اشعار ترکی آذری و فارسی

اشعار ترکی آذری و فارسی

مئی ساتانلار کوچه‌سی- تورکی و فارسیجا شعرلر
اشعار ترکی آذری و فارسی

اشعار ترکی آذری و فارسی

مئی ساتانلار کوچه‌سی- تورکی و فارسیجا شعرلر

اوغرو منظومه‌سی

بیر اوغرو گلیب هر نه دئسن وار اونا قابی

حیرت‌ده قویوب هم منی هم شیخ ایله شابی

بال گورسه دویونجاق اونو بارماقلایاجاق‌دیر

بارداقه توکوب ایچمه‌لی‌دیر گورسه دوشابی

چوخ‌دان چوخا آزدان آزا قانع‌دی ایشینده

مشکل وئره الده‌ن بئله بیر کار ثوابی

انصاف‌لی دی خوف و خطری هاممیا بیر دیر

بیر نمره آلار مدرسه‌ده مهر و عتابی

بو اوغرو نه تاجردی نه قاضی نه وزیر دیر

آج قالماقین اوستن‌دی ایاب ایله ذهابی

ایش‌سیزدی ولی اهل و عیالین دیشی واردی

دیش‌لیک دیله‌یه‌ن اولادینا یوخدو جوابی

بو اوغرو اوزونده‌ن آجا حاشا تله قورسون

توخ اوغرویا همیانی‌ده وار بند و طنابی

بیر اوغرودا وار ظاهری خوش رتبه‌سی والا

دنیا منیم اولسون‌دی اونون جمله عذابی

چیرکین لیگی‌نین اورتوب اوزون جامه‌ی الوان

بیر قورخولو موجود ایدی رد اولسا نقابی

یای گلسه گوزه‌ل یایلاقی ساحل قیراغین‌دا

قیش اولسا بوران اینجیده بیلمز او جنابی

گوندوز نازینا مشتری‌دی میز ریاست

سون‌سوز گئجه‌لرده پر قو اوسته‌دی خوابی

قوللوق‌چو سونون دائم ایپک دستمال الینده

ماستون‌چو سونون شیش ده مهیادی کبابی

نیسگیل کوکونو قازمادا مانقال ماشا حاضر

گر نشئه‌نی تخت ائیله‌مه‌سه باده‌ی نابی

دولت حقوقون دا او داوام یوخ اوده بیلسین

بئش گون بو گئنیش لیک‌ده حساب ایله کتابی

ناچار سالیب دیر اله بیر حکم بو اوغرو

قادر دی اگر بیر گئجه‌ده چاپسا سرابی

چون قافیه حکم ایله سراب‌دان آد آپاردیم

حتماً قلمین شاکی‌یه کافی‌دی جوابی

مین‌سه دالووا بیزله‌یه‌جک مقصده چاتسین

مین‌سون دالینا چاپمالی‌دی خوش‌دو رکابی

مسجدده تمرد ائله‌مز اهل نمازه

میخانه‌ده ضایع ائله‌مز دور شرابی

هر کس دئیه بیلمز قاشون اوستون‌ده گوزون وار

الا او کی اوندان قازانیب رنگ و لعابی

بو اوغرویا کیم اوغرو دئسه باشی خطرده

او اوغرو همان اوغرو فلانی‌دی شهرده

بیر شهرده کی اوغروسونون یوخدو چیخاری

اول شهرده اولدوز سایاراق گوزله‌مه یاری

گئج گلمه سینه اینجیمه تئز گلسه یقین بیل

ائل‌لر آرا حیثیت‌ووی قونشون آپاری

باخ اوغرویا عبرت ائله؛ خالقین شهرین‌ده

اوچ مین دونه میلیارد تومن چکدی یوخاری

نه دوشدو خاما بئل بوخونو قددی بوکولدو

نه ذره‌جه ائل‌لر آرا اسکیل‌دی وقاری

یخچالی قویوب چیگن‌اینه امما بیزیم اوغرو

هم دورگونو یئل‌لندی همی قیردی داماری

اونلار بئجره‌ن اوغرو تورونتوی‌دا توی ائتدی

بیزلر بئجره‌ن اوغرو گئدیب گزدی نیاری

دریا پولا یئر وئردی او اوغرو بالا کیف‌ده

امما بونون اون مین تومن این دوتمادی گاری

او کندی چاپان چاغ‌دا گئدیب کاتدانی گوردو

بو بیر کئچی کتده‌ن گوتوروب اولدو فراری

او ال‌ده چراغ ایسته دیگین سئچدی آپاردی

بو بیر دریز اوتدان اوتوری یاخدی فناری

او خلقی سویوب بای بای ایلان چیخدی وطن‌ده‌ن

بو قارنی‌نین اوستونده گئدیر دوستاغا ساری

اوخشاتدی اونون قیش گئجه‌سین یازه اوغورلوق

بو اوغرویا بیر آن دا خزان ائتدی بهاری

گئت اوغرودا اولسون ائله‌بیر اوغرو اول ائل‌لر

قربان ائده‌لر هیکل اینه دار و نداری

بیر اوغرونو مامورایله گوردوم کوچه میزده

قولباق بیر الینده او بیری ال‌ده بخاری

زاغ زاغ بدنی تیتره‌مه‌ده شاخدا اونون‌ده

آرنین‌دا خجالت تری اوزده‌ن یئره جاری

سوردوم نه خطا چرتیب الینده‌ن بو اسیرین

آیدین منه ذکر ائیله سنی حضرت باری

تیکدی ائله گوز هیکلیمه باش‌دان ایاقه

بیر اووچو دو ات داش ائله‌یر سان کی شکاری

چیمخیردی تبخترله منه: کور کی دگیل سن!

