اشعار ترکی آذری و فارسی

اشعار ترکی آذری و فارسی

مئی ساتانلار کوچه‌سی- تورکی و فارسیجا شعرلر
اشعار ترکی آذری و فارسی

اشعار ترکی آذری و فارسی

مئی ساتانلار کوچه‌سی- تورکی و فارسیجا شعرلر

عاشورا رجزی، دۆشدۆ حسین بلایه، یا خاتمُ‌النّبین

گل دشت-ی-نئینوایه، یا خاتمُ‌النّبین

دۆشدۆ حسین بلایه، یا خاتمُ‌النّبین

 

بیر وقتدیر بۇ ساعت، لازیمدی سرعت اوْلسۇن

دئ خازن-ی-جَنانه آماده خیدمت اوْلسۇن

دستور وئر قارادان، جنّاته زینت اوْلسۇن

کرب-وْ-بلاده حاضر طوبای-ی-جنّت اوْلسۇن

سالسێن حسینه سایه، یا خاتمُ‌النّبین

 

زهراده قتلگاهه فوراً اؤزۆن یئتیرسین

بیر رختخوابیله‌ن بیر تخت-ی-روان گتیرسین

نعش-ی-حسینی بۆکسۆن، مئیدانیده‌ن گؤتۆرسۆن

زینب گئده‌نده شامه، ایجلالیله‌ن اؤتۆرسۆن

یوْخسا ائده‌ر گیلایه، یا خاتمُ‌النّبین

 

بیرده سفارش ائیله، ارواح-ی-انبیایه

سرعتله نازل اوْلسۇن، صحرای-ی-کربلایه

اوْنلار سنین دالۇندا، گلسینله اقتدایه

سن قێل نماز-ی-دفنی، مظلوم-ی-کربلایه

تحویل وئر بقایه، یا خاتمُ‌النّبین

 

کافور-وْ-سۇ گتیرمه، چون غوسله یوْخدۇ حاجت

غوسلین اؤزۆ ائدیبدیر، قاندان؛ تاپێب شهادت

اؤز نعشی اۆسته باشێ، قرآن ائده‌ر تلاوت

ائیله‌ر نوای-ی-زینب، تلقینینه کفایت

سن گل فقط عزایه، یا خاتمُ‌النّبین

 

قانێن یاخێب حَرَملر، موی-ی-سر-ی-سییاهه

عنّابی رنگ، زۆلفۆ تؤکدیله قتلگاهه

الوان کفن تؤخۇندۇ، اعضای-ی-پاک-ی-شاهه

نه حاجتی حسین‌ین وار پنبه-وْ-گیاهه

یا کؤهنه بوریایه، یا خاتمُ‌النّبین

 

جئبریل هاردا قالمێش، دربارینین قۇلامی

قصد-ی-زیارت ائتسین، بۇ «وادی السلامی»

آلسێن قنادی اۆسته، گۆل پئیکر-ی-امامی

عرشُ‌اللهه آپارسێن، گزدیرسین هر مقامی

باخسۇنلار اوْل فدایه، یا خاتمُ‌النّبین

 

لقمان کی مدّعی دور دردین شفاسی واردۇر

گلسین حسینه وئرسین، درمان یاراسێ واردۇر

باخسا دییه‌ر بۇ جیسمین سالیم هاراسێ واردۇر

درمانیله‌ن ساغالماز آیرێ دواسی واردۇر

مُحتاج دور بُکایه، یا خاتمُ‌النّبین

 

بیر عدّه قدّسیاندان گلسین همین دیاره

اوْخلارێ چکسین آتسێن، بۇ جیسمیده‌ن کناره

تا یاره‌لر اوْخ آلتدان چێخسێنلار آشکاره

گؤر شاهد اوْل کی دوشمن وۇرمۇش نه قدری یاره

دلبند-ی-مُرتضیٰ‌یه، یا خاتمُ‌النّبین

 

مئحراب-ی-وعده‌گاهه دۆشمۆش یۆز اۆسته پئیکه‌ر

قوْیما بۇنوعی قالسێن آرخاسێ اۆسته دؤنده‌ر

نه حالدا دۇر حسینون گؤرسۆن هامێ ملک‌لر

درگاه-ی-کبریایه دۇت سینه‌سین برابر

سال عکسینی سمایه، یا خاتمُ‌النّبین

 

وقتیکه یحیوی‌نین روحی گئده‌ر بقایه

زیر-ی-لحد اوْلاندا، منزیل اوْ بینوایه

اوْردا گلیب آلاندا مأمورلر آرایه

وئرره‌م قسم عزیزون مظلوم-ی-کربلایه

اوْندا یئتیش هرایه، یا خاتمُ‌النّبین

 

شاعر: مرحوم استاد یحیوی

عاشورا نوحه‌سی، اوْلدۇ شاهی کربلاده، تیره باران زینب‌ین

اوْلدۇ شاهی کربلاده، تیره باران زینب‌ین

ظۆلم الیله خانیمانی، قالدێ ویران زینب‌ین

 

بیر گۆنۆن عرضینده الده‌ن، آلتێ قارداشێ گئدیب

سئیل تک جاری اوْلۇب توْپراغا گؤزه یاشێ گئدیب

نوجوانلاری اؤلۆب هم یار-وْ-یوْلداشێ گئدیب

قالمئیوب بیر دادخواهی دیده گیریان زینب‌ین

 

صُبحیده‌ن ظُهره کیمی محو اوْلدۇ جاه-وْ-عزّتی

گئتدی یغمایه اوْنۇن مال-وْمنال-وْ-دولتی

اوْلمادێ گؤز آچماغا ظۆلم-وْ-جفاده‌ن فُرصتی

محنتی ساعت به ساعت آرتدێ نالان زینب‌ین

 

گه گؤرۆب میناده یاتمێش یان-یانا قۇربانلارێن

هر ایکی نهرین آراسێندا دۆشه‌ن عطشانلارێن

گه گؤرۆر شادلێق ائده‌ر آت اوْینادۇر عُدوانلارێ

صبرینی الده‌ن آلۇر بۇ ظۆلم-ی-عُدوان زینب‌ین

 

