ایران اؤزوموندور!

من شاه قوی شوکتم، ایران اؤزوموندور!

ایران اؤزومون، ری، طبرستان اؤزوموندور!

آباد اولا یا قالسا دا ویران، اؤزوموندور!

قانون اساسی نه دی، فرمان اؤزوموندور!

شوکت اؤزومون، فخر اؤزومون، شان اؤزوموندور!

وئرمیشدی آتام گر سیزه قانون اساسی

بیر ملا کیشیدی، وار ایدی حلمی، حیاسی

بیلمزدی نه دیر لیک امورات سیاسی

ای همشهری، سن اگنینه گئی بیتلی لباسی!

خلعت اؤزومون، تخت زر افشان اؤزوموندور!

شوکت اؤزومون، فخر اؤزومون، شان اؤزوموندور!

ایرانلی دگول، جمله بیلیر «ممدلی»یم من

گرگان جفا و ستمین چنگلی یم من

ایرانلی لارین باشلاری نین انگلی یم من

سوررام، ایچه رم قانلارینی- چون زلی یم من

لاشه اؤزومون، ات اؤزومون، قان اؤزوموندور

شوکت اؤزومون فخر اؤزومون، شان اؤزوموندور!

گؤردوز کی، نئجه سیزلری تادیب ائله دیم من

باققال بالاسین لشگره سرتیپ ائله دیم من

آتشله یاخیب مجلسی تخریب ائله دیم من

قرآنی دانیب، آندی دا تکذیب ائله دیم من

سوگند نه دیر، عهد نه، فرمان اؤزوموندور

شوکت اؤزومون، فخر اؤزومون، شان اؤزوموندور!

عثمانلیدا گر چه اوجالیر بیر پارا سسلر!

آلقیشلاییر اول سسلری هپ قیرمیزی فسلر!

غم چکمیین، ای کهنه لر، ای کهنه پرسلر!

ایرانیمه تاثیر ائده مز یؤیله نفس لر

بوندان سورا بو اؤلکه ده میدان اؤزوموندور!

مخلوق اؤزومون، خنجر بران اؤزوموندور!

تبریزلی لرین کور ایدیمی، گوزلری اوّل!

بیر یئرده کئچیرتدیک گئجه- گوندوزلری اوّل!

حقیمده یوق ایدی اولارین سؤزلری اوّل

شاه ائتدیلر ایرانه منی اؤزلری اوّل

ایندی نه دئییرلر دخی، دوران اؤزوموندور!

قیزلار اؤزوموندور، گؤزه ل اوغلان اؤزوموندور!

ایرانلی گرگ عمر ائده ذلبتده همیشه!

نکبتده، اسارتده، مذلتده همیشه!

ایرانلی گرگ جان وئره غربتده همیشه

ایرانلی، ایتیل، گئت، یاخاوی بتله همیشه

خاقان اؤزومون، کشور ساسان اؤزوموندور!

شوکت اؤزومون، فخر اؤزومون، شان اؤزوموندور!

میرزه علی اکبر صابیر