آیا بو بخاری‌ده‌ن آغیر مدرک کاری

گوردوم نه بخاری کی تداعی ائدیر آنجاق

تهران‌دا قجر عصری نی مسکوودا تزاری

گوزلرده‌ن ایراق چون کی چیخیب آشغال ایچین‌ده‌ن

پارتداق پامادورلان بزه‌نیب جسم نزاری

ماموره دئدیم کور دگیل‌ام وئرسن اجازه

ثابت ائده بیل له‌م کی اوتوزدون بو قماری

گر اوغرو دوتورسان بو یازیق دوغرو دی سن‌ده‌ن

اینجیتمه داریخدیرما بو زاری سنی تاری

گر حکم وارون آج دوتاسان وقتی یوباتما

دوستاق‌دا آپار میل ائله‌یه بلکه ناهاری

احسن بئله ماموره کی بوشان‌لی شهرده

هوش باشدا جیمیز بانددان آرتیق‌دی عیاری

بیرده یئری اولسا او عزیز قاضی‌یه عرض ائت

دورونده کی توخ اوغرولارین یوخدو شماری

مال میدانی‌نین اوغروسونا بیر کئچی بسدیر

لعنت لیگ ائده حشره کیمین ایل و تباری

گئت قصرلرین ایچره گزیش اوغرونو بلکه

منصور کیمین شوط ائده‌سن چوبه‌ی داری

یوخ سهو ائله‌دیم حقی اونود «عاصمه» باخما

بیر عومردی چیگن‌اینده گزیر سنگ مزاری

قوی عومرو ووروبدور باشا بئش گون‌ده دئینسه

تا گلسه اجل جامی اونون جانینه ساری

شاعر: پرویز عاصم اردبیلی

نه ائتمه‌لی‌ام؟

من ایستیره‌م اوزومو آغلایام نه ائتمه‌لی‌ام؟

اولن دیلک‌لره یاس ساخلایام نه ائتمه‌لی‌ام؟

من ایستیره‌م کوزه ریب اودکیمین کول اولسامدا

قارانلیقین اوره‌گین داغلایام نه ائتمه‌لی‌ام

چوخ ایستیره‌م قوناقیم اولسا شعریمین پری‌سی

قیزیل غزل قولونا باغلایام نه ائتمه‌لی‌ام

من ایستیره‌م سویو چاتدیرماغا یارین باغینا

جوشوب شلاله کیمین چاغلایام نه ائتمه‌لی‌ام

منیم ده اوخشاماغا محتشم دیاریم وار

صفالی باغچالی‌یام باغلی‌یام نه ائتمه‌لی‌ام

اوزوم‌ده یاسلی گوزوم‌ده سوزوم‌ده شعریم‌ده

آچیق دئیم ساوالان داغلی‌یام نه ائتمه‌لی‌ام

... و ایستیره‌م نه عطا اولسا عاصمه ائل ده‌ن

سیزه‌ده بیر نئچه پای ساخلایام نه ائتمه‌لی‌ام؟

عاصم اردبیلی

یئنی تکنیک

لعنت اینترنتـه کی لال لاری گویا ائله‌دی

یوخی وار قاره نی آغ چیرکینی زیبا ائله‌دی

اته نه قوش لارینا قدرت پرواز وئریب

سوت دیشین توکمیه‌نی حکمته دارا ائله‌دی

آچدی علمین قاپی سین غرب ده انسان اوزونه

تکجه فکر اوغروسونو شرق ده احیا ائله‌دی

لوله‌یین گورمه‌یه‌نین آفتافا وئردی الینه

خورخورا دوشدو خبرآلمـا نه غوغا ائله‌دی

اوشاقین آلدی الین‌ده‌ن توته‌کی وئردی موبایل

او طفیل ده اونو دفترچه‌ی انشا ائله‌دی

یئتمیش ایل سانجی چکیب نیما بئجرده‌ن وطنی