خئیمه-وْ-خرگاهینه دوشمن وۇرۇب اوْد یاندێرێب

زینبه چادیرکی عبّاسی قۇرۇب اوْد یاندێرێب

خئیمه‌لرده‌ن قاچمئیوب هرکس دۇرۇب اوْد یاندێرێب

قوْرخۇدان دۇتمۇش الین بیر عدّه طفلان زینب‌ین

 

تیره‌گۆن اوْلمۇش گؤرۆب بُرج-ی-فلکده اۇلدۇزێ

محنت-ی-ایّامه بیرده‌ن تۇش اوْلۇب زهرا قێزێ

شئمرین الده خنجری قانیله اوْلمۇش قێرمێزی

مقتله دۆشمۆش حسینی قانه غلطان زینب‌ین

 

بیلمئییر بیچاره هانسێ محنته صبر ائیله‌سین

قوْیماسۇن دۆشسۆن حَرَملر وحشته صبر ائیله‌سین

قمچی آلتێندا اۇشاقلار زحمته صبر ائیله‌سین

دۆشمه‌سین تا خۇرداجا قێزلارێ جاندان زینب‌ین

 

اؤز الیله لئشگه‌ره غارت‌لری تقسیم ائدیب

وئرمئیوب عُدوانه مُهلت بیربه‌بیر تسلیم ائدیب

قیسمتین غارتده‌ن آلدێ حمله کی هرکیم ائدیب

تا اوْلۇبدۇر خئیمه-وْ-خرگاهی تالان زینب‌ین

 

کربلاده قانه غلطان صاحب-ی-مئعراج اوْلۇب

جامه-وْ-رخت-وْ-زره پیراهنی تاراج اوْلۇب

پرده‌پوش عورت‌لری بیر معجره مُحتاج اوْلۇب

حالینه قان آغلئیۇب سلطان-ی-عطشان زینب‌ین

 

قوْللارێ باغلێ طنابه گؤزیاشێ یۆزده روان

باش-باشا صحراده وئرمیش نازدانه دُختران

اکبری الده اؤله‌ن لئیلا ائده‌ر آه-وْ-فغان

اوْد تۇتۇب قلبی یانار بۇ غمده پئنهان زینب‌ین

 

زینبی ناقه سوار اوْل قوم-ی-عُدوان ائیله‌دی

غم قطاری قتلگهده کوفیه راه ائیله‌دی

غمزده گؤزلرده جیلوه پئیکر-ی-شاه ائیله‌دی

ناقه اۆسته عقلی باشدا قالدێ حئیران زینب‌ین

 

ناله چکدی دختر-ی-خاتون-ی-محشر آغلادێ

قارداشێن حالێن گؤرۆب غمدیده خواهر آغلادێ

واحسینیم وای دئدی اوْلدۇ مکدّر آغلادێ

جانووا قارداش دئدی بۇ جانێ قۇربان زینب‌ین

  

شاعر: استاد یحیوی

حضرت زینب(س) قارداشێلا ویداعلاشێر

حسین ای زینب‌ین جانی امان قارداش، دایان گئتمه

گئدیب آغلاتما زهرانی امان قارداش، دایان گئتمه

 

قضا سرپنجه‌سین آچمێش قده‌ر چنگالی آماده

کمینوندا دۇرۇب دوشمن، بۇ صحرای-ی-غم افزاده

مقدّر امره یوْخ چاره، اؤزۆم بیلله‌م بۇ دونیاده

و لاکین گئتمه بیر آنێ، امان قارداش دایان گئتمه

 

زمانه زینبی بۆکدۆ، اؤلۆنجه بیر سییَه رخته

چتین موقع‌دی رحم ائیله، بۇ بیر عدّه قارا بخته

اگه‌ر چاره‌پذیر اوْاسا گئدیب سالما ایشی سخته

سییه‌پوش ائتمه دونیانی، امان قارداش دایان گئتمه

 

باشۇندا بیلمیره‌م هرگیز بۇ نه شور-وْ-نه سودادۇر

گؤرۆرسن کربلاء دشتی سراسر دشت-ی-غوغادۇر

بۇ قوم-ی-بی‌حیا قارداش همان بی‌شرم اعدادۇر

اوْغۇلسۇز قوْیدۇ لئیلانی، امان قارداش دایان گئتمه

 

بلالی زینبم قارداش، بلاده‌ن منصبیم واردۇر

رموز-ی-درد-وْ-محنتله، بیر عُمده مکتبیم واردۇر

دالۇنجا گلمه‌ییمده‌ن بیل، اۆره‌کده مطلبیم واردۇر

ائشیت بۇ سوز-ی-افغانی، امان قارداش دایان گئتمه

 

قدم ساخلا، آنام اوْغلۇ، اگرچه اوْلماسا زحمت

بۇ آخر وقتی صحراده، ائده‌ک بیر مجلیس-ی-خلوت

باجێ قارداش باجۇن اؤلسۆن، حسینیم ائیلییه‌ک صحبت

وارێمدێر عرض-ی-پئنهانی، امان قارداش دایان گئتمه

 

گتیر بوسه ائدیم اوّل موباره‌ک اللـروندان من

اؤپۆم اوْندان سوْرا قارداش گَلوی-ی-اطهروندان من

اؤپه‌ن وقته سالێم یاده، اوْ تئشنه لب‌لروندان من

آنام زهرای-ی-نالانی، امان قارداش دایان گئتمه

 

مصیبت موجینه غرقم، زبس بۇ اشتیاقۇندان

اؤپه‌م هئچ بیلمیره‌م قارداش الوندان یا دوْداغۇندان

ایجازه وئر منه بوسه ائدیم بیرده آیاقۇندان

اوْ خاک-ی-پاک قۇربانی، امان قارداش دایان گئتمه

 

دگیل بیجا گؤزۆم یاشێن، فلک آلقانه دؤنده‌رسه

اوْ اشک-ی-چئشمیله دونیا، اؤزۆن توفانه دؤنده‌رسه

باجێ نئیلیر گؤره قارداش، اۆزۆن مئیدانه دؤنده‌رسه

همین دونیای-ی-ویرانی، امان قارداش دایان گئتمه

 

