در اوصاف امام حسین(ع)

یا حسین! وجودوندن ماسوی شرفلندی

عرشه گیتدی قنداقون نه سما شرفلندی

***

جبرئیل که قنداقون قالخزوب گوگه ساری

نار قهره یانمیشدی فطرسون قنادلاری

چون سنی شفیع ایتدی رحمه گئتدی قهّاری

شامل اولدی حقّینده لطف حضرت باری

گییدی خلعت رحمت مبتلا شرفلندی

سرّ کنتُ کنزاً سن، مظهر العجایب سن

کیم سنه دییر مغلوب، سن اوزون که غالب سن

ختم الانبیا اوغلی، خاتم المصائب سن

اهل فهمه ظاهرسن، اهل جهله غایب سن

هر اورکده گورسنسون سن اورا شرفلندی

بیر ندائیلن اهل عالمی ملول ایتدون

اِنّی وجهیَ لله سرّینی قبول ایتدون

نفس مطمئن حکمین حقّدن وصول ایتدون

سگّزینده ذیحجّون کعبه‌دن عدول ایتدون

دهم محرّمده کربلا شرفلندی

تربتونده معبودون قویدی اوزگه خاصیّت

گلدی سندن اظهاره اوندا خارق‌العادت

اخذ ایدوب او تربتدن چوخ مریضلر صحّت

حائرنده هر کیمسه حقدن ایستسه حاجت

قرب ربّ‌العزتده اول دعا شرفلندی

بو مقاموه سوز یوخ، ناظر قیامت سن

نسل آدمه الحق مایه‌ی شرافت سن

دینون اوستونه آچدون پرچم حمایت سن

چوخ آغیر تکالیفه ایلدون کفالت سن

ابتداده خلق اولدون انتها شرفلندی

ای محمّدون روحی وی علینون آرامی

خنجر آلتدا جان ویردون روحه گتدون اسلامی

گزدون آهنین نی ده شهر کوفه و شامی

اگلنوب اوجا یرده نشر قیلدون احکامی

دین عالم آرای مصطفی شرفلندی

سن ستون قائم سن عرش حیّ و رحمانه

آیه آیه زینت سن محکمات قرآنه

رونق و صفا ویردون خاندان ایمانه

وقت که قدم قویدون خاکدان ویرانه

هم فنا شرفلندی هم بقا شرفلندی

هر یره داموب قانون سجده‌گاه اولوب خلقه

تربتون مصلّی‌ده تکیه‌گاه الوب خلقه

آفرین همین قانه خیرخواه اولوب خلقه

گوی طاعت عشقون قبله‌گاه اولوب خلقه

یرده گوگده عشّاقون جابجا شرفلندی

ذوالجناحدن اهل کین سنی یخان وقته

عرش اعظمون اوسته قاتلون چیخان وقته

حسرتیله تلّ اوستن زینبون باخان وقته

گل بوغازوون قانی تپراقا آخان وقته

خاک کربلا مثل کیمیا شرفلندی

عالم الستی‌ده محتوی دو پیمانون

اوچ گئجه گونوز قالسون چولده نعش عریانون

اولمادی ویرن غسلون، غسلون اولدی اوز قانون

جسموه کفن اولدی قوملاری بیابانون

بوریاده دفن اولدون بوریا شرفلندی

نیزه‌دن دامان قانون قیمتین خدا ویردی

یدّی باب جنّات عدنی خون بها ویردی

ساکنین جنّاته رتبه‌ی عُلی ویردی

بیربیرینه حوری‌لر دست مرحبا ویردی

کایناته فخر ایتدی خون بها شرفلندی

ای خلاصه‌ی ایجاد وی چکیده‌ی خلقت

یحیوی یازار وصفون با تفاخر خدمت

ایلیوب قاپوندان چوخ استفاده‌ی عزّت

ووردی فکرینه آدون سکّه‌ی شرافیّت

رایج اولدی اشعاری خلق آرا شرفلندی

