اندیشه‌ام اوچموش

اندیشه‌ام اوچموش ای دل گوگده‌ن گوگه قوناق دیر

نیلیم کی یار شیرین اندیشه ده‌ن قاباق دیر

گوستردی صورت اول شاه گیزلت جمالین ای ماه

گوزسه سنی دییر آه آی دیر بو یا اوراق دیر

زاهد اگر ووروور می عیب ائتمه سن ده وور نی

ایمانی یاندیران شیء آتش دگیل فراق دیر

من بیلمیره‌م او اینجه بئل دیر و یا دوشونجه؟

من بیلمیره‌م او غنچه جان دیر و یا دوداق دیر؟

چک خلقه تیر ابرو ائت ملتین قانین سو

باخما بویورسا یارو ملت شاها دایاق دیر

هر رنگه امر ائدیرسن اول رنگه چئوریلیم من

خلقی بو گون دیکلده‌ن دانش دگیل بویاق دیر

ای هجره مبتلالر من تک یانان گدالر

سلطانیمیز یاتیب گر اللاهیمیز اویاق دیر

بیر قاره زولفه باغلان قول اول بیرینه داغلان

درک ائت بونو آی اوغلان آزاده لیک قاچاق دیر

ظالم کی قلبی داش دیر فکرائتمه بینی بوش دیر

چوخ گوزده اگری خوش دی چوخ یئرده باش ایاق دیر

شاهی یانیب یوووشدو توفانیلن قووشدو

آتمیش یاشین سوووشدو اما گئنه اوشاق دیر

عسگر شاهی اردبیلی