زبسکی محنت-ی-هئجرون من-ی-بی‌یاره چوْخ چوْخدۇر

آنام زهرایه آند اوْلسۇن،داخێ سینه‌مده یئر یوْخدۇر

گئده‌ن گلمه‌ز بۇ مئیدانه، گؤرۆره‌‌م نئیزه‌دیر اوْخدۇر

قوْشۇن دۇتمۇش بیابانی، امان قارداش دایان گئتمه

 

استاد یحیوی

عاشورا رجزی، قان یاغدێ کربلاده، صحرایه یا محمّد

قان یاغدێ کربلاده، صحرایه یا محمّد

اؤلدۆ حسین خبر وئر زهرایه یا محمّد

 

یئل اسدی گۆن دۇتۇلدۇ، آشوب-ی-کربلاده‌ن

لرزه زمینه دۆشدۆ قان یاغدێ نُه سماده‌ن

قاتل گلیب حسین‌ین کسدی باشێن قفاده‌ن

خون-ی-خدا تؤکۆلدۆ، بیدایه یا محمّد

 

ظُهر اوْلدۇ کربلاده وقت-ی-شهادت اوْلدۇ

قان پرده‌سینده پئنهان، شمس-ی-امامت اوْلدۇ

قانلێ باشێن جیداده ذکری تلاوت اوْلدۇ

قوْیدۇ حسین اؤز عهدین، اجرایه یا محمّد

 

یۆز قوْیدۇ تلّه قاچسۇن زینب حرمسراده

قارداش باشێ گلۇبدۇر پیشوازینه جیداده

باشدان اۇجالدێ اللر صحرای-ی-غم‌فزاده

پخش اوْلدۇ واحسینا دونیایه یا محمّد

 

غسل ائتدی اهل-ی-بئیتبن خونابه‌ی-ی-ترینده

کفن اوْلدۇ زینب‌ینین گیسوی-ی-عنبرینده

قازدێ اؤزۆ مزارین تّلین برابرینده

نهر-ی-فراتی وئردی سقّایه یا محمّد

 

لازیم دگیل گتیرمه، گؤگده‌ن بهشت عَباسی

ثارُاللهه بۆکۆلدۆ نئیلور حسین لیباسی

باخ باشینه جیداده آزدۇر اوْنۇن یاراسێ

گودال ایچینده باخما اعضایه یا محمّد

 

بازار-ی-عئش ایچینده تنها حسین دوْلاندێ

بیر معنوی تجارت ایقبالینه توْخاندێ

وئردی متاع-ی-عُمرین حُکم-ی-بقا قازاندێ

الله رضاسین ائتدی سرمایه یا محمّد

 

فرمایش ائیله زهرا، بانوی دیلفیگاره

سن کی رضا دگیلدۇن باتسۇن حسین غوباره

بس هارداسان گل ایندی، چک موجیده‌ن کناره

اوْغلۇن دۆشۆبدۆ قانلێ دریایه یا محمّد

 

عالِم قیافه‌سینده اوْل شئمر-ی-نامسلمان

گلدی حسینی گؤردۆ گودالیده وئریر جان

سۇ وئرمه‌دی اوْ حالدا خنجر قوْیۇبدۇ دالدان

کسدی اوْ باشێ ساتسۇن ترسایه یا محمّد

 

قطع-ی-علائق ایله ترک ائتدی ماسوانی

«اَرنی» دئمه‌ز ائشیتمه‌ز آواز-ی-«لن ترانی»

قانێ یازار حسین‌ین، «یا ربّنا ترانی»

بۇ عالمی نیشان وئر موسایه یا محمّد

 

گؤرسۆنله کربلانین، کلیه واقعاتین

جئبریل صورت ائتسین، مجلیس گزارشاتین

ذئیلینده انبیالر یازسێن مشاهداتین

تا ال به ال یئتیشسین ایمضایه یا محمّد

 

گل گؤر سنه نه رتبه، الله قێلێب عنایت

تاپدێ سنین حسینون قۇربانلێغا لیاقت

دئسین خلیل-ی-رحمان در ضمن سر سلامت

سن صاحب اوْلدۇن عید-ی-اضحایه یا محمّد

 

شاعر: استاد یحیوی

عاشورا گۆنۆنه عایید بیر رجز

چێخدێ پیمبر روضه‌ی-ی-ریضواندان عاشورا گۆنۆ

گؤردۆ کفن گئیمیش حسین، پئیکاندان عاشورا گۆنۆ

 

جنّاتیده‌ن بیر حالیله‌ن چێخدێ، جناب-ی-مصطفیٰ

تاج-ی-ریسالت باشدا یوْخ، دورینده کلا" انبیاء

پای-ی-برهنه، سینه‌ چاک، ائتدی نزول-ی-کربلا

بلکه حسین‌ین قۇرتارا، توفاندان عاشورا گۆنۆ

 

گؤردۆ لب-ی-گودالیده، زهرا یئره معجر سالێب

قاتل حسین‌ین ذبح ائدیب، گۆل پئکرین بی‌سر سالێب

عرشه حسینیم وای سسین اوْغۇل اؤله‌ن مادر سالێب

زۆلفۆن ائدیب عنّابی رنگ، آلقاندان عاشورا گۆنۆ

 

بیر باخدێ حسرتله‌ن اوْنۇن، اعضای-ی-پئیکان پوشینه

نئیزه باشێندا نُطقینه، یئرده تن-ی-خاموشینه

شوره گلیب پروانه تک، شمعین چکیب آغوشینه

گؤردۆ اثر یوْخ شعله‌ی-ی-سوزاندان عاشورا گۆنۆ

 

ای مصطفیٰ‌نین گۆلشن-وْ-گۆلزارینه رئیحان حسین

مُحکم ستونی دینیمین، شیرازه‌ی-ی-قرآن حسین

دین اۆسته وئردۇن جان حسین، جدّون سنه قۇربان حسین

دینی قۇتاردۇن فتنه‌ی-‌ی-سئفیاندان عاشورا گۆنۆ

 