آز زامان دا نئچه مین صاحب نیما ائله‌دی

شاملووون قویدو ایاغ چینینه قوزاندی گویه

اخوان نقشی‌نی اشعارده امحا ائله‌دی

فکر صاحب‌لری‌نین گنجینی تاراجه قویوب

رنج سیز بیرگئجه‌ده سارساقی سینا ائله‌دی

وزن‌ایلن قافیه‌نی شاققالایب آتدی ایته

حضرت حافظه بیر محکمه برپا ائله‌دی

سعدی‌نین قبری‌نی قازدیردی گلستانین‌ده

قتل فرمانی‌نی فردوسی‌یه امضاء ائله‌دی

مولوی‌نی ائله‌دی نفی بلد قونیه‌ده‌ن

اولو خاقانی‌نی شیروانیده رسوا ائله‌دی

نظم‌ده‌ن سالدی نظامی کیمی شعرین آتاسین

صائبین سبکی‌نی هند اوغلونا اهدا ائله‌دی

بیدل‌این کسدی دیلین دهلی‌ده باسدیردی یئره

سعـد سلمانی‌ده زندانیده ابقا ائله‌دی

شهریارین گوتوروب شعر تاجین باشیندان

گونش‌این چشمه سینی شب پره حاشا ائله‌دی

بوغدو حیدربابانی دوغدو مدرنیسمی بیزه

درده باخ اوندادا بی‌سرلری بی‌پا ائله‌دی

سیمین‌این دیوانی‌نی زوللادی آشغال قابینا

پروینی کهنه بئین شاعره معنا ائله‌دی

سایه‌نی حال حیاتی‌نده زمین‌گیر ائله‌ین

فروغی رتبه‌ده بیر شاعر نوپا ائله‌دی

ادبیات دنیزینده اوزه‌ن اوزگونچولری

بوشلایب گول‌ده باتان قطره‌نی دریا ائله‌دی

و بو اینترنت اگر وئردی تعالی بشره

بیزیم ایران دا بوتون اسفلی اعلا ائله‌دی

قارقانی قوزقونو دولدوردی ادب باغچاسینا

بولبولی داردان آسیب پشه‌نی عنقا ائله‌دی

ادبیاتیده چالـدی ادبین داش باشینا

یئنی معجونیده‌ن اخلاقی مجزا ائله‌دی

سرقته فرصتی بذل ائتدی شعر اوغروسونا

اودا اوز ذاتینی وبلاگ‌دا هویدا ائله‌دی

زلف اوزاندی قاش آلیندی دیشی‌لندی کیشی‌میز

لعنت اول تکنیکه مجنونو لیلا ائله‌دی

طاووسی ساتماق ایچون یوللادی مال میدانینا

دورری خرمهره‌یه بازاریده همتا ائله‌دی

اوز کوکون‌داندی اوشاق باغلادی بیگانه‌یه بئل

نه اوتاندی نه اوساندی نه ده پروا ائله‌دی

آتاسین دان بئخبر بیلدی اوز ائل‌داشلاری‌نی

نه بیلیم بلکه ده اوز سری‌نی افشا ائله‌دی

نه گیله فقرده‌ن ائتدی نه آخان قان یاشدان

نه تالانمیش‌لار ایچون صبر تمنا ائله‌دی

نه قارانلیق گئجه‌یه بیر جوما اولدوز چیله‌دی

نه دومانلیق به‌یه‌نن آزمانا ایذا ائله‌دی

نه بولاق اولدو آچیب یول آخا یار باغچاسینا

نه چراغ ایله‌ایتن یولداشی پیدا ائله‌دی

تکجه اوهام‌ایله شعرین پری سین سالدی تورا

چالیشیب صبحه کیمی نفسینی اغنا ائله‌دی

اعتراض نامه آدین قویدو هدر سوزلری‌نین

