ایله میسن

بو گوزللیک کی جهاندا سنه وئرمیش تانری

هر قدر ناز ائله سن ایله، کی آز ایله میسن

من بو سوز یله آتدین، آرالاندین بیلیرم

آرانی بیر پارا نامردیله ساز ایله میسن

دستماز ایله دیگین چشمه،مسیحا قانی دیر

بیلمیرم هانسی کلیساده نماز ایله میسن؟

من«عشیران» اوخوسام، پنجه«عراق» اوسته گزه ر

گوزلیم، «ترک» اولالی، ترک «حجاز» ایله میسن

تازا شاعر، بوده نیز هر نه باخیرسان دیبی یوخ

چوخ اوزاتسان بوغازی، اوردهگی قاز ایله میسن

بسکه زلف و خط خالین قوپالاغین گؤتدون

زلفعلی نین باشینی آزقالا داز ایله میسن

گل! منیم ایسته دیگیم کعبه ییخیلماز، اوجالار

باشدادا کژ گئده سن، دیبده تراز ایله میسن

خط و خالیندن آلیب مشقیمی قرآن یازارام

بو حقیقت له منی، اهل مجاز ایله میسن

منی، دان اولدوزی، سن یاخشی تانیرسان که سحر

افقی خلوت ائدیب رازو نیاز ایله میسن

«شهریار»ین داغیلیب، داغدا داشا دالدالانیب

ئوزون انصاف ایله، محمودی ایاز ایله میسن

استاد شهریار

دریا ائله دیم

ترکی بیر چشمه ایسه، من اونی دریا ائله دیم

بیر سویرق معرکه نی محشر کبرا ائله دیم

بیر ایشیلتیدی سها اولدوزی تک گورسنمز

گوز یاشیلما من اونی عقد ثریا ائله دیم

امیدیم وار که بو دریا هله اقیانوس اولا

اونا ضامن بو زمینه که مهیا ائله دیم

عرفانا چاتماسا شعر و ادب ابقا اولماز

من ده عرفانه چاتیب شعریمی ابقا ائله دیم

ابدیتله یاناشدیم دوغولا حافظه تای

شیرازین شاهچراغین تبریزه اهدا ائله دیم

ترکی نین جانینی آلمیشدی حیاسیز طاغوت

من حیات آلدیم اونا، حق ایچون احیا ائله دیم

(فیض روح القدس) اولدی مددیم حافظ تک

من ده حافظ کیمی اعجاز مسیحا ائله دیم

قمه قداره لر آغزیندا دیل اولمیشدی سوگوش

من سه وینج ائتدیم اونی، خنجری خرما ائله دیم

ایندی گویلرده گوزل صفله صفا ایله گزیر

منجلابلاردا اوزن اردگی دورنا ائله دیم

باخ که(حیدر بابا)افسانه تک اولموش بیر قاف

من کیچیک بیر داغی سر منزل عنقا ائله دیم

بوردا(روشن ضمیرین)ده هنرین یاد ائده لیم

من اون دا قلمین طوطی گویا ائله دیم

نه تک ایراندا منیم ولوله سالمیش قلمیم

باخ که ترکیه ده، قافقازدا نه غوغا ائله دیم

باخ که تهراندا نه شاعرلری شیدا ائله دیم

هم(سهندیه) سهندین داغین ائتدی باش اوجا

هممن ئوز قارداشیمین حقینی ایفا ائله دیم

آجی دیللرده شیرین ترکی اولوردی حنظل

من شیرین دیللره قاتدیم اونی حلوا ائله دیم

هر نه قالمیشدی کئچنلردن اونا بال پتگی

اریدیب موملو بالین شهد مصفا ائله دیم

ترکی، واللاه، آنالار اوخشاغی، لایلای دیلی دیر

دردیمی من بو دوا ایله مداوا ائله دیم

شهریار، حیف ساووخدیر بو دگیرمان هله ده

دارتماغا یوخدی دنی، من ده مدارا ائله دیم

استاد شهریار

مجنون

«مجنون ایله من مکتب عشق ایچره اوخوردیق

من مصحفی ختم ائتدیم او (واللیل) ده قالدی»*

بیر گون ده ائشیدیک که دوشوب چوللره مجنون

(واللیل) اولوب وردی، جوانکن ده قوجالدی

بیر گون ده خبر گلدی که واللیلیسی ایله

جان وئردی، جهان ایچره یامان ولوله سالدی

* بیت اول قدیمی و استاد شهریار دو بیت جهت تکمیل اضافه نموده اند.

خان ننه

خان ننه، هایاندا قالدین

بئله باشیوا دولانیم

نئجه من سنی ایتیردیم!