زینب ده ائندی تلّیده‌ن مظلوم حسین‌ین گؤرمه‌گه

گؤرمۆشدۆ چوْخدۇر یاره‌سی تا گلدی درمان وئرمه‌گه

ای کاش گلمئیدی خانیم، محنت اوْدۇن سؤندۆرمه‌گه

باشسێز تاپۇبدۇر قارداشێن، مئیداندان عاشورا گۆنۆ

 

گؤردۆ اوْ نعش-ی-اطهری بی‌سر یێخێلمێش مَقتله

موج ائیلئیور دریا آخۇر، یوْل باغلێ سۇ گلمه‌ز اله

چاره تاپۇب تدبیریله، رینب بۇ امر-ی-مُشکله

سر وئردی آب-ی-دیده‌نی گیریاندان عاشورا گۆنۆ

 

دیل بیلمئیور سؤز آنلاماز، وحشی عرب صحرانشین

چیپلاق آت اۆسته اگله‌شوب، اللــرده تیغ-ی-آهنین

بیرده‌ن یئرینده‌ن اوْینادێ، بیر عده‌ئی دریا کیمین

خئیمه سرایه یۆز قوْیۇب، هر یاندان عاشورا گۆنۆ

 

غارت قێلێب هر خئیمه‌نی میخ-وْ-طنابین قێردێلار

آل-ی-رسولی جمع ائدیب، بیر خئیمَیه‌یه اوْد وۇردۇرلار

باطینده عرش-ی-اعظمی، اهل-ی-جفا یاندێردێلار

چێخدێ مدار-ی-چرخ-ی-دون، میزاندان عاشورا گۆنۆ

 

پیمانگذاران-ی-الست ائتدی عمل بی‌کئیف-وْ-کم

تا ساحت-ی-قُدّوسیده‌ن فرمان اوْلۇب صادر اوْ دم

اهل-ی-وفانی آد به آد، ثبت ائتدی لوح اۆسته قلم

صورت دۇتۇب یئتمیش ایکی قۇرباندان، عاشورا گۆنۆ

 

خندق قازاندا حضرت-ی-سلمان اوْ سیمای-ی-جلی

گؤردۆ موباره‌ک ریشینی توْز توْپراق آلتدا پرده‌لی

امّا مظاهر اوْغلۇنۇن باتدێ قانا آق‌ساققالێ

مظهر گؤره‌ندی صورت-ی-سلماندان، عاشورا گۆنۆ

 

شاعر: استاد یحیوی

شهادت جناب علی اصغر(ع)

پئیکانی کمان اۆسته، چون حرمله میندیردی

اصغر کی دانێشمازدێ، پئیکان اوْنۇ دیندیردی

 

چکدی زهی گوشاگوش، دیقّتله نیشان ائتدی

شستینده‌ن اوْلۇب آزاد، اوْخ بیر طَیَران ائتدی

سرعتله نیشانگاهه چسب اوْلدۇ مکان ائتدی

آغوش-ی-امامتده ناحقّ یئره قان ائتدی

پئیغمبری آغلاتدێ سئفیانی سئویندیردی

یاقوت-ی-درخشانێن آویزینی سێندێردێ

قوْنداغێن آچێب آتدێ توْپراغه بۇرۇندۇردۇ

 

پئیمانی علی اصغر قانیله ائدیب ایمضاء

ضبط اوْلدۇ همان پئیمان محشرده اوْلا اجراء

تأثیر دعا قوْیدۇ بۇ قاندا حق-وْ-یکتا

اوْل طفلی حسین‌ینده‌ن معناده آلێب زهراء

بیر حوری-ی-زیبایه عطشان بالانی وئردی

قانلێ لچه‌یین آچدێ، جنّتده سوْیۇندۇردۇ

کوثرده وئریب غوسلین دیبایه گئییندیردی

 

قێلدێ عطه‌شین ساکت تا شربت-ی-کوثرده‌ن

نهر-ی-لَبن آرایێش تاپدێ، لب-ی-اصغرده‌ن

مقصوده یئتیب اصغر آیرێلمادێ اکبرده‌ن

شاه-ی-شُهدا باخدێ، اطرافینه کج گردن

گؤردۆ اوْنۇ مئیداندا بیر یاده سالان یوْخدۇر

انصار-وْ-مهاجرده‌ن بیر زنده قالان یوْخدۇ

اوْل طفلی قۇجاغێنده‌ن ظاهیرده آلا یوْخدۇر

 

گؤردۆ گؤزۆنۆ یۇمدۇ اصغر بالاسێ یاتدێ

اؤپدۆ قۇرۇ لب‌لرده‌ن عالملری آغلاتدێ

قایتاردێ قۇجاغێندا تا خئیمه‌لره چاتدێ

اوْوجۇندا دۇتۇب قانێن افلاکه طرف آتدێ

توْپراغا تؤکۆلسئیدی اصغر قانێ دۇرمازدێ

خئیمه دالێنا کئچدی شمشیریله یئر قازدێ

دفن ائتدی اوْ مظلومی اۆستۆنده آدێن یازدێ

 

سسله‌ندی باجێ زینب ای محنته آلوده

اوْلدۇ یۇخۇسۇزلۇقدان اصغر بالام آسوده

وئردیم اوْنۇ من تحویل بیر حالیله معبوده

قۇربانلارێ ختم ائتدیم، یئتدیم باجێ مقصوده

اوْل سۆد امه‌ری قوْیدۇم قبره ائله‌دیم راحت

گئت خئیمه‌ ده یا زینب گهواره‌سینی گیزله‌ت

بیچاره آناسێندان تا قوْیما چکیم خیجلت

 

سسله‌ندی خانیم زینب قارداش سسیوه قۇربان

چێخدێ چؤله چادیرده‌ن گؤردۆ دایانێب سلطان

بیر قیسمت عَباسینده وار تازه تؤکۆلمۆش قان

هم اللــری اوْل شاهین قانیله اوْلۇب الوان

عرض ائتدی هانێ قارداش بس تئشنه جیگر اصغر

سۇ ایچمه‌گه ائتمیشدی مئیدانه سفر اصغر

یوْخ ایندی قۇجاغۇندا گؤرره‌م سۆد امه‌ر اصغر

 