تا کی اوز شاه اثرین ائل‌لره اهدا ائله‌دی

تف سنین گردش دورانینا ای چرخ فلک

بو دولانماق کیمی گور کیم لره مولا ائله‌دی

عاصما بسدی دایان شعرینه صون قوی بونو دء

لعنت اینترنته کی لال لاری گویا ائله‌دی

استاد عاصم اردبیلی خرداد 1390

چیخسا اوکی ده‌ن

ساقی زامانین جبری منی سالسادا  هی ده ن

سرشار ائله جان ساغری نی قیرمیزی می ده ن

هجران ستمین ده ن اوجالیب گوگ لره ناله ام           

سوسدورمنـــی آنجاق سوروش احوالیمی نی ده ن

من مدرسه ده تکجــــــــه بو بیر نکته نی قاندیم           

مشکل آپارام فایـــدا(الف) ده ن یادا(ب)ی ده ن 

قانمـاق نه قه‌در چوخ او قه ده ر یانماقین آرتیق           

بختین بو  قه‌در  باغری نی چاتلاتما گیلی ده ن

دونموش بییینه  گون ده  کسر  یوخدور اریتسین           

بوشلا قوزئ یی باشلاما افسانـه گونئی ده ن

خرمایه یاخینلاش نئجــه کی حضرت زاهد           

گوزیومدی  خداده ن ولی گوز یوممادی ری ده ن

قاضی کی قضاوت ده اوگئی دوغمـاسی اولدو           

باج آلمالی دیر حشـره کیمی دوغما اوگئی ده ن

ایمان ائوی کفرین پیله گی ایلن یئخیلانـدیر

هریئرده اجل قصری اگر سست اولا پی ده ن

قانماز ائله قانمازدی باشـی عرشه ده چاتسا

یوخ فرقی پاریس ده ن اولا صادر یا رضی ده ن

باغلاردا یئرین برکیـده بیلسه قارا قارقا

بولبول چیخا بیلمـز یازا قورتارسادا دی ده ن

انسانی فنرمثلی کی یئغدین آچیلاندا            

گاه آنکارادان باش چیخـادار گاه دا دوبی ده ن

سانما کئ یئ یب ظلمکارا قارشی قلم لر 

تابوته دونر تخت قلم چیخــدی کی  کئی ده ن

ایسترسن اولاغ یوللانا قارداش یئمین آرتیـر            

عیسی ائله ین  معجزه نی اومما هـوچی ده ن

رستم سن اگر گوجلو اولانمازسن اجل ده ن              

سلطان سان اگرفایدالان افسانـه ی کی ده ن

جسمون  کی نهایت ده اولار  قورد قوشا قسمت             

منده ن سوز ائشیت ائیله حضر اوچ دانا پی ده ن

پول دور بو اوچون ان بویوگی  هر قده ر آرتسا              

قاپمــاق دا یقین سبقت آلارسان آنا لی ده ن

پارتی نظریم دیر او ایکینجی پی یه دایـر              

پارت ایلا آشان ایش سالاجاق پی سری هی ده ن

آیدین دیر اوچونجو پی علامت دی پلـوودان               

بوکسون کیسه سی گورنه یه وارث دی کلی ده ن

دوزگون سوزونه(عاصم) اگر مشتری قالسا              

ائل لر آرا نشر اولمالی دیر چیخسـا اوکی ده ن

کوسموشم(عاصم)

