«دبستان» دا قاپاندی!

المنته لله کی، «دبستان»* دا قاپاندی

بیر باد خزان اسدی، گلستان دا قاپاندی

حاصل لری پوچ اولدی بوتون مزرعه جاتین

یئل ووردی قاوون، قارپوزی، بوستان دا قاپاندی

«الفت» کسیلیب توخدادی «برهان ترقی»

محو اولدی «حمیت»، ادبستان دا قاپاندی

«رهبر» یورولوب، یوخلادی «ارشاد» و «تکامل»

آسلانلارا اوخ دگدی، نیستان دا قاپاندی

میدان رقابتده بیزیم همتیمیزدن

دعوا قاپانیب، رستم دستان دا قاپاندی

اطفال وطن قوی باغیریب اولسون آجیندان

یاندی آنالار سینه سی، پستان دا قاپاندی

قوی کهنه لرین داش اوره گی گول تک آچیلسین

دارالظفر تازه پرستان دا قاپاندی

*- نشریه آدی دیر

میرزه علی اکبر صابیر