قارداش بۇ نه عالم‌دیر اۆستۆنده بۇ نه قاندێر

هاردان تؤکۆلۆبدۆر بۇ قان اللــرون الواندۇر

شرمنده‌لیک آثاری حالوندا نمایاندۇر

سۇ ایچدی بالام اصغر یا اینکه لب عطشاندۇر

حضرت اوْ دل‌افکاره ابراز-ی-جواب ائتدی

دونیا غمینی اصغر تسلیم رباب ائتدی

آغۇش-ی-شهادتده حشره کیمی خواب ائتدی

 

عطشان بالاما دوشمن سۇ وئرمه‌دی قان وئردی

رمزیله سۇیۇن رنگین دریاده نیشان وئردی

اۆچ شعبه‌لی پئیکانه حلقینده مکان وئردی

قۇش تک قانادێن چالدێ، قوْنداقێنا جان وئردی

سسله‌ندی خانیم زینب ای غۆنچه تریم لای-لای

یاتمازدۇن عجب یاتدۇن ای سود امه‌ریم لای-لای

یانمێش دیلیوه اصغر یاندێ جیگه‌ریم لای-لای

 

شاعر: تاج الشعرا مرحوم یحیوی اردبیلی

حضرت ابوالفضل(ع) شهادتینده نوحه

سالدێ عقابیده‌ن منی لئشگه‌ر-ی-کینه یا حسین

قالدێ سۇسۇز خیامیده خوردا سکینه یا حسین

 

اوْلدۇ ایکی قوْلۇم قلم، ائیله‌میره‌م گیلایه من

ائیله‌میشه‌م فدا اوْنۇ اصغر-ی-مه‌لقایه من

لیک بۇ غمده دۆشمیشه‌م بیر غم-ی-بی‌نهایه من

مشگیمه اوْخ دگیب سۇیۇ آخدێ زمینه یا حسین

 

قوْیمادێ بۇ فلک منی خدمه‌تیمی تمام ائده‌م

مشگی دوْلۇ سۇ چیگنیده خئیمه‌لره خرام ائده‌م

خوردا سکینه‌نین سۇسۇز قلبینی بیرده رام ائده‌م

سۇ وئره‌م اؤز الیمله اوْل زار-وْ-حزینه یا حسین

 

اوْلدۇ قلم بۇ عرصه‌ده قارداش ایکی قوْلۇم منیم

یاتدێ علم سێنێب بئلیم یاره‌دێ ساق-سوْلۇم منیم

سؤیله قێزۇن سکینه‌یه گؤزله‌مه‌سین یوْلۇم منیم

بیرده سۇ جامین آلماسۇن، حسرت الینه یا حسین

 

هر نه قده‌ر وۇرا یارا جیسمیمه فرقه‌ی-ی-جهول

من سنه آغلارام حسین حالیمه اوْلمارام ملول

اوْلسا اگه‌ر اوْ درگه-ی-پاکیده خیدمه‌تیم قبول

تارُک-ی-فخریم اوج ائده‌ر، عرش-ی-برینه یا حسین

 

قطعه‌ به قطعه دوْغرانێب نئیزه‌لر اوْلسا منزلیم

بیر سر-ی-موئی اینجیمه‌ز جانیوه اند اوْلا دیلیم

گؤرمه‌سم اوْل جمالیوی یاندۇراجاق بۇ نیسگیلیم

یاره‌لی قلبیمی منیم بیل اوْ غمینه یا حسین

 

زحمت اگه‌ر قبول ائدیب باشێمێن اۆسته بیر گذه‌ر

ائیلییه‌سن بۇ حالیده، یاره‌لی جیسمیمه نظر

بیلله‌م اوْ وقتیده منیم زحمتیم اوْلمئیوب هده‌ر

خدمتیمی قبول ائدیب شاه-ی-مدینه یا حسین

 

پئیکر-ی-پاره-پاره‌می اوْخلار هواده ساخلایێب

اوْخلار ایچینده جیسمیمی تیر-وْ-سنان قۇجاقلایێب

جاندان علاوه مشگیمی سُمّ-ی-ستور آیاقلایێب

مشگیمه یعنی تؤکدۆله‌ر قان سۇ یئرینه یا حسین

 

گؤزلریمی دۇتۇبدۇ قان گلسوْن اۇزۇندا گؤرمه‌ره‌م

من اؤزۆمۆ گلینجه‌سن عرصه‌ده زنده گؤرمه‌ره‌م

حشره قالێبدێ وعده‌میز روی-ی-زمینده گؤرمه‌ره‌م

مرغ-ی-اجل سالێب منی بسکی کمینه یا حسین

 

صدری بۇ نوحه‌نی یازار گؤز یاشێن ائیلئیور روان

خاطر-ی-پُرفیکاریده‌ن آه چکیب، ائده‌ر فغان

واردێ اۆره‌کده نیّت-ی-خفیه‌سی ائیله‌مه‌ز بیان

بیرجه نیظاره قێل اوْنۇن اشگ-ی-ترینه یا حسین

 

شاعر: یحیوی

امام حسین(ع) اوْغلۇ علی اکبر(ع) ویداعلاشێر

ای منای-ی- عئشقیمده، زینت-ی-منا اوْغلۇم

گئت جیداله خوْش گلدۇن، تئشنه لب فدا اوْغلۇم

 

بو بساط-ی-عئشقیمده اوّلین فدا سن‌سن

کربلا مناسینده، زینت-ی-منا سن‌سن

پیشگاه-ی-جانانه، تحفه ابتداء سن‌سن

برگزیده قۇربان‌سان، شبه-ی-مصطفیٰ سن‌سن

وئرمیشه‌م سنی قۇربان حقّه ابتدا اوْغلۇم

 

وئرمه‌دیم سر-ی-زولفون، مین فدای-ی-مینایه

سن کیمی فدا گلمه‌ز عرصه‌گاه-ی-دونیایه

گئت آنوْن کفن سالسێن قامت-ی-دل‌آرایه

آفرین دئسین هاجر صبر-وْ-حلم-ی-لئیلایه

سن فدایه اسماعیل ائتسین اقتداء اوْغلۇم

 