دوزموشوم اول قدر هجرانه دوزومدن کوسموشم

اوزموشم امید وصلتدن اوزومدن کوسموشم

اویموشام ایللر بو ظاهربین گوزون فتواسینه

اَیری لر دوز گورموشم، از بس گوزومدن کوسموشم

گورموشم چون مصلحت چنگنده طبعیم رام اولور

ائلدن الهام آلدیغیم شیرین سوزومدن کوسموشم

تکجه عاصم سونمه ییر سینه مده عشقین آتشی

سانما بئش گونلوگ سمندر تک کوزومدن کوسموشم

عاصم اردبیلی

سنی من گورممیشیدیم ولی سنلن تانیشیدیم نه دن؟

بوباغین بولبولو بیرده ن بیره لال اولدو نه دن؟

قوزقونا قارقایا جولانه مجال اولدو نه دن؟

شانلی یازکسمیشیدی قاره قیشین بوز نفسین

یازا چیخمیش صونالار غرق ملال اولدو نه دن؟

هانکی صرصر الی پرپر ائله دی گول چیچگی

بو برومند آغاجین میوه سی کال اولدو نه دن؟

بیز کی جان جان دئمه دیک اولکه ده قان قان دئینه

سئوگی منظومه سی حال اهلینه قال اولدو نه دن؟

مِیِ انگوری سؤزوم یوخ کی حرام ایدی بیزه

انسانین قانینی نوش ائتمه ک حلال اولدو نه دن؟

بیز بیلردیک کی دوغولماز یئنی دن رستم زال

یوردون حرّاجه قویان رستم زال اولدو نه دن؟

ایسته دیک سیره چیخاق ماوی سمالرده بیر آن

سیندی قُول یاندی قاناد سیر محال اولدو نه دن؟

آی کیمین آیدین یدی (عاصمه) ناحقّیله حق

پس حقین قامت موزونو هلال اولدو نه دن؟

صالح عاصم اردبیلی 

به نقل از وبلاگ دکتر فیروزی

دوستلار گوروشو

دوستلار گوروشونه آنا یوردومدان

کونول بوقچاسیندا سوز گتیرمیشم

ادب باغچاسیندا سولماز گوللره

آراز کیمین آغلار گوز گتیرمیشم

دالغالی دنیز تک جوشوب چاغلایان

ائلر یاراسینی آچیب باغلایان

چئوریب بولودا قان یاش آغلایان

شعریزه بیر چیمدیک دوز گتیرمیشم

اولو بابالاردان یادگارلارا

عاشیقلار جمعینده بسته کارلارا

تایسیز ایگیدلره وورغون یارلارا

منده بیر وورغونام اوز گتیرمیشم

شعرین اوجاغیندان قالخان کوزلره

اوزون گئجه لرده اویاق گوزلره

سینه لر یاتاغی اودلو سوزلره

سولطان ساوالاندان بوز گتیرمیشم

وورغونام او آیدین گئتدیگیز یولا

نه ساغا باغلی سیز نه ده کی سولا

گلمیشم سیزیلن وئرم قول قولا

خورجوندا نه ییم وار دوز گتیرمیشم

محبت ایپه گین آچیب سرمه گه

کونلوزون آغری سین بر آز درمه گه

ظولماتا گونش تک سینه گرمه گه

یانیقلی سازیمدا کوز گتیرمیشم

ائشیتدیم سوز قیزین بوردا آلان وار

عاصیمین باغیری تک داردا قالان وار

غزل باغچاسیندا نغمه چالان وار

قارا تئل سارا تک قیز گتیرمیشم

من آنا یوردومون بیر دیلمانجی یام

بیر جوما آرزی یام، شعرم، سانجی یام

دنیزلر اونونده ایتگین دامجی یام

گونشه دیرماشان توز گتیرمیشم

صالح عاصم اردبیلی

سئوگی دن افسانه یاراد

گؤزلیم! سالما گؤزوندن منی، بیگانه کیمین

اذن وئر، شوط ائدیم اطرافینی پروانه کیمین

بخت آئینه سی تک، سیل اوره گیندن کدری

