(بیزیم اربابیمیز شاه جهاندی)
ـــــــــــــــــــــــ
جهاندا پرتو ایمان حسیندی
عزیز خالق سبحان حسیندی
گدای بینوایوق درگهینده
هامی نوکر فقط سلطان حسیندی
ــــــــــــــــــــــــــــــــــــــــــــــــــــــ
حسینون عرشیده وار احترامی
گوزلدی آدی عالیدور مقامی
کلام اللهدی مولانین کلامی
اولوب حاتم بو درگهده غلامی
دوای درد بی درمان حسیندی
ــــــــــــــــــــــــــــــــــــــــــــــ
حسین نور خدای لم یزلدی
مقام و منزلتده بی بدلدی
یوزی زیبادی یوسفدن گوزلدی
ئوزی آزادهً بین المللدی
جهاندا حامی قرآن حسیندی
ـــــــــــــــــــــــــــــــــــــــــــــــــ
حسیندی ملک جانون امیری
حسیندی دولت عشقون سفیری
ولایت برجینون ماه منیری
کمند زلفنون عالم اسیری
صفای گلشن جانان حسیندی
ــــــــــــــــــــــــــــــــــــــــــ
اگر حاتم کریم و مهرباندی
اگر لیلی دیور مجنونه جاندی
اگر یوسف نگار مصریاندی
بیزیم اربابیمیز شاه جهاندی
بو عالمده شه خوبان حسیندی
ـــــــــــــــــــــــــــــــــــــــــــــــــ
دیسه لر کیمدی عرشه گوشواره
دینن عاقللره بسدور اشاره
گیدوب قونداقدا عرش کردگاره
گونه باخما حسینه قیل نظاره
نگار سوم شعبان حسیندی
ــــــــــــــــــــــــــــــــــــــــــــــــــــــ
حسین دلبردی ختم المرسلینه
ملک فخر ایلییر بو مه جبینه
که نوریلن ایشیقلاندی مدینه
قازاندی آبرو قانیله دینه
منای عشقیده قربان حسیندی
ــــــــــــــــــــــــــــــــــــــــــــ
باخ اعجازه حسینون باره سینده
تاپوب فطرس اونی گهواره سینده
گوروب نور شفا رخساره سینده
آلوب دم اولین نظاره سینده
دیدی حقا شه شاهان حسیندی
ــــــــــــــــــــــــــــــــــــــــ
حسینی عالمه سلطان تانوللار
اونی هر دردیچون درمان تانوللار
بو دنیاده شه خوبان تانوللار
آتاسین ،حجت رحمان تانوللار
علینون روحینه ریحان حسیندی
ـــــــــــــــــــــــــــــــــــــــــــــــــ
بیر عده خواب غفلتدن اویانماز
ویرار طعنه بیزه حقدن اوتانماز
اگر چه بو سوزی بیگانه قانماز
حسینچی آتش دوزخده یانماز
که عشاقه ایدن احسان حسیندی
ــــــــــــــــــــــــــــــــــــــــــــ
اول آگه عرصه ده ای مرد همت
سنی آللاتماسون بش گون ریاست
خفاده دستووا ایتمه حسادت
نمازین قیل خدانی ایت عبادت
ولیّ حضرت منان حسیندی
ــــــــــــــــــــــــــــــــــــــــــــــــــــ
حسینون درگهینده نوکرم من
اوشاقلیقدان آدینا ازبرم من
گلر جمعه گونی دیده ترم من
گل نرگس یولووی گوزلرم من
که جانیم مهدیدی جانان حسیندی
ــــــــــــــــــــــــــــــــــــــ
یاتوب رویاده بیر گون یاری گوردوم
قانا باتمیش در و دیواری گوردوم
یارالی سینه ده مسماری گوردوم
قولوندا قمچیدن آثاری گوردوم
او حاله ایندیده گریان حسیندی