وئرمه قوّت-ی-قلبون الده‌ن ای جیگر گوشه

مزرع-ی-شهادتده سن‌سن اوّلین خوشه

گلمه‌سه علی قانۇن قتلگاهیده جوشه

روح-ی-عالم-ی-اسلام، گلمئیور بالا هوشه

مُحکم اوْلمئیور دین-ی-ختمُ‌الانبیا اوْغلۇم

 

اوْلماسا قێزێل قانه خال-ی-هاشمون غلطان

یا تؤکۆلمه‌سه زولفون توْپراق اۆستۆنه افشان

یا بؤلۆنمه‌سه جیسمون، قطعه-قطعه چون قۇربان

اوْلمئیور یقین تکمیل حقّه وئردیگیم پئیمان

اوْلمۇسان اله گلمه‌ز، عئین-ی-مدّعا اوْغلۇم

 

اوْغلۇنۇن الین دۇتدۇ گلدی تلّده‌ن اندی

یۆز دۇتۇب عمرسعد-ی-بیحیایه سسله‌ندی

نسلیوی گؤرۆم کسسین، اکبرین خداوندی

بۇ منا بۇ سن، بۇ من بۇ حسین جیگر بندی

اوْل سنون قارا قلبون، بۇ قمر لقا اوْغلۇم

 

سن کی راضی اوْلدۇن بۇ ظلمه ای جفا کرده

ایحتیرام-ی-طاهایه قوْیمادۇن قالا پرده

بۇ جوان-ی-رعناده‌ن چکدیم ال همین یئرده

حقّ اؤزۆ آلار سنده‌ن، بۇ قصاصی محشرده

فاطیمه رضا اوْلماز، اوْلماسا رضا اوْغلۇم

 

شاعر: یحیوی

حضرت علی اکبر(ع) آناسێ ایلا ویداعلاشێر

شمع-ی-روخساریوی گل خئیمه‌ده یاندێر علی گئـت

منـی پــروانــه کیـمـی بـاشـه دوْلانـدێــر علـی گئـت

 

ایندی کی معجریمی غرق ائله‌دین گؤز یاشێنا

قلبیمین شیشه‌سینی باغلادۇن هیجران داشێنا

آت مژون اوْخلارێنێ، وۇرگێله قلبیم باشێنا

یارالێ سینه‌می آلقانا بوْیاندێر علی گئت

 

قوْرخۇرام نطقیوه یا دُرّ دن آرتێق سؤزۆوه

بد نظرده‌ن یئتیشه صدمه علی جان گؤزۆوه

آل بۇ جان نقدینی سن ائیله تصدّق اؤزۆوه

چون تصدّق‌له بلا، زایل اوْلاندێر علی گئت

 

چوْخ غنیمت‌دی بۇ ساعت علی جان دۆشمه‌ز اله

آنا قۇربان گؤزۆوه، گل منله صؤحبت ائله

بئش دقیقه گل اوْتۇر، گئتمه‌یه ائتمه عجله

فرصت‌ون واردێ بئله، وقتی یۇباندێر علی گئت

 

ائویمی یێخدێ منیم گؤر نئجه بۇ قو-ی-ظُلَم

بئش دقیقه سن‌لن اوْلماغێ فرصت بیلوره‌م

گؤرۆره‌م گئتمه‌ییوی گلمه‌ییوی گؤرمه‌یوره‌م

من-ی-بیچاره‌یه بۇ نکته عیاندور علی گئت

 

من کی ایصرار ائدیره‌م ساخلایاسان بیرجه آیاق

لاعلاجم بالا واللاهی چتین ایشدی فراق

نقه‌ده‌ر باخسا گؤزۆم گؤزلریوه دوْیمایاجاق

بیر نیگاهیله مگه‌ر دیده دوْیاندۇر، علی گئت

 

یۇخۇدۇر من گؤرۆره‌م یا علنی‌دور گؤره‌سن

اگنینه گئیمیش علی اکبر-ی-شهزاده کفَن

دالێسێجان قاچۇرام یالوارۇرام بۇ دیلیله‌ن

بۇ یاتان بختیمی رؤیاده اوْیاندۇر علی گئت

 

اکبریم دردون آلۇم دردیوی بۇ جانه وۇرۇم

حقّه قۇربان گئدیسه‌ن، سۆرمه اوْ مُژگانه وۇرۇم

زولفون آشوفته دگیل، عطر سپیب شانه وۇرۇم

دل-ی-آشوفته‌می خونابه بۇلاندۇر علی گئت

 

بیلۇره‌م کیمدی علی جان منی سنده‌ن آیێرۇر

دست-ی-خونین-ی-اجلدور سنی منده‌ن آیێرۇر

بۆلبۆلۆ گۆلده‌ن اوْ شئیدانی چمنده‌ن آیێرۇر

ایندیکی آیرۇلۇسان وصلون هاچاندۇر علی گئت

 

عاشئقۇن اوْلدۇم ازه‌ل زولفووه باغلاندۇم اوْغۇل

نئجه سنده‌ن چکوم ال قلبیده‌ن اوْدلاندۇم اوْغۇل

یوْخ گۆمان گلمه‌گیوه یاندۇم اوْغۇل، یاندێم اوْغۇل

بیلمه آسان غم-ی-هیجرانی یاماندۇر، علی گئت

 

صدریا نوحه یازۇب ایسته نجات-ی-ابدی

اکبرون آند وئر اوّل وقتینه حیّ-وْ-احدی

دۇتۇب اکبر اته‌گین لئیلی-ی-بیچاره دئدی

شمع-ی-روخساریوی گل خئیمه‌ده یاندێر علی گئت

 

شاعر یحیوی اردبیلی

ایمام(ع) باجێ‌سێندان ویداع ائدیر

ای آنامێن نیشانه‌سی، آغلاما! زینب آغلاما

تیره اوْلان زمانه‌سی آغلاما! زینب آغلاما

 