تا صداقت باخیشیندان جوشا، میخانه کیمین

اوخو عشقین کیتابین، سئوگی دن افسانه یاراد

کؤنلومو شوقیله سرشار ائله، پیمانه کیمین

روحوم آشوفته دی، زولفون کیمی آی سیزدی گئجه م

بو پریشانلیغا بیر نظم یاراد شانه کیمین

گل گؤزللر آرا، بی رحمیلیگ آییننی پوز

سالما اؤز عاشیقینی چوللره، دیوانه کیمین

بولبولم، قهر زمان، باغدان اوزه ندن الیمی

قارا خالیندی چکن دامه منی دانه کیمین

گل ملامت داشی آلتیندا، بو بیچاره کؤنول

تالانیب قیش گونو، تاراجه گئدن لانه کیمین

گون کئچیب، آی دولانیب، ایللر اؤتوبدور هله ده

سینه ده ساخلامیشام گنجیمی ویرانه کیمین

گلمه دین، اوندا کی جان دردینه درمان واریدی

ایندی درمان دا منه درد دی جانانه کیمین

عاصمین طبعی، صداقت بولاغیندان سو ایچیر

گر چی دؤزگونلوگ، اولوب دهرده افسانه کیمین

عاصم اردبیلی

گوزلرون ده نه وار

گوزون دولوب سوزایلن بیلمیره م گوزون ده نه وار؟

اوزون گورن ده دیلیم لال اولور اوزون ده نه وار؟

باخان دا شـوق ایله شمشاد مثـلی قامت اینه

تاپانمیرام اوزومــو نازنین اوزون ده نه وار؟

آجی سوزون منه بال دان شیرین دی بیر سوزه گل

اوزون بویور بو معما نه دیر؟ سوزون ده نه وار؟

نه کوزدو کونلومو یاخدیقجا داغ لی لاله بیته ر؟

بو شـوره زاری گلستان ائده ن کوزون ده نه وار؟

عومور یازین دا کی کونلوم سن ایله یازلاندی

او یازلا یازلانیرام دادمیشام گوزون ده نه وار؟

او گون کی آیریلیقا چاره، دوز، دئدین هله لیک

اطاعتین ده وار عاصم گوره دوزونده نه وار؟

دئمه اوزون ده، سوزون ده، گوزون ده اولدوغونو

گوزون دولوب سوز ایلن کاش بیله ام گوزون ده نه وار؟

صالح عاصم اردبیلی

گئتمه

سن سیز اوره گیم ناره گرفتار اولو گئتمه

کئچمیش قارا گونلر منه تکرار اولو گئتمه

مین دردیمه درمان گتیریب نرگس مستون

گئتسون دل سودا زده بیمار اولو گئتمه

اون دورت گئجه لیک آی کیمی ساچ کونلومه یوخسا

زولفون کیمی آیدین سحریم تار اولو گئتمه

کونلوم قوشو چیخمازدی چمن سئیرینه سن سیز

سنلن گوزلیم مایل گولزار اولو گئتمه

حاشا گوله بیر گول اوزومه دهر ده سنسیز

گولشنده ده گوللر گوزومه خار اولو گئتمه

جان نقدینه بیر نازینی ساتسون آلارم من

کیم من کیمی اول نازه خریدار اولو گئتمه

عشاق آرا باشیم اوجالار داغ کیمی قالسون

اغیار آرا عاصیم قوجالیب خوار اولو گئتمه

استاد عاصم اردبیلی

نازا قویدی

بیر بوسه تمنّا ائله دیم یار نازا قویدی

قیشدیر دئدی وعده ی وصلین یازا قویدی

بیلمم منی گورجک نییه سرعتله سووشدی

یالواردیم ایاق تورموزا قویسون گازا قویدی

لطف ائیله دئدیم قویما بو عشقین کوزی سونسون

چونبلدی بیر آز مجمر عشقه آزا قویدی

اصرار ائله دیم لطفووی آرتیر بو حقیره

چوخلوق دئدی پوخلوقدی بناسین آزا قویدی