شاعر: استاد یحیوی، تاج‌الشعرا

سلام زیارت شهدا و اسرای کربلا

تشنه سو کنارینده، لبلره سلام اولسون

قانه غرق اولان باشسیز، پیکره سلام اولسون

تربت مقدّس که، کیمیادن آرتوقدور

قبّه‌ی منوّر که، نه سمادن آرتوقدور

بقعه‌ی مطهّر که، هر بنادن آرتوقدور

کیم دیه بیلو‌ر کعبه، کربلادن آرتوقدور

اوندا دفن اولان شاه بی‌سره سلام اولسون

روحی روح الارواحه، جسمی روح ذیروحه

سینه که خدنگیله، خنجریله مشروحه

صورت خون‌آلوده، سجده‌گاه مجروحه

هم یَدان مقطوعه، هم قفای مذبوحه

لخته لخته قان دولموش، گوزلره سلام اولسون

کاکل سَمن سایه، قامت دلارایه

شب چراغ مظلومان، نور چشم زهرایه

گوهر شب افروز و اهل بیت طاهایه

طاقت دل زینب، نوجوان لیلایه

قطعه قطعه دوغرانمیش، اکبره سلام اولسون

گُلعذار زیبایه، سرو قّد رعنایه

ابروان قوسینه دیده‌های شهلایه

قانیلن اولان الوان، زلف عنبر آسایه

آتلارین ایاقینده پاره پاره اعضایه

قان حنا خضاب ائتمیش، اللره سلام اولسون

طفل بی‌زبانی که، گُل کیمی سولوب یاندی

اوچ گئجه گونوز عطشان، دل دوداقی اودلاندی

ظهر یوم عاشورا، سو یانیندا اوخلاندی

شهپر آچدی پیکاندان، قوش کیمی قانادلاندی

شاهباز خونین پر، اصغره سلام اولسون

بیر جوان که منصبده، کربلا علمداری

خون سرخیله رنگین، بید‌ق نگونساری

قویدی قان سووا قیمت، مشگی اولدی گُلناری

سو یولیندا سعی ایتدی، تا کسیلدی قولّاری

صاحب دو بازوی احمره سلام اولسون

شدّ‌ت سوسوزلقدان، اودلانان دوداقلاره

آت دوشونده قاچماقدان، زخم‌دار ایاقلاره

شام‌ده قرانلوقدا، آج یاتان اوشاقلاره

بیر ده ام‌کلثومه، زینب دل افکاره

دختران خاتون محشره سلام اولسون

خواهر علی‌اکبر قالدی بیت‌الاحزان‌دا

یوخ چراغی یوخ فرشی، بیر خرابه زندان‌دا

تُپراق اوسته جان ویردی، اولدو کافرستان‌دا

کَفنی بیر قرا معجر، دفنی کُنج ویران‌دا

اول سکینه‌ی محنت پروره سلام اولسون

سیّدالعبادی که بسته‌ی طناب اولدی

شهرلرده حقّینده، ظلم بی‌حساب اولدی

پیشوای اسلامه خارجی خطاب اولدی

آتش شماتتده، خاطری کباب اولدی

اول مریض دل خسته، سروره سلام اولسون

کوفه‌ده عقیل اوغلی مسلم وفاداره

مالک اوغلی ابراهیم، جان نثار مختاره

ابن‌عوسَجه مسلم، هم حبیب سرداره

شاهراه ایماندا، جان ویر‌ن جوانلاره

طفل و پیر و برنایه، یکسره سلام اولسون

یحیوی الون یئتسه، گنبد طلاپوشه

بحر لطف مولانی، آهیلن گتور جوشه

اخذ قیل او درگه‌دن، هر ایکی ایوه توشه

احتراماً عرض ایله، پیش قبر شش‌گوشه

محضر همایون انوره سلام اولسون

شاعر: مرحوم استاد یحیوی اردبیلی(تاج‌الشعرا)