سن کی آنام نیشانی‌سن، باجێ بلایه صبر ائله

عتره‌تیمین گۆمانی‌سن، باجێ بلایه صبر ائله

دردیوی دۇت نهانی ‌سن، باجێ بلایه صبر ائله

اوْلگیله غم خزانه‌سی، آغلاما! زینب آغلاما

 

تؤکمه عذاره گؤز یاشۇن، زنده‌دی قارداشۇن هله

غارته آچمئییبدیر ال شئمر-وْ-سنان-وْ-حرمله

گلمه دالێمجا آهیله‌ن عالمه سالما ولوله

تؤکمه سرشک دانه‌سی، آغلاما! زینب آغلاما

 

گل باجێ بیر قۇجاقلاشاق، ایندی کی غم دۇتۇب دلون

کئچسه بیر آز زامان قالێر، قلبیده درد-وْ-نیسگیلون

قاره گۆنۆن قاباقدادێر، آغلا اوْلاندا منزیلون

بۇم‌لر آشیانه‌سی، آغلاما! زینب آغلاما

 

اؤلمه‌گه گلمیشه‌م باجێ وادی-ی-نئینوایه من

شانلێ گۆنۆم یئتیب باشا، صبر ائده‌ره‌م قضایه من

ختمه یئته‌ر بۇ عرصه‌ده چون گئده‌ره‌م بقایه من

دوشمه‌نیمین بهانه‌سی، آغلاما! زینب آغلاما

 

نئیزه-وْ-تیغ-وْ-تیرله، جیسمی دوْلار حسینووۇن

گۆلشنی ظۆلم-ی-جوریله، ایندی سوْلار حسینووۇن

شئمرین الینده اوْل زامان غارت اوْلار حسینووۇن

خئیمه‌ی-ی-شاهییانه‌سی، آغلاما! زینب آغلاما

 

گؤردۆن ائلئیکی توْپراغێن اۆستۆنه یاغدێ قان باجێ

اوْندا من-ی-غریب اۆچۆن، ائیله‌گیله‌ن فغان باجێ

لئشگه‌ر-ی-کوفه‌نین یئته‌ر، گؤگله‌ره اوْل زامان باجێ

حوصه‌ی-ی-شادیانه‌سی، آغلاما! زینب آغلاما

 

بیر ائله وقته جان سنین، جان بۇ حزین یتیملرین

ظۆلم-وْ-جفائیله اوْلان، زار-وْ-غمین یتیملرین

باشلارێنا دَیه‌ن زامان باجێ همین یتیملرین

حرمله تازیانه‌سی، آغلاما! زینب آغلاما

 

شاعر: یحیوی اردبیلی

عاشوار گئجه‌سی و ایمامین انصاری

گؤگده‌ن شب-ی-عاشورا، نورانی لوا گلدی

پرچمده یازێلمێشدێ، نام-ی-شُهدا گلدی

 

یوم-ی-غم-ی-تاسوعا، گۆن باتدێ باشا یئتدی

حضرت اوْ جماعت‌له‌ن ایقدام-ی-نماز ائتدی

بیر عدّه نماز اۆسته‌ن گیزلینجه دۇرۇب گئتدی

اصلا اوْ گئده‌نله‌رده‌ن نه سس نه صدا اوْلدۇ

 

بیعت گؤتۆرۆب حضرت، قتلین دئدی منبرده

مشعل‌لر اوْلۇب خاموش ظۆلمت توْخۇدۇ پرده

گئتدی اوْ قارانلۇقدا بیر دسته‌ی-‌ی-دیگرده

ثابیت قالان انصاره تحسین-ی-خدا گلدی

 

بیگانه-وْ-نامحرم، ترک ائیله‌دی جانانی

تشکیل تاپێب ناگه بیر مجلیس-ی-روحانی

جمع ائتدیله‌ر اوْل بزمه دلداده احبّانی

یئتمیش ایکی جاندان بیر آواز-ی-وفا گلدی

 

بیر خطبه اوْلۇب جاری لبهای-ی-امامتده‌ن

آچدێ علنی پرده اسرار-ی-شهادتده‌ن

گؤرسندی عجب عالم، اوْل وقتیده حضرتده‌ن

«العلم» یقین اۆسته، رؤیتله قوا گلدی

 

انگشت-ی-مبارکله رد ائتدی حجاباتی

ائندیردی اشارئیله‌ن، گؤگده‌ن یئره جنّاتی

جنّتده شهیدانین گؤرسه‌ندی مقاماتی

اوْردا نظره قصر-ی-یاقوت-وْ-طلا گلدی

 

بیر خئیمه کی اوْلمۇشدۇ زهراء قێزێنا تسلیم

اوْغلانلارێنا مشق-ی-دعوا ائله‌یور تعلیم

سلطانه بۇ طرزیله صبّاح ائده‌سوز تعظیم

گؤرسۆن آتامۇن اوْغلۇ منده‌نده فدا گلدی

 

نصف-ی-شبیدی حضرت چێخمێشدێ مصلّایه

قصد ائیله‌دی تا گئتسین دیدار-ی-احبّایه

دۆشدۆ یوْلۇ خرگاه-ی-صدّیقه صُغرایه

ناگاه قۇلاغێنا آشفته نوا گلدی

 

بهت عالمی یۆز وئردی خئیمه قاپێسێن آچدێ

ناگاه اوْ باجێ قارداش بیر نوعی قۇجاقلاشدێ

اوْل خۇرداجا قۇربانلار بۇ حالته آغلاشدێ

هم ناله-وْ-افغانه، سکّان-ی-سما گلدی

 

شاعر:تاج الشعرا یحیوی

حضرت زینب(س) قتلگاهدا اوْخشایێر

زینبـَم بیاباندا لئشگریمی آختاررام

خئیمه‌لر یانان یئرده معجریمی آختاررام

 

هر مکاندا بیر کؤهنه سقف‌سیز بنا گؤرسه‌م

پایه‌سی شکست اوْلمۇش خانه-وْ سرا گؤرسه‌م

یا حصاری ویرانه قصر-ی-غم‌فزا گؤرسه‌م

یا خرابه مسجدده‌ن هاردا بیر نما گؤرسه‌م

چون ایتیرمیشه‌م، اوْردا؛ گؤهریمی آختاررام

 