کونلوم قوشون، ازل؛ اوزی پروازه گتیردی

سونرا منی مرج ائیله مه گه قوشبازا قویدی

آهیم دالیسیجان او قَدَر کئش تک، اوزاندی

اولچوب حسابین ساخلاماقی بزّازا قویدی

برکیدی اَتیم پیشمه دی عشقین اوجاقیندا

باسدیردی کوله پیشمگیمی آشبازا قویدی

صادق بو غزلدن ایکی بیت ائیله دی انشا

لطف ائیله دی شعرین دالین عاصیم یازا قویدی

استاد عاصم اردبیلی

زامان آغلاتدی منی

آغلامازدیم زامان آغلاتدی منی

دوز یولوندان آزان آغلاتدی منی

گوردوم حسرتدی همالر سوموگه

ایشله ییر شاخدا سوموکدن ایلیگه

دوزوموزده اییلیر ایری لیگه

قالدی قانماز قانان آغلاتدی منی

آغلامازدیم زامان آغلاتدی منی

تک صبیر گلدی دئدیم ایش دوزه لر

قار گئدر، بوز ارییر یازدا گلر

نه بیلیم یازدا بوران باغری ده لر

یوخاچیخمیش گومان آغلاتدی منی

آغلامازدیم زامان آغلاتدی منی

دئدیلر بیر گون اولار ساز حالیمیز

قیتدیق اولسا واریمیز یاغ بالیمیز

ایندی کی اون تک اولوب ساققالیمیز

بو یالان سوز یامان آغلاتدی منی

آغلامازدیم زامان آغلاتدی منی

ظن ائدیردیم آغیر اولسا یارالار

یارالار آغریسین آنجاق یار آلار

نه بیلیدیم اوره گی یار یارالار

بیلمه مز لیکدی، قان آغلاتدی منی

آغلامازدیم زامان آغلاتدی منی

اره لر توشدو که جنگل جانینا

تولکی لر تور توخودو اصلانینا

طرلانی اووچی باتیر جاق قانینا

اوخدان آرتیق کامان آغلاتدی منی

آغلامازدیم زامان آغلاتدی منی

اری مز قالدی بیینده بوزوموز

گویده سایریشمادی بخت اولدوزوموز

نه قویون قالدی نه املیک قوزوموز

قوردا بنذر چوبان آغلاتدی منی

آغلامازدیم زامان آغلاتدی منی

من دئدیم باغلاسا یادلار قولومو

دایاقیم وار قورییا ساغ سولومو

قوپدی بیر چن که ایتیردیم یولومو

داغا باخدیم دومان آغلاتدی منی

آغلامازدیم زامان آغلاتدی منی

وای بیزه اولدی پوزولماز یازیمیز

مضراب اود توتدی قیریلدی سازیمیز

قالدی قیشلانمادا عاصم یازیمیز

یازی گول سوز یازان آغلاتدی منی

آغلامازدیم زامان آغلاتدی منی

استاد عاصم اردبیلی

گلمیشم

گوستر اوزون کی سیر گلستانه گلمیشم

بیر زائرم زیارت جانانه گلمیشم

لطف ائله، ویرما، قهر داشین داغلی سینه مه

درگاهینه امیدله درمانه گلمیشم

ایللر بویو تحمل ائدیب هجر دردینه

بئش گون قوناق بو خانه احسانه گلمیشم

شرمنده یم اگر چی برازنده تحفه دنچ

جان نقدی الده، ملک سلیمانه گلمیشم

سن سیزلیگه دوزونمه میشم، گرچه قطره یم

مین شوقیلن قوشولماغا عمانه گلمیشم

کافر آدیلا گر چی قاپوندان قاوولمیشام

رحم ائیله باری، ایندی کی ایمانه گلمیشم

سیندیرمیشام جسارتیلن عقل سددینی

دیوانسرای عدلووه دیوانه گلمیشم

تا مهریلن غرور باشین ویرمیشام داشا

مهر نگاردن سر و سامانه گلمیشم

من عشق مجمرینده اوره کدن آلیشمیشام