دا سنین تایین تاپیلماز

سن أولن گون، عمه گلدی

منی گتدی آیری کنده

من اوشاق، نه آنلیایدیم؟

باشیمی قاتیب اوشاقلار

نئچه گون من اوردا قالدیم

قاییدیب گلنده،باخدیم

یئریوی ییغیشدیریبلار

نه أوزون، و نه یئرین وار

«هانی خان ننه م؟» سوروشدوم

دئدیلرکه:خان ننه نی

آپاریبلا کربلایه

که شفاسین اوردان آلسین

سفری اوزون سفردیر

بیر ایکی ایل چکرگلینجه

نئجه آغلارام، یانیخلی

نئچه گون ائله چیغیردیم

که سسیم، سینم توتولدی

او، من اولماسام یانیندا

أوزی هئچ یئره گدنمز

بو سفر نولوبدی، من سیز

أوزی، تک قویوب گئدیبدی؟

هامیدان آجیخ ائدرکن

هامییا آجیخلی باخدیم

سونرا باشلادیم که: من ده

گئدیرم اونون دالینجا

دئدیلر: سنین کی تئزدیر

امامین مزاری اوسته-

اوشاقی آپارماق اولماز

سن اوخی، قرآنی تئز چیخ

سن اونی چیخینجا بلکه

گله خان ننه سفردن

تله سیک راوانلاماقدا

اوخویوب قرآنی چیخدیم

که یازیم سنه: گل ایندی

داها چیخمیشام قرآنی

منه سوقت آل گلنده

آما هر کاغاز یازاندا

آقامین گؤزی دولاردی

سنده کی گلیب چیخمادین

نئچه ایل بو انتظارلا

گونی، هفته نی سایاردیم

تا یاواش یاواش گؤز آچدیم

آنلادیم که، سن أولوبسن!

بیله بیلمیه هنوزدا

اوره گیمده بیر ایتیک وار

گؤزوم آختارار همیشه

نه یاماندی بو ایتیک لر

خان ننه جانیم، نولِیدی

سنی بیرده من تاپایدیم

او آیاقلار اوسته، بیرده

دؤشه نیب بیر آغلایایدیم

قولی حلقه سالمیش ایپ تک

او آیاغی باغلیایدیم

که داها گئدنمیه ایدین

گئجه لر یاتاندا، سن ده

منی قوینووا آلاردین

نئجه باغریوا باساردین

قولون اوسته گاه سالاردین

آخی دنیا نی آتارکن

ایکیمیز شیرین یاتاردیق

یوخودا(لولئی)آتارکن

سنی من بلشدیرَردیم

گئجه لی، سو قیزدیراردین

أوزیوی تمیزلیهردین

گنه ده منی أوپردین

هئچ منه آجیخلامازدین

ساواشان منه کیم اولسون

سن منه هاوار دوراردین

منی، سن آنام دؤینده

قاپیب آرادان چیخاردین

ائله ایستیلیک او ایستک

داها کیمسه ده اولورمی؟

اوره گیم دئییر کی: یوق- یوق

او ده رین صفالی ایستک

منیم او عزیزلیگیم تک

سنیله گئدیب، توکندی

خان ننه، أزون دیئیردین

که: سنه بهشت ده، آلله

وئرجک نه ایستیورسن

بو سؤزون یادیندا قالسین

منه قولینی وئریب سن

ائله بیر گونوم اولورسا

بیلیسن نه ایسته رم من؟

سؤزیمه درست قولاخ وئر:

(سن ایلن اوشاخلیق عهدین)

خان ننه آمان، نولِیدی

بیر اوشاخلیغی تاپایدیم

بیر ده من سنه چاتایدیم

سنیلن قوجاقلاشایدیم

سنیلن بیر آغلاشایدیم

یئنیدن اوشاق اولورکن

قوجاغوندا بیر یاتایدیم

ائلر بیر بهشت اولورسا

داها من ئوز آللاهمیمدان

باشقا بیر شئ ایستمزدیم

استاد شهریار، تبریز، فروردین 1355

هارا قاچسین انسان؟

جانا گلمیشیک بیز بو جانان الیندن

که نه انس امان تاپدی نه جان الیندن

مسلمانه باخ، دین و ایمان قان آغلیر

بو دین سیز، ایمان سیز مسلمان الیندن

بو شیطاندی، بیز آدمی گویده تولار

قاچا بیلمز آدم بو شیطان الیندن

آلار اول ایمانی، سونداندا جانی

نه ایمان قالار دیبده نه جان الیندن

قاریشقا کیمی دئو نژادی قیمیلدیر

که خاتم چیخیب دیر سلیمان الیندن

بادمجان چوخی بازیلاردا کوچوکلر

دا ترپشمک اولماز بادیمجان الیندن

خوروز تک بیزی دنله ییب قورتایبدیر

چینه قالماییب نو چیکدان الیندن

پناه اولسا بیز خلقه کافر، قوی اولسون

سیخینتی دوشه ک کفره، ایمان الیندن

گئدیب چٶلده کی حیوانا یالواردیق

که گلسین، بیزی آلسین انسان الیندن

ائله تورشادیب ایرانین عیرانین که

گٶزللر گٶزی یاشدی ایران الیندن

سالیب دیر اله، سانکی موسا عصاسین

قاچیر اژدها لر، بو ثعبان الیندن

نه سلطانلار اولوش الینده اویونجاق

نه گلسین اویونجاقلی سلطان الیندن

بئش- اوچ باش بیله ن ده قالیرسا، اوشاق تک

قاچیب گیزله نیب لر، بوخورتان الیندن

ائویم زندانیم، مٲموریم ٲوز ایچیمده

هاراقاچسین انسان بو زندانالیندن

بیزانسان اولاق، یا که حیوان، امان یوق

نه انسان قوتارمیش، نه حیوان الیندن

نه دئولر که قیطانلا زنجیر له نیب لر

قنف لر قیریلمیش بو قیطان الیندن

سالیب خلقی درمان آدیلن نه درده

که درد آغلاییر بیله درمان الیندن

او بیگ خان یازیقلار نه انسانیمیشلار

عبث آغلیاردیقاو بیگ خان الیندن

وئرردیک قدیم دیوانا عرضه، ایندی

کیمه عرضه وئرمک بو دیوان الیندن؟

نه طوفانه راست گلمیشیک بیز، مگر نوح

گله قورتارا خلقی طوفان الیندن

استاد شهریار