بیرده گر یوْلۇم دۆشسه، کربلا میناسینه

یۆز قوْیۇب سۆرۆننه‌م من قتلگاه آراسینه

گؤز تیکیب حسین بیلله‌م زینبین دواسینه

تا قوْیام قارا مرحم زۆلفده‌ن یاراسینه

قان ایچینده صد پاره پئیکریمی آختاررام

 

پر آچێب اگر گؤرسه‌م برگ-ی-نخل خرماده

قارداشێم بئله بیلله‌م پرچم ائتمیش آماده

گؤزلریم دۆشه‌ن وقته سرو قد شمشاده

نامدار ابالفضلین قامتی دۆشه‌ر یاده

صاحب علم، غیرت پروریمی آختاررام

 

هانسێ شاهێ گؤرسه‌م من موکب-ی-جلالتله‌ن

دوره‌سین آلێب لئشگر حُرمت-ی-نهایتله‌ن

پرچمین وزیر آچمێش باشێ اۆسته عزّتله‌ن

گوزلریم گزه‌ر صف صف مُنتهای-ی-دقّتله‌ن

اوْردا فضل-وْ-عبّاس-وْ-جعفریمی آختاررام

 

گر مله‌ر قۇزۇ گؤرسه‌م آیرێلێبدێ مادر ده‌ن

آوچێلار قاباغێندا صیدلر اگیب گرده‌ن

بچّه آهو آوازین من ائشیتسه‌م هر یئرده‌ن

خۇردا قێزلارێن آللام سس‌لرین اوْ سسله‌رده‌ن

چؤللــره قاچان آهو گؤزلریمی آختاررام

 

یاتمارام اوْلۇن شاهد، ای اێشێقلێ اۇلدۇزلار

صبح اوْلۇنجا سیزلر تک قاللام هر گئجه بیدار

آغلارام یۇخۇم گلمه‌ز بیلمیسیز نه دردیم وار

آی چێخاندا دیسگیننه‌م چون بالام آیا اوْخشار

آسمـاندا مـه پئیکر اکبریمی آختـاررام

 

قۇشلارێن نئجه صیّاد لانه‌سین ائده‌ر تالان

ائتدیله‌ر اوْ قۇشلار تک، آشیانه‌می ویران

آشیانیم اوْد دۇتدۇ قاچدێ چؤللره طفلان

من اوْدۇر همان گۆنده‌ن اوْلمۇشام بئله نالان

دلشیکسته مرغان-ی-بی‌پریمی آختاررام

 

قوْشار: حاج عبّاسقلی یحیوی اردبیلی(تاج‌الشُعرا)

حضرت زینب(س)‌ قتلگاهدا قارداشێنا سؤیله‌ییر

سنه یا حسین یۆزۆمده‌ن، آچێلان نقابیم آغلار

باشێم اۆسته ذرّه ذرّه، دۆشه‌ن آفتابیم آغـلار

 

اۆره‌گیمده مه جمالون، اێشێقێن گؤره‌ن گؤزۆم وار

منه بیر چێراغ-ی-شب‌دیر، بۇ چێراغه نه سؤزۆم وار

گئجه‌لر یۇخۇ یوْخۇمدۇر، کی قاباقدا گۆندۆزۆم وار

اوْ بلالی گۆندۆزۆمه، شب-ی-ماهتابیم آغلار

 

یارالێ باشۇن جیداده، ائلییه‌ن زمان تجلّا

من-ی-بینوایه تاریک، اوْلۇ روشنای-ی-دونیا

ائله یاندێران دیلیله، دییه‌ره‌م حسین حسین وای

اۇجالان سسیمه مُلحق، اوْلۇر اؤز خیطابیم آغلار

 

نه قده‌ر ساغام بلاده‌ن، غم-وْ درد دیر حوالَم

ائله کی گؤزۆم یۇمۇلدۇ، قۇتارۇب کسیلدی نالَم

منی قوْیدۇلار مزاره، دوْلانۇر مدار-ی-عالم

لَحد آلتدا توتیا تک، تؤکۆله‌ن تُرابیم آغلار

 

گؤزۆمۆن یاشێ غموندا، قارا مُشگنابه بنزه‌ر

تؤکۆله‌نده سینوْن اۆسته، دوْلانۇر گۆلابه بنزه‌ر

دوْلاشێبدێ گردنیمه، هؤرۆگۆم طنابه بنزه‌ر

اوْ طنابه قوْللارێمدان، وۇرۇلان طنابیم آغلار

 

تؤکه‌ر اوْل قلم‌لری کی ورقه قارا مُرکّب

اوْ قارا مُرکّبیله اوْلۇ شرح-ی-حال زینب

قلمون گُزارشینده‌ن اوْخۇناندا غملی مطلب

خبر-ی-مُصیبتیمده یازێلان کیتابیم آغلار

 

داغێداندا اشگ-ی-توفان، یئره چشم-ی-غم نیگاهیم

اوْنۇ خُشک ائده‌ر اۆره‌کده‌ن چێخان آتش-ی-سییاهیم

ایکی ضدّیله‌ن موافق اوْلۇر ابر-ی-دود-ی-آهیم

اوْدۇلان سۇ اۆسته شبنم، اَله‌یور سحابیم آغلار

 

حَرم اهلینین صفینده‌ن گلیر هر بیری نوایه

وئری کاروان-ی-ماتم، اوْنۇلان صدا-صدایه

هامۇدان چوْخ آغلارام من، اوْ نوای دلرُبایه

کی گۆناه‌سیز بالاسێ، وۇرۇلان ربابیم آغلار

 

سنی سسله‌ره‌م برادر منیله دانێش جیداده

سسیوی ائشیتمه‌ره‌م چون، گلیره‌م فغان-وْ-داده

اوْ محاسن-ی-شریفون نئجه تیتره‌یور هواده

ائده‌ر اضطراب اوْنۇن تک، دل-ی-پیچ-وْ-تابیم آغلار

 

قوْشار: حاج عبّاسقلی یحیوی اردبیلی(تاج‌الشُعرا)