تسکین درده، چشمه ی عرفانه گلمیشم

نیزار تک سیزیلتی چوکوب سوزلو سینه مه

هجران نوالی، منده نیستانه گلمیشم

عشق اهلی دیر، حقارتیلن باخما عاصمه

عالم بیلیر بو عرصه یه مردانه گلمیشم

استاد عاصم اردبیلی

گل، گئت

گل بوشان شان اوره گین قصه سین انشاءائله گئت

بیربه بیر ووردوغون اوخلاره تماشا ائله گئت

آیریلیق دان نظر ائت گوزده ن آخان قان یاشیما

قطره لرده ن توره نن چشمه نی دریا ائله گئت

گیزلی اسراریمی ائل ده ن ائله دیل ده ن دیله سال

سن ده مجنونونو ائللر آرا رسوا ائله گئت

داغلی یام بارلی باغین پنجره سین آچ اوزومه

قاراقیش دان قارالان باغریمی احیا ائله گئت

بیر باخیش سئوگی یه ایللر بویو حسرت ده وارام

گل گولوم گل اونو بو جان ایله سودا ائله گئت

قتلیمین حوکمونو سن سیزلیگیم امضا ائلئیب

گل بو محکومون اوزون حوکمونو اجرا ائله گئت

ظلماتین داش قلعه سین ده ن باشا داش یاغمادادیر

تکجه بیر جلوه قارانلیق دا تماشا ائله گئت

باخ بو وحشت ده بوغولموش آجی قیشقیرتی لارا

لال سکوت دان دوغولان های کویو معنا ائله گئت

گئجه نین باغلا قارا معجرین آیدین سحره

گوندوزون خیمه سینی اولکه ده برپا ائله گئت

عاصمین دردی آغیر اولسادا یونگول دو یوکو

گل بو قارقانمیش ایلان کوسمه مدارا ائله گئت

استاد عاصم اردبیلی

نامرده دو وئرمه

الهی هر نه وئرسون مرده وئر نامرده دو وئرمه

وطنداش حقّینه بیگانه یه حق وتو وئرمه

جلودار ائت بیزه دانانی دشمن اولسادا اولسون

آماندیر لطف قیل سوز قانمیان دوستا جلو وئرمه

کریم انسانه کرمان قالی سین وئر، فرش کاشان وئر

پخالت یورقانیندا یوخلایان شخصه پتو وئرمه

جناب قانمازا آت وئر، قاطیر وئر، مال داوار لطف ائت

پوزون آرتیر ماقا وئر قرمیزی نیسان، پژو وئرمه

سیچان آرتماقدادیر آرتیر پیشیکلر نسلینی امّا

سیچاندان باشقا بو حیوان اوچون حق میو وئرمه

قارینپا کیمسه نین شوربایه آرتیر رغبتین یارب

قوناقلیقدا عنایت قیل اونا میل چلو وئرمه

دئینگن کیمسه نین شرّیندن ایمن قیل قولاخلاری

عمل سیز واعظین آلت انگینه بیر بئیله تو وئرمه

دئمم میز بازی میزدن آیری ساخلا دیغلاسین اولسون

دییم بو فرقه یه وئر سونده میز چسب اوهو وئرمه

او کس که بورک سندن ایستیور باشلاره بورک قویسون

او شخصه باش وئریپسن عیبی یوخ امّا شاپو وئرمه

اوکی حیوان کیمین بیزلنمه سه مشکل یولا توشسون

بو حیوان خویلویا قیل مرحمت بیز وئر بزو وئرمه

اوکی مال حیوانی ایللر قویوپدور آرپایا حسرت

ائله مخلوقه یا رب جو وئر امّا آبجو وئرمه

خدایا مین کتابلیق قافیه بذل ائت غزل بازه

قیزیل بازه قیزیل وئر قات باقات پول وئر پلو وئرمه

حکیما «عاصمین» اشعارینه بیر کسیه دوزگوندور

خطاسین بیر به بیر عفو ائیله ییب اغیاره لو وئرمه

عاصم اردبیلی 2/2/